باتىس قازاقستانداعى تىكۇشاق اپاتى بويىنشا تەرگەۋ جالعاسىپ جاتىر – ت ج م

استانا. قازاقپارات - توتەنشە جاعدايلار مينيسترلىگىنىڭ باتىس قازاقستان وبلىسىنداعى بولىمشەلەرى وقيعا ورنىندا جۇمىس ىستەيتىن كوميسسيا مۇشەلەرى ءۇشىن جىلجىمالى جىلىتۋ پۋنكتىن ۇيىمداستىردى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

سونداي-اق، كوميسسيا مۇشەلەرىن وقيعا ورنىنا جەتكىزۋ ءۇشىن باتىس قازاقستان وبلىسى ت ج د- ءنىڭ «ترەكول» اۆتوموبيلى جۇمىلدىرىلدى. تىكۇشاقتىڭ سىنىقتارى مەن بولىكتەرىن ساقتاۋعا ارنالعان قويمالار جانە انگارلار ىزدەۋ، ولاردى جۇك اۆتوتەحنيكاسى مەن كرانداردى تارتا وتىرىپ جەتكىزۋدى قامتاماسىز ەتۋ ماسەلەلەرى پىسىقتالدى.

وقيعانىڭ ءمان-جايىن تەرگەۋمەن يندۋستريا جانە ينفراقۇرىلىمدىق دامۋ مينيسترلىگىنىڭ كولىكتەگى وقيعالار مەن ينتسيدەنتتەردى تەرگەۋ دەپارتامەنتىنىڭ قىزمەتكەرلەرى جانە ءىءى م كولىكتەگى پوليتسيا دەپارتامەنتىنىڭ قىزمەتكەرلەرى اينالىسىپ جاتىر. سونداي-اق، تىكۇشاقتى شىعارعان زاۋىت وكىلدەرى دە جۇمىلدىرىلعان.