مارقاكول اۋدانىن قالپىنا كەلتىرۋ ءتيىمسىز - مينيسترلىك
«تالداۋ كورسەتكەندەي، حالىق سانى از مارقاكول اۋدانىن قالپىنا كەلتىرۋ مەملەكەتتىك قىزمەتشىلەردى ۇستاۋعا جۇمسالاتىن شىعىنداردى قارجىلاندىرا وتىرىپ، ولاردىڭ سانىن ۇلعايتۋدى تالاپ ەتەدى. تەك ءبىر اۋداندا دەربەس 20 مەملەكەتتىك ورگان (9 اۋداندىق ءبولىم، 11 رەسپۋبليكالىق جانە وبلىستىق باعىنىستاعى ءبولىم) قۇرۋ قاجەت بولادى. بۇل قوسىمشا 112 مەملەكەتتىك قىزمەتشى دەگەن ءسوز. بىرىككەن كۇرشىم اۋدانىنىڭ (بۇرىنعى مارقاكول جانە كۇرشىم اۋداندارى) حالىق سانى 23,5 مىڭ ادامدى قۇرايدى جانە 1997 -جىلدان باستاپ 25,4 مىڭ ادامعا نەمەسە %52,8- عا قىسقاردى. بۇرىنعى مارقاكول اۋدانىنىڭ اۋىلدارىندا 8 725 ادام تۇرادى.
مارقاكول اۋدانى قالپىنا كەلتىرىلگەن جاعدايدا، اكىمشىلىك عيماراتتار سالۋعا، مەملەكەتتىك مەكەمەلەردىڭ ماتەريالدىق- تەحنيكالىق بازاسىن ۇستاۋعا جانە نىعايتۋعا الدىن الا ەسەپتەۋلەر بويىنشا شامامەن 15 ميلليارد تەڭگە بيۋدجەت قاراجاتى تالاپ ەتىلەدى.
مەملەكەتتىك قۇرىلىمداردى قۇرۋعا جانە ۇستاۋعا جۇمسالاتىن ەلەۋلى شىعىندار، حالىق سانىنىڭ قىسقارۋىنىڭ ساقتالىپ وتىرعان ءۇردىسى كەزىندە تاراتىلعان مارقاكول اۋدانىن قالپىنا كەلتىرۋ ەكونوميكالىق تۇرعىدان ءتيىمسىز دەپ پايىمدالادى»، - دەپ جازادى باۋىرجان وماربەكوۆ.
مۇنداي پايىمدى 2020-2022 -جىلدارى جۇمىس ىستەگەن كوميسسيا شىعارعان كورىنەدى.
«2020-2022 -جىلدارى قۇرامىندا ورتالىق مەملەكەتتىك ورگاندار، وبلىس اكىمدىگى جانە جۇرتشىلىق باسشىلارى بار كوميسسيا شەكارا ماڭىنداعى وڭىرلەردەگى اعىمداعى جاعدايدى زەردەلەدى.
اۋدانداردى قۇرۋعا جۇمسالعان شىعىنداردى، حالىق سانىنىڭ ازدىعىن جانە اۋماقتاردىڭ ينفراقۇرىلىمىن ودان ءارى دامىتۋ، كاسىپكەرلىكتى قولداۋ جانە ناتيجەلى جۇمىسپەن قامتۋدى قامتاماسىز ەتۋ بويىنشا قابىلدانىپ جاتقان شارالاردى ەسكەرە وتىرىپ، كوميسسيا اۋدانداردى قالپىنا كەلتىرۋدىڭ ەكونوميكالىق تيىمسىزدىگىن اتاپ ءوتتى»، - دەلىنگەن رەسمي جاۋاپتا.
