پرەزيدەنت ۇكىمەتكە اۋىل شارۋاشىلىعىنىڭ جاي-كۇيىنە مۇقيات تالداۋ جۇرگىزۋدى تاپسىردى

استانا. قازاقپارات - مەملەكەت باسشىسى قاسىم-جومارت توقايەۆ اگرارلىق بيزنەس وكىلدەرىمەن كەزدەستى، دەپ حابارلايدى اقوردا.

اقوردادا قاسىم-جومارت توقايەۆ اگروونەركاسىپ كەشەنى سالاسىنداعى بيزنەس وكىلدەرىمەن كەزدەسۋ وتكىزدى. جيىندا اۋىل شارۋاشىلىعىن دامىتۋدىڭ تۇيتكىلدى ماسەلەلەرى مەن پەرسپەكتيۆالارى تالقىلاندى.

كەزدەسۋدە پرەزيدەنت بىلتىر اۋىل شارۋاشىلىعى سالاسىنداعى ءوسىم 9,1 پايىزدى قۇراعانىن اتاپ ءوتتى. ونىڭ ايتۋىنشا، ەگىن بىتىك شىعىپ، ديقاندار 23 ميلليون تونناعا جۋىق استىق جينادى. سونداي-اق ەگىس القاپتارىن ءارتاراپتاندىرۋ جانە مول ءونىم بەرەتىن داقىلدار وسىرۋگە كوشۋ جۇمىستارى جوسپارلى تۇردە جۇرگىزىلىپ كەلەدى. مايلى داقىلدار وسىرەتىن ەگىس كولەمى شامامەن 4 ەسە ۇلعايىپ، 3,5 ميلليون گەكتارعا جەتتى. مەملەكەت باسشىسىنىڭ ايتۋىنشا، بۇل وڭ ناتيجەگە كۇندەلىكتى ەسەلى ەڭبەگىمەن ەلىمىزدىڭ ازىق-تۇلىك قاۋىپسىزدىگىن نىعايتۋعا زور ۇلەس قوسىپ جۇرگەن اۋىل ازاماتتارىنىڭ ارقاسىندا جەتىپ وتىرمىز.

سونىمەن قاتار پرەزيدەنت اگرارلىق سالاداعى ءبىرقاتار تۇيتكىلدى ماسەلەنى اشىق تالقىلاۋ اياسىندا قاراستىرۋدى ۇسىندى.

كەزدەسۋ بارىسىندا اۋىل شارۋاشىلىعى ءمينيسترى ەربول قاراشوكەيەۆ، كوپسالالى «رودينا» كاسىپورنىنىڭ ديرەكتورى يۆان ساۋەر، «زەنچەنكو جانە ك» شارۋا سەرىكتەستىگىنىڭ ديرەكتورى گەنناديي زەنچەنكو، «مايلى داقىلداردىڭ تاجىريبەلىك شارۋاشىلىعى» ج ش س- ءنىڭ ديرەكتورى فاريد ابىتايەۆ ءسوز سويلەدى.

ولار ءوندىرىستى ءارتاراپتاندىرۋ، شيكىزاتتى تەرەڭ وڭدەۋ جانە جاڭا اگروونىمدەردى ءوندىرۋ، قانت سالاسىن دامىتۋ، تۇقىم شارۋاشىلىعى، مال شارۋاشىلىعى جانە ۆەتەريناريا، سونداي-اق ىشكى نارىقتى قامتاماسىز ەتىپ، ەكسپورتتىق الەۋەتتى ارتتىرۋ ماسەلەلەرىن قوزعادى.

جيىن بارىسىندا اگروونەركاسىپ كەشەنىن دامىتۋعا قاراجات ءبولۋ مەن پايدالانۋدىڭ تيىمدىلىگى، جەر جانە سۋ رەسۋرستارىن ءادىل ءبولۋ ماسەلەلەرىنە دە ەرەكشە نازار اۋدارىلدى.

اگرارلىق بيزنەس وكىلدەرى اۋىلداردا ءومىر ءسۇرۋ ساپاسىن ارتتىرۋ، جول-كولىك جانە الەۋمەتتىك ينفراقۇرىلىمنىڭ، ونىڭ ىشىندە مەكتەپتەر مەن بالاباقشالاردىڭ جاعدايىن جاقسارتۋ، سونداي-اق كادر دايارلاۋ قاجەتتىگىن اتاپ ءوتتى.

پرەزيدەنت باياندامالاردى تىڭداپ، ۇكىمەتكە ايتىلعان بارلىق ۇسىنىستى نازارعا الۋدى جانە كاسىپكەرلەردىڭ پىكىرىن ەسكەرە وتىرىپ، اۋىل شارۋاشىلىعىنىڭ جاي- كۇيىنە مۇقيات تالداۋ جۇرگىزۋدى تاپسىردى. مەملەكەت باسشىسىنىڭ پىكىرىنشە، اگروونەركاسىپ كەشەنى وكىلدەرىمەن مۇنداي كەزدەسۋلەردى تۇراقتى تۇردە وتكىزىپ تۇرۋ كەرەك. سەبەبى اۋىل شارۋاشىلىعىنداعى ماسەلەلەردىڭ شەشىمىن تابۋى ازاماتتاردىڭ ءومىر ءسۇرۋ ساپاسىنا عانا ەمەس، سونىمەن قاتار ەلدىڭ ازىق-تۇلىك قاۋىپسىزدىگىنە دە ىقپال ەتەدى.