قىستىڭ سوڭعى كۇندەرى اۋا رايى قانداي بولادى؟

استانا. قازاقپارات - سينوپتيكتەر 21-23- اقپانعا ارنالعان اۋا رايى بولجامىن جاريالادى، - دەپ حابارلايدى قازاقپارات.

الداعى كۇندەرى ەل اۋا رايىنا اتلانتيكالىق تسيكلون ىقپال ەتەدى. سوندىقتان رەسپۋبليكانىڭ سولتۇستىك جارتىسىندا قار مەن جاڭبىر تۇرىندە جاۋىن-شاشىن جاۋىپ، كوكتايعاق بولىپ، تۇمان ءتۇسىپ، جەل سوعادى. كۇندىز وڭتۇستىكتە نايزاعاي كۇتىلەدى.

«رەسپۋبليكانىڭ باتىسىندا اۋا تەمپەراتۋراسى تۇندە 0-8 گرادۋستان 7-15 گرادۋسقا دەيىن تومەندەيدى، ەلىمىزدىڭ سولتۇستىك-باتىسىندا، سولتۇستىگىندە، شىعىسىندا 5-15 گرادۋس ايازدان 0-8 گرادۋس ايازعا دەيىن جوعارىلايدى، ورتالىعىندا 2-15 گرادۋس ايازدان 3 گرادۋس اياز، 3 گرادۋس جىلىعا دەيىن اۋىتقيدى، رەسپۋبليكانىڭ وڭتۇستىك جارتىسىندا تۇندە 3 گرادۋس اياز، 3 گرادۋس جىلى اۋا رايى كۇتىلەدى»، - دەلىنگەن حابارلامادا.