تەڭگەنىڭ بۇل جولعى نىعايۋى ۋاقىتشا قۇبىلىس - ەكونوميست
ەكونوميست ساراپشى اسىلبەك كۇزدەۋبايەۆتىڭ پايىمىنشا، تەڭگە باعامىنىڭ بۇل جولعى نىعايۋى - جىلدا قايتالاناتىن قۇبىلىس.
«تەڭگە باعامىنىڭ قازىرگى نىعايۋىنىڭ بىردەن- ءبىر سەبەبىن عانا ايتا الامىز. بۇل سالىق تولەمدەرى قورىتىندىلاناتىن كەزەڭمەن تىكەلەي بايلانىستى. ياعني، قازىر قارجى وپەراتسيالارىنىڭ ءبارى تەڭگەمەن اينالىپ جاتىر. سوندىقتان بۇل تەڭگەنىڭ نىعايۋىنا نەگىزگى فاكتور بولىپ وتىر. الداعى ءبىر اي كولەمىندە تەڭگەنىڭ قايتادان قۇنسىزدانۋ پروتسەسىن كۇتۋگە بولادى»، - دەدى ساراپشى قازاقپارات تىلشىسىنە تەلەفون ارقىلى بەرگەن سۇحباتىندا.
ەكونوميست تەڭگەنىڭ بۇل جولعى نىعيۋى قىسقا مەرزىمدى قۇبىلىس بولعاندىقتان، ينفلياتسياعا اسەرى شامالى بولاتىنىن ايتادى.
«تەڭگە باعامىنىڭ قىسقا مەرزىمدى نىعايۋىنا بايلانىستى كوپ كولەمدە شەتەلدىك ۆاليۋتا ساتىپ الۋ اسا ءتيىمدى ەمەس. ويتكەنى الداعى ۋاقىتتا تەڭگەنىڭ قۇنسىزدانۋى ءالى دە جالعاسۋى مۇمكىن. بىزدە تەڭگە قۇنسىزدانىپ، دوللار باعامى وسكەن سايىن، ىشكى نارىقتاعى باعا شارىقتاپ وسەدى. الايدا تەڭگە باعامى نىعايعان سىڭاي تانىتقان كەزدە، نەگە ەكەنى بەلگىسىز، نارىقتاعى باعا تومەندەمەيدى. مىسالعا تۇرعىن ءۇي باعاسىن، ازىق- تۇلىك باعاسىن الىپ قاراۋعا بولادى. ازىق- تۇلىك باعاسى الداعى ۋاقىتتا ءتۇسۋى مۇمكىن. ءبىراق ول جازدىڭ اياعى مەن كۇزدىڭ باسىندا بولادى. ياعني، بۇل جولعى تەڭگەنىڭ نىعايۋىمەن بايلانىستى بولمايدى. كۇزگە قاراي باۋ- باقشا ونىمدەرى مەن ەگىس داقىلدارىنىڭ ۇسىنىسى ارتادى. سايكەسىنشە بۇل باعانىڭ تۇسۋىنە اسەر ەتەدى. مۇنداي قۇبىلىس جىلدا قايتالانادى»، - دەدى ساراپشى.
كەشە ق ر پرەمەر- ءمينيسترىنىڭ ورىنباسارى - قارجى ءمينيسترى ەرۇلان جاماۋبايەۆ ا ق ش دوللارىنىڭ تەڭگەگە قاتىستى باعامى تومەندەۋىنە وراي يمپورت ارقىلى كەلەتىن تاۋارلار ارزاندايتىنىن ايتقان ەدى.
سونىمەن قاتار سوڭعى كۇندەرى قور نارىعىندا دوللار باعامى بىردەن 6 تەڭگەگە ارزانداپ، 1 دوللار 435 تەڭگەدەن ساۋدالانۋدا.
