لوندوندا اعىلشىندار قازاق ءتىلىن ۇيرەنىپ ءجۇر

لوندون. قازاقپارات - لوندوندا اعىلشىندار قازاقشا ۇيرەنىپ جاتىر. ولاردىڭ انا تىلىمىزگە دەگەن ماحابباتتىن سۇيىكتى ءانشىسى ديماش قۇدايبەرگەن وياتقان.

سالەمدەسۋدەن باستاپ، قوشتاسۋعا دەيىن، ءتىپتى، قازاق تىلىندە ءان ايتۋدى دا بىلەدى، دەپ حابارلايدى قازاقپارات ءتىلشىسى.

21-اقپان - حالىقارالىق انا ءتىلى كۇنى قارساڭىندا قازاقستاننىڭ ۇلى بريتانياداعى ەلشىلىگىنىڭ ۇيىمداستىرۋىمەن اسەرلى كەش ءوتتى.

وعان «ديماش قۇدايبەرگەن. ۇلى بريتانيا جانە دۇنيە ءجۇزى» فان-كلۋبىنىڭ بەلسەندى مۇشەلەرى قاتىستى.

بارلىعىن دالا داۋسىمەن دۇنيەنى ءدۇر سىلكىندىرگەن ءدۇلدۇل ءانشىمىزدىڭ ونەرىنە دەگەن ماحاببات بىرىكتىرەدى.

ارالارىندا قازاقستانعا ساياحاتتاعاندار كوپ. باي مادەنيەتىمىزدەن، سالت-داستۇرلەرىمىزدەن جانە ۇلتتىق تاعامدارىمىزدان دا جاقسى حاباردار.

«مەن نەگىزى بالا كۇتىمى بويىنشا كوللەدج ستۋدەنتتەرىنە لەكسيا وقيمىن. فان-كلۋبىمىزدى 2022 -جىلدىڭ تامىزىندا اشتىق، بار بولعانى 6 اي ءوتتى. كۇنى كەشە 1000-مۇشەمىز قاتارىمىزعا قوسىلىپ، قاتتى قۋاندىق»، - دەيدى فان-كلۋب ءتورايىمى دجيلل بيچەم.

«قۇلاعىمداعى سىرعا مەن موينىمداعى القانى الماتىعا ديماشتىڭ كونسەرتىنە بارعاندا ساتىپ الدىم. تەرەزا قۇربىم ەكەۋمىز كولگە باردىق، شاتقالداردى دا كوردىك. وتە تاماشا ۋاقىت وتكىزدىك»، - دەيدى فان-كلۋب مۇشەسى لۋاننا كيپينگ.

ۇلى اباي تىلىنە دەگەن قىزىعۋشىلىعىن اعىلشىندار عانا ەمەس، ۋەلس، پورتۋگال، پاكىستان، ەۆرەيلەر دە تانىتۋدا. ۇستازى - ون جاسار قازاق قىزى كاۋسار عالىمجان قىزى.

ول باستاۋىش مەكتەپتىڭ وقۋشىسى. اتا-اناسىمەن لوندوندا ۋاقىتشا تۇرىپ جاتىر.

قوس تىلگە جەتىك ءبۇلدىرشىن بۇعان دەيىن قازاقستاندىق «بالاپان» تەلەارناسىندا بالالارعا اعىلشىنشا ۇيرەتىپ، تاجىريبە جيناقتاعان.

ەندى مىنە ۇلتتىق كيىم كيىپ، بريتانيالىقتارعا قازاق ءتىلىنىڭ عاجاپتىعىن تانىتۋدا.

«مەن قازاقشا سالەمدەسىپ، جاعداي سۇراي الامىن. ءوزىمدى تانىستىرا الامىن»، - دەيدى ءتىل ۇيرەنۋشى كريستينا برەين.

«قازاقستاننىڭ مادەنيەتىنە، تىلىنە ءتانتىمىن. حالقى دا كەرەمەت. ءبىز وسى فان-كلۋبقا مۇشە بولعانىمىزعا قۋانامىز. ديماش بارلىعىمىزدى ۇلكەن شاڭىراق استىندا بىرىكتىردى. ءبىز ۇيىعان ءبىر وتباسىندايمىز»، - دەيدى ونىڭ قۇربىسى تەرەزا نيەۆەس.

بۇل كۇنى حالىقارالىق فان-كلۋب مۇشەلەرى قايىرىمدىلىق شاراسىن دا وتكىزدى.

قازاقستانداعى «SOS بالالار اۋىلى» ۇكىمەتتىك ەمەس قوعامدىق ۇيىمىنا قاراجات جيناپ بەردى.

ول اقشاعا جەتىم نەمەسە اتا-اناسىنىڭ قاراۋىنسىز جانە قامقورلىعىنسىز قالعان بالالار مۋزىكالىق اسپاپتار ساتىپ الا الادى. قازاقتىڭ ءداستۇرلى دومبىراسىندا ويناپ ۇيرەنۋگە مۇمكىندىك الادى.

«ءبىز ازىرگە 1 ميلليون تەڭگە جينادىق. ناۋقان ءالى دە جالعاسىپ جاتىر. بۇل سوما ەسەلەنە تۇسەدى دەپ سەنەمىز. بولاشاققا قۇرعان ءبىرقاتار جوسپارلارىمىز بار. الداعى ۋاقىتتا «SOS بالالار اۋىلىنىڭ» تاربيەلەنۋشىلەرىنە ونلاين پلاتفورما ارقىلى اعىلشىن ءتىلىن ۇيرەتكىمىز كەلەدى. سونداي- اق سول اۋىلعا بارىپ، وقىتاتىن مۇعالىمدەرگە اقشا تولەۋ دە ويىمىزدا بار»، - دەيدى فان-كلۋب ءتورايىمى دجيلل بيچەم.

حالىقارالىق انا ءتىلى كۇنى قارساڭىندا وتكەن كەشتە ءتۇرلى ۇلت وكىلدەرى ءوز تىلدەرىندە ولەڭدەر وقىدى.

ديماشتىڭ شىعارماشىلىعىنا قاتىستى تانىمدىق سۇراقتارعا جاۋاپ بەردى.

ەستەلىك سىيلىقتارعا يە بولدى. ونەر جۇلدىزىنىڭ رەپەرتۋارىنداعى قازاقشا اندەردى ورىندادى.

ديماش قۇدايبەرگەننىڭ بەس جىلعا جۋىق ۋاقىت بۇرىن لوندوندا كونسەرت بەرگەنى بەلگىلى. جانكۇيەرلەرى سۇيىكتى ءانشىسىن ۇلى بريتانياعا تاعى شاقىردى.