قازاقتار ەتتى ەشقاشان «بەشبارماق» دەمەگەن - انار فازىلجان
نەگىزگى اتاۋى قانداي؟ بۇل تۋرالى بەلگىلى عالىم، ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى انار فازىلجان «دۇرىس سويلەيىك» باعدارلاماسىنا بەرگەن سۇحباتىندا ايتتى.
«قازاقتىڭ ءداستۇرلى مادەنيەتىندە ۇلتتىق تاعامىمىزدىڭ اتى «ەت» دەپ اتالادى. ەت اسايىق، ەتتىڭ نانى، ەتتىڭ سورپاسى دەيدى. بەشبارماقتىڭ سورپاسى، بەشبارماقتىڭ نانى دەپ ايتپايدى»، - دەيدى ءتىلشى-عالىم.
ونىڭ ايتۋىنشا، «بەشبارماق» ءسوزىن ورىس ءتىلدى ورتادا كوپ جۇرەتىن قازاقتار قولدانادى. قازاقي ورتادا اتادان كەلە جاتقان اسىن ەشبىر قازاق «بەشبارماق» دەپ اتامايدى.
«العاش قازاق جەرىنە قونىس تەپكەن ورىس ۇلتىنىڭ وكىلدەرى قازاقتاردىڭ بەس ساۋساعىن مالىپ، ەتتى قولمەن جەپ جاتقانىن كورەدى. ولار ادەتتەگىدەي قاسىق سۇرايدى. سول كەزدە قازاقتار: «مىنا بەس ساۋساعىڭمەن جە»، - دەيدى. سودان كەيىن ولار بۇل اس ءتۇرىن «بەشبارماق»، «بەسبارماق» دەپ اتاپ كەتكەن. ەتيمولوگياسىن وسىلاي تۇسىندىرەتىن دە ادامدار بار. مەن سول ەتيمولوگيانى تۇسىندىرگەن كىسىلەردى قولدايمىن. ال قازاقتار ەشقاشان ءداستۇرلى تاعامىن، ياعني ەتتى «بەشبارماق» دەپ اتاماعان. سوندىقتان قازاقي ورتاعا كەلگەن كەزدە وسى ءسوزدى ايتپاعان ابزال. بۇل - ورىس مادەنيەتى تۇرعىسىنان ءبىزدىڭ ۇلتتىق اسىمىزعا بەرگەن اتاۋى»، - دەپ جاۋاپ بەردى انار فازىلجان.
