قازاقستاندىقتارعا قىزىلشا دەرتىن جۇقتىرۋ قاۋپى بار ەكەنى ەسكەرتىلدى
2023 -جىلدىڭ باسىندا قىزىلشا اۋرۋى جاقىن شەت ەلدەردە ۋكراينا، قىرعىزستان، رەسەي فەدەراتسياسىندا بايقالادى. الماتىلىق ەپيدەميولوگتار كوشى-قون فاكتورلارىن ەسكەرە وتىرىپ، قازاقستاندىقتارعا بۇل ۆيرۋستىق ينفەكسيانىڭ قاۋىپتىلىگىن ەسكەرتتى، دەپ حابارلايدى قازاقپارات ءتىلشىسى.
الماتى قالاسىنىڭ سانيتاريالىق- ەپيدەميولوگيالىق باقىلاۋ دەپارتامەنتىنىڭ مالىمەتىنشە، 2022 -جىلى مەگاپوليستە قىزىلشانىڭ زەرتحانالىق راستالعان جاعدايلارى تىركەلگەن جوق.
«قىزىلشا - اۋا- تامشىلى ينفەكسيالار توبىنا جاتاتىن جەدەل جۇقپالى ۆيرۋستىق اۋرۋ. جۇقپا ادامنان ادامعا اۋا ارقىلى جوتەلۋ، تۇشكىرۋ كەزىندە بەرىلەدى. اۋرۋ ادامنان ادامعا اۋا ارقىلى، تىنىس الۋ جولدارىنىڭ تامشىلارىمەن نەمەسە جۇقتىرعان ادامداردىڭ مۇرىنىڭ نەمەسە تاماعىنىڭ بولىنىسىمەن تىكەلەي بايلانىستا بولادى. قىزىلشا - ادامدار ءۇشىن اسا كونتاگيوزدى جۇقپالاردىڭ ءبىرى، ويتكەنى ينفەكسيا كوزىمەن جاقىن قارىم-قاتىناستا بولعاننان كەيىن قىزىلشاعا قارسى ۆاكسيناتسيالانباعان ادامداردىڭ %90 دان استامى اۋىرادى»، - دەيدى الماتى قالاسىنىڭ سانيتاريالىق- ەپيدەميولوگيالىق باقىلاۋ دەپارتامەنتىنىڭ باسشىسى اسەل قالىقوۆا.
ايتۋىنشا، قىزىلشا ۆيرۋسى اعزاعا تىنىس الۋ جولدارى ارقىلى ەنەدى جانە نەگىزىنەن جاسۋشالارىندا كوبەيەتىن شىرىشتى قاباتتا ءبىر جەرگە جينالادى. سودان كەيىن ۆيرۋس قان ارقىلى ءارتۇرلى مۇشەلەرگە تارالادى. ۆيرۋس بادامشا بەزدەرگە، باۋىرعا، وكپەگە، سونداي-اق سۇيەك كەمىگىنە اسەر ەتۋى مۇمكىن. اۋرۋدىڭ العاشقى بەلگىلەرى- جوتەل، دەنە تەمپەراتۋراسىنىڭ كوتەرىلۋى، كوزدەن جاس اعۋ، جارىققا سەزىمتالدىق جانە بورتپە، ول باستاپقىدا بەتتە، قۇلاقتىڭ ارتىندا، سودان كەيىن بۇكىل دەنەدە پايدا بولادى. اۋرۋدىڭ اۋىر اعىمىندا اسقىنۋلار داميدى، مىسالى، ورتاڭعى قۇلاقتىڭ، وكپەنىڭ، كەڭىردەكتىڭ، برونحتىڭ قابىنۋى، سونداي-اق ميدىڭ قابىنۋى بولۋى مۇمكىن. ناۋقاس كەز كەلگەن قابىنۋ مەن اسقىنۋدان ءولۋى مۇمكىن.
«كوبىنەسە اسقىنۋلار بەس جاسقا دەيىنگى بالالاردا نەمەسە 30 جاستان اسقان ەرەسەكتەردە داميدى. ەڭ اۋىر اسقىنۋلارعا سوقىرلىق، ەنتسەفاليت (ميدىڭ ىسىنۋىنە اكەلەتىن جۇقپا)، اۋىر ديارەيا جانە ونىمەن بايلانىستى دەگيدراتاتسيا، قۇلاق جۇقپالارى (وتيت) جانە پنيەۆمونيا سياقتى اۋىر تىنىس جولدارىنىڭ جۇقپالارى جاتادى»، - دەيدى ەپيدەميولوگ.
الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى قىزىلشانى جۇقتىرۋدان، سونداي-اق ولاردىڭ اسقىنۋىنان ساقتاندىراتىن جالعىز ءتيىمدى قۇرال تەك ۆاكسيناتسيا ەكەندىگىن ەسكە سالادى.
قىزىلشاعا قارسى ۆاكسيناتسيا 1 جاستا جانە 6 جاستا 2 رەت جاسالادى، بۇل ۆاكسيناتسيالانعان ادامداردا ءومىر بويى بولاتىن ۆاكسيناتسيادان كەيىنگى يممۋنيتەتتى دامىتۋعا مۇمكىندىك بەرەدى. قىزىلشاعا قارسى ۆاكسينانىڭ ءاربىر الىنعان دوزاسى بالانىڭ يممۋنيتەتىن كۇشەيتەدى.
ەكپەلەردى جۇرگىزۋ ءۇشىن د د ۇ سەرتيفيكاتتاعان جانە قازاقستان رەسپۋبليكاسىندا تىركەلگەن قىزىلشاعا، قىزامىققا، ەپيدەميالىق پاروتيتكە قارسى ارالاس ۆاكسينا قولدانىلادى. ۆاكسيناتسيا تۇرعىلىقتى جەرى بويىنشا قالانىڭ ەمحانالارىنىڭ بارلىق ەگۋ كابينەتتەرىندە تەگىن جۇرگىزىلەدى.
اۋرۋدىڭ بەلگىلەرى پايدا بولعان كەزدە ەپيدەميولوگتار ءوزىن-ءوزى ەمدەمەۋدى، دارىگەردى ۇيگە شاقىرۋدى جانە دارىگەردىڭ تاعايىنداۋى بويىنشا ەمدەۋدى ۇسىنادى.
سونداي- اق ۇيدە بولۋ قاجەت. جۇمىس جانە قوعامدىق ورىندارعا بارماۋى ءتيىس. سونىمەن قاتار، اۋىرعان بالالاردى مەكتەپكە، بالاباقشاعا جىبەرمەگەن ابزال.
اۆتور
الما مۇقانوۆا
