الداعى كۇندەرى اۋا رايى قانداي بولادى؟

استانا. قازاقپارات – «قازگيدرومەت» ر م ك سينوپتيكتەرى 28- اقپان – 1- ناۋرىزعا ارنالعان اۋا رايى بولجامىن ۇسىندى، - دەپ حابارلايدى قازاقپارات.

مەتەورولوگتار بولجامى بويىنشا، الداعى ءۇش تاۋلىكتە ەلىمىزدىڭ باسىم بولىگىندە اۋا رايىنا اتلانتيكالىق تسيكلون ىقپال ەتەدى. رەسپۋبليكانىڭ سولتۇستىك-باتىسىندا قار، كوكتايعاق، تۇمان، ەكپىندى جەل سوقسا، سولتۇستىگىندە بوران مەن قاتتى جاۋىن-شاشىن بولادى. تەك وڭتۇستىك-شىعىستا جوعارى اتموسفەرالىق قىسىم ءورىسىنىڭ اسەرىنەن اۋا رايى جاۋىن-شاشىنسىز بولادى.

«قازاقستان رەسپۋبليكاسىنىڭ باسىم بولىگىندە اۋا تەمپەراتۋراسى بىرتە-بىرتە كوتەرىلەدى. كۇندىز قازاقستان رەسپۋبليكاسىنىڭ سولتۇستىك جارتىسىندا تەرمومەترلەر 3-5 گرادۋسقا دەيىن، ال وڭتۇستىك جارتىسىندا اۋا تەمپەراتۋراسى 15-20 گرادۋسقا دەيىن جىلىنادى، تەك باتىستا جانە سولتۇستىك-باتىستا اۋا تەمپەراتۋراسى كۇندىز 0-10 گرادۋسقا دەيىن بىرتىندەپ تومەندەۋى مۇمكىن»، - دەلىنگەن حابارلامادا.