تانىمال قازاقستاندىق تايلاندتا جول اپاتىنان قازا تاپتى
ونەرپازدىڭ ومىردەن وزعانىن قازاقستاننىڭ سىرتقى ىستەر مينيسترلىگى راستادى.
«تايلاند پوليتسياسىنىڭ مالىمەتىنە سايكەس، 24- اقپاندا پحۋكەت ارالىندا قازاقستان ازاماتى دارحان جۇنىسبەكوۆ قايتىس بولدى. جەرلەسىمىزدىڭ ولىمىنە موپەدپەن بولعان جول كولىك اپاتى سەبەپ بولدى. قازىر ءمايىتتى قازاقستانعا جەتكىزۋ ءۇشىن قاجەتتى قۇجاتتاردى رەسىمدەۋ بويىنشا جۇمىس جۇرگىزىلىپ جاتىر»، - دەدى سىرتقى ىستەر مينيسترلىگىنىڭ رەسمي وكىلى ايبەك سمادياروۆ.
وتانداسىمىز 31 جاستا بولاتىن.
رەپ ورىنداۋشى، ولەڭدەر اۆتورى ءارى ساۋند-پروديۋسەر دارحان جۇنىسبەكوۆ (Darkhan Juzz) 1991-جىلى 9- تامىزدا الماتى قالاسىندا دۇنيەگە كەلگەن.
ول ءان شىعارۋمەن 14 جاسىنان باستاپ اينالىسقان.
جەرلەسىمىزدىڭ شىعارماشىلىعى كلاسسيكالىق ترەپ، اكۋستيكالىق گيتارا جانە سەزىمتال ليريكانى بىرىكتىرەدى.
ءانشىنىڭ باقۇل بولۋىنا بايلانىستى مەملەكەتتىك كەڭەسشى ەرلان قارين كوڭىل ايتتى.
«قارالى حابار ەستىگەندە توبەمىزدەن جاي تۇسكەندەي بولدىق. دارىندى ءانشى Darkhan Juzz دارحان جۇنىسبەكوۆ ومىردەن ءوتىپتى. دارحان قازىرگى زامانعى قازاق مۋزىكاسىنىڭ جارقىن وكىلى ەدى. جارقىراپ جانىپ كەلە جاتقان جۇلدىزدىڭ مەزگىلسىز اعىپ تۇسكەنى قابىرعامىزدى قايىستىردى. ەلىنە بەرگەنىنەن بەرەرى كوپ، قازاق مۋزىكاسىن دامىتۋعا ۇلكەن ۇلەس قوساتىن ازامات بولاتىن. امال نەشىك، اجال ونى ارامىزدان ەرتە الىپ كەتتى. الدىڭ جارىق، توپىراعىڭ تورقا بولسىن، دارحان! سەنىڭ جارقىن بەينەڭ ونەرىڭدى قادىرلەيتىن جۇرتتىڭ جۇرەگىندە ماڭگى ساقتالادى!»، - دەپ جازدى ە. قارين Instagram پاراقشاسىندا.
