قازاقستان ازاماتتارىنا شەنگەن ۆيزاسىن الۋ قيىنداي ما، قوسىمشا كونسۋلتاتسيا دەگەن نە؟
1-ناۋرىزدان باستاپ ەنگىزىلگەن قوسىمشا كونسۋلتاتسيا دەگەن نە؟ بۇل نەنى بىلدىرەدى؟ مۇنى تۋراگەنت، ۆيزا الۋعا كومەكتەسەتىن مامان روزا ەسەنقۇلوۆا ءتۇسىندىرىپ بەردى.
روزا ەسەنقۇلوۆانىڭ ايتۋىنشا، قازاقستاندىقتار ءۇشىن شەنگەن ۆيزاسىن الۋ ەرەجەسىنە قاتىستى ايتارلىقتاي وزگەرىس جوق، ۆيزا بەرەتىن ورتالىقتار 1-ناۋرىزدان باستاپ تەك قوسىمشا قۇجاتتار سۇراتۋى مۇمكىن. ال قازاقستاندىقتار بۇرىنعىداي كەرەك قۇجاتتاردى جيناپ، وتكىزە بەرەدى.
«ۆيزا بەرەتىن ءار ورتالىقتىڭ سايتىندا قانداي قۇجاتتار كەرەگى جونىندە جازىلعان. وسى قۇجاتتاردى وتكىزگەننەن كەيىن ەلشىلىك، كونسۋلدىق نەمەسە ۆيزا بەرەتىن ورتالىق قوسىمشا قۇجاتتار سۇراتۋى مۇمكىن. الايدا قازىر مۇنداي قيىندىق كورىپ جاتقان جوقپىز. ءوز كليەنتتەرىم شەنگەن ۆيزاسىن الىپ جاتىر، ءبىراق كەيبىر مەملەكەتتەردىڭ ۆيزا بەرەتىن ورتالىقتارىندا ورىن تولىپ قالعان، سول سەبەپتى جازىلۋ بويىنشا قيىندىق تۋىپ جاتىر، ءبىراق كوپشىلىگى ناۋرىزدىڭ العاشقى كۇندەرىنە بوس ورىن بار»، - دەيدى ول.
ونىڭ ايتۋىنشا، تۋريست بۇرىن قانداي دا ءبىر ەلدەن دەپورتاتسيالانباسا، شەنگەن ايماعىنداعى مەملەكەتتەردىڭ زاڭىن بۇزباسا، ەشقانداي پروبلەما بولماۋى ءتيىس. ال تۋريستەر ۆيزا الۋعا قۇجاتتارىن جوسپارلاپ وتىرعان ساپارىنان 3 اي بۇرىن تاپسىرا بەرگەنى ءجون.
«بىلتىر قازاندا استانادا جانە الماتىدا يتاليانىڭ ۆيزا بەرەتىن ورتالىقتارى جابىلىپ قالدى. بيىل بۇل پروبلەما شەشىلەدى دەپ ۇمىتتەنەمىز. شەنگەن ايماعىنا كىرەتىن ەلدەرگە بارعىسى كەلەتىندەر الدىن الا، 3 ايعا دەيىن قۇجاتتارىن وتكىزۋىنە بولادى. ەگەر تۋريست مامىر ايىندا شەنگەن ايماعىنا كىرەتىن ءبىر ەلگە بارۋدى جوسپارلاپ وتىرسا، قازىردەن تاپسىرا بەرۋىنە بولادى. قازىر ۆيزانى راسىمدەۋ شامامەن 15 كۇندەي ۋاقىتتى الادى. كەي مەملەكەتتەردىڭ كونسۋلدىقتار 5 اق كۇننىڭ ىشىندە ۆيزا بەرەدى. ال كەي مەملەكەتتەر ۆيزا بەرۋدى 20-25 كۇنگە دەيىن سوزىپ جىبەرەدى. بۇل - قالىپتى جۇمىس پروتسەسى. مۇنداي جاعداي بولىپ تۇرادى. كەيبىر ادامدار رەسمي جۇمىس ىستەمەسە دە، تالاپ ەتىلەتىن جۇمىس ورنىنان انىقتامانى قانداي دا ءبىر ج ك، ج ش س-دان قولدان جاساتىپ وتكىزەدى. سول سەبەپتى بۇل جۇمىس ورنىنان زەينەتاقى جارناسى تۇسپەيدى. سول سياقتى قوناق ءۇيدىڭ برونىن دە وتىرىك كورسەتەدى. مۇنداي كەزدە، ارينە، پروبلەما بولادى. وسىنداي جاعدايلاردىڭ الدىن الۋ ءۇشىن قوسىمشا كونسۋلتاتسيانى ەنگىزگەن شىعار دەپ ويلايمىن»، - دەيدى روزا ەسەنقۇلوۆا.
ەسكە سالايىق، بۇعان دەيىن قازاقستان ەۋرووداقتىڭ قارا تىزىمىنە ەنگەنىن، ەل ازاماتتارىنا شەنگەن ۆيزاسى بەرىلمەيتىنى تۋرالى اقپارات تاراعان ەدى. سىرتقى ىستەر مينيسترلىگى قازاقستاننىڭ ەشقانداي قارا تىزىمگە ەنبەگەنىن، تەك ۆيزا الاتىن كەزدە قوسىمشا كونسۋلتاتسيادان وتەتىنىن حابارلادى.
«ءبىز ەۋروپالىق تاراپتان رەسمي حابارلاما العان جوقپىز. الايدا جۇمىس تارتىبىندە بىزگە كەلەسىنى حابارلادى – 1-ناۋرىزدان باستاپ قازاقستان شەنگەن ۆيزاسىن بەرۋ كەزىندە بۇدان بىلاي ازاماتتارى ءۇشىن قوسىمشا كونسۋلتاتسيالار تالاپ ەتىلەتىن ەلدەردىڭ تىزبەسىندە بولادى. شەنگەن كەلىسىمىندە»قارا«نەمەسە»قىزىل«ءتىزىم دەگەن ۇعىم جوق، بۇل ادەتتەگى جۇمىس پروتسەسى تۋرالى ايتىلعان»، - دەدى ۆەدومستۆونىڭ رەسمي وكىلى.
سونىمەن قاتار، ايبەك سمادياروۆ قوسىمشا كونسۋلتاتسيالار باستالۋى مۇمكىن 40 ەل كىرەتىن ءتىزىم «قارا ءتىزىم» دەپ اتالمايتىنىن، ويتكەنى ولاردىڭ اراسىندا ەۋروپالىق وداقپەن تىعىز قارىم- قاتىناستارى بار جانە قاۋىپسىزدىك جاعىنان قولايلى ورتالىق ازيانىڭ بارلىق ەلى، ازەربايجان، ارمەنيا، ماروككو، تۋنيس، يوردانيا، ۆەتنام سياقتى ەلدەر كىرەتىنىن ايتتى.
اقپارات دەرەككوزى: Massaget.kz
