قورعانىس ءمينيسترى اقتوبە گارنيزونىندا بولدى
باتىس وڭىرگە جۇمىس ساپارى بارىسىندا گەنەرال- پولكوۆنيك رۋسلان جاقسىلىقوۆ اسكەري ينفراقۇرىلىم نىساندارىن تەكسەردى.
اقتوبە وبلىسىنىڭ اكىمى ەرالى توعجانوۆپەن بىرگە مينيستر ەكى مارتە كەڭەس وداعىنىڭ باتىرى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىنا جانە وبلىس ورتالىعىنىڭ باسقا دا ءبىرقاتار مەكەمەلەرىنە باردى.
قورعانىس ۆەدومستۆوسىنىڭ باسشىسى اسكەري ءبىلىم ورداسىنىڭ وقۋ- ماتەريالدىق بازاسىمەن تانىسىپ، پروفەسسورلىق- وقىتۋشىلىق، ۇشقىشتار- نۇسقاۋشىلار جانە ينجەنەرلىك- تەحنيكالىق قۇرامىمەن كەزدەستى.
گەنەرال- پولكوۆنيك رۋسلان جاقسىلىقوۆ كۋرسانتتاردىڭ تاجىريبە ۇشۋلارىن ورىندايتىن دالالىق اۋەايلاعىنا باردى. اقتوبە قالاسىنىڭ اسكەري گوسپيتالىنە بارعان كەزدە گەنەرال- پولكوۆنيك رۋسلان جاقسىلىقوۆ ەمدەۋ مەكەمەسىنىڭ جابدىقتالۋىمەن جانە اسكەري قىزمەتشىلەرگە ارنالعان مەديتسينالىق كومەكتى ۇيىمداستىرۋ جۇيەسىمەن تانىستى.
اقتوبە وبلىسىنىڭ اكىمى ەرالى توعجانوۆ جالپى تاجىريبەدە اسكەري دارىگەرلەر دايىندايتىن اۋە قورعانىسى كۇشتەرىنىڭ اسكەري ينستيتۋتى مەن باتىس قازاقستان مەملەكەتتىك مەديتسينا ۋنيۆەرسيتەتىنىڭ ىنتىماقتاستىعىنا وڭ باعا بەردى.
«قاۋىپسىز ەل» ۇلتتىق جوباسىنىڭ ءىس- شارالارىن ورىنداۋ، وق- دارىلەردى قاۋىپسىز ساقتاۋدى قامتاماسىز ەتۋ جانە قويمالاردىڭ قۇرىلىسىنا قاتىستى مەملەكەت باسشىسىنىڭ تاپسىرمالارىن ىسكە اسىرۋعا ەرەكشە نازار اۋدارىلىپ وتىر.
جۇمىس ساپارىنىڭ سوڭىندا قورعانىس ۆەدومستۆوسىنىڭ باسشىسى قويىلعان وقۋ- جاۋىنگەرلىك مىندەتتەردى تولىق جانە ساپالى ورىنداۋعا، قويمالاردى سالۋ بارىسىندا تەحنيكالىق رەگلامەنتتەردى ساقتاۋعا، اسكەري وبەكتىلەردىڭ ديۆەرسياعا جانە ورتكە قارسى قاۋىپسىزدىگىن قامتاماسىز ەتۋگە باعىتتالعان ءبىرقاتار تاپسىرمالار بەردى.
