باقىتگۇل حامەنوۆا ءىسى: باسقارما باسشىسى مەن ج ش س ديرەكتورىنىڭ جازاسى جەڭىلدەدى

اتىراۋ. قازاقپارات - ەكس-شەنەۋنىك باقىتگۇل حامەنوۆامەن بىرگە تەرگەلگەن باسقارما باسشىسى مەن سەرىكتەستىك ديرەكتورىنا قاتىستى سوت ۇكىمى وزگەردى.

ولارعا تاعايىندالعان بۇرىنعى جازا مەرزىمى تومەندەتىلدى، دەپ حابارلايدى قازاقپارات ءتىلشىسى.

اتىراۋ وبلىستىق سوتىنىڭ باسپا ءسوز قىزمەتىنەن ءمالىم ەتكەندەي، وبلىس اكىمىنىڭ بۇرىنعى ورىنباسارى ب. حامەنوۆا جانە وبلىستىق مادەنيەت، تىلدەردى دامىتۋ جانە ارحيۆ ءىسى باسقارماسىنىڭ بۇرىنعى باسشىسى ا. رىسقاليەۆكە، «بالقىتۋ» ج ش س ديرەكتورى ۋ. اداموۆقا قاتىستى قىلمىستىق ءىس اتىراۋ وبلىستىق سوتىنىڭ اپەللياتسيالىق القاسىندا قايتا قارالدى.

قىلمىستىق ىستەر جونىندەگى سوت القاسىنىڭ شەشىمىمەن ا. رىسقاليەۆتىڭ ارەكەتى ق ر قىلمىستىق كودەكسىنىڭ 28-باپتىڭ 5-بولىگىنە، 366-بابىنىڭ 3-بولىگىنىڭ 2-تارماعىنا پارا الۋعا جاردەمدەسۋ رەتىندە قايتا دارەجەلەندى.

«اسىلبەك رىسقاليەۆتىڭ جاۋاپكەرشىلىگىن ەداۋىر جەڭىلدەتەتىن جاعداي رەتىندە قىلمىستىڭ اشىلۋىنا ىقپال ەتكەنى، قىلمىستىڭ باسقا دا قاتىسۋشىلارىن اشكەرەلەۋى، اسىراۋىندا 4 جاس بالاسى بارى ەسكەرىلدى. وعان تاعايىندالعان جازا قىلمىستىق كودەكستىڭ 55-بابىنىڭ 4-بولىگىمەن 2 جىلعا دەيىن باس بوستاندىعىنان ايىرۋعا اۋىستىرىلدى. ۋ. اداموۆتىڭ ەگدە جاسى (65 جاستا)، اسىراۋىندا ءتورت جانە كامەلەتكە تولماعان 3 بالاسى بار، كامەلەتكە تولعان بالا كەزىنەن مۇگەدەك ەكى بالانىڭ بار ەكەنى ەسكەرىلىپ، جازا مەرزىمى وزگەرەدى. ول ق ر قىلمىستىق كودەكسى 55-بابىنىڭ 4-بولىگىمەن 1 جىل 6 ايعا دەيىن باس بوستاندىعىنان ايىرىلادى»، - دەپ حابارلادى وبلىستىق سوتتىڭ باسپا ءسوز قىزمەتى.

ال جەتى جىلعا باس بوستاندىعىنان ايىرىلعان باقىتگۇل حامەنوۆانىڭ جازاسى سول كۇيىندە قالدى.

ەسكە سالا كەتەلىك، بۇدان بۇرىن حامەنوۆانىڭ ىسىنە قاتىسى بار باسقارما باسشىسى – 7، سەرىكتەستىك ديرەكتورى 4 جىلعا سوتتالعانىن جازعان ەدىك.

سوت ۇكىمى بىلتىرعى 15- قاراشادا شىققان.