سادىر جاپاروۆ قىرعىز ەلىنىڭ بۇرىنعى پرەزيدەنتتەرىنىڭ باسىن قوستى
قىرعىزستان باسشىسى سادىر جاپاروۆ ەلدىڭ بۇرىنعى پرەزيدەنتتەرىمەن كەزدەسۋ قورىتىندىسى جونىندە الەۋمەتتىك جەلىدەگى رەسمي پاراقشاسىندا جازدى، دەپ حابارلايدى قازاقپارات «كابار» اگەنتتىگىنە سىلتەمە جاساپ.
«اۋىزبىرشىلىكتىڭ جوقتىعى مەن بيلىككە دەگەن بىتپەيتىن تالاستىڭ سالدارىنان ءبىز وتكەن جىلدارداعى يمپەريادان ايرىلدىق. بۇگىن ورتالىق ازيانىڭ ءبىر بۇرىشىندا قالىپ بارا جاتقاندايمىز. قازىر سولتۇستىك پەن وڭتۇستىككە، 7 وبلىسقا ءبولىنىپ، اركىمنىڭ «كورپەنى وزىنە قاراي تارتۋعا» تىرىسۋىن بىلاي قويىپ، ەكس-پرەزيدەنتتەردىڭ جاقتاۋشىلارى بولىپ ءبولىنۋ بار. وكىنىشكە قاراي، قىرعىز ەلى جىك-جىككە ءبولىنىپ كەتتى. ەگەر مەملەكەتىمىزدىڭ بولاشاعىن ويلاساق، وندا بارلىعىن بىرىكتىرۋىمىز قاجەت. (كوشباسشىلار بىرىكپەي، ولاردى جاقتاۋشىلار بىرىكپەيدى). حالىق كەزىندە سايلاعان بۇرىنعى پرەزيدەنتتەردى جيناۋ تۋرالى وي كوپتەن مازالايتىن. مىنە، ويىمدى ىسكە اسىرا الدىم. حالقىمىزدىڭ سالتى بويىنشا داستارحان باسىنا جينادىم. ولار ەلدىڭ بولاشاعى ءۇشىن وتكەننىڭ ءبارىن ۇمىتىپ، مەنىڭ جۇدىرىقتاي جۇمىلۋ تۋرالى باستاماما قولداۋ ءبىلدىردى»، - دەپ جازعان سادىر جاپاروۆ.
قىرعىز باسشىسىنىڭ ايتۋىنشا، ەكس-پرەزيدەنتتەر وكپەلەرىن ايتىپ، ءوز قاتەلىكتەرىن دە مويىنداعان.
«ەڭ باستىسى، ولار ءبىر-ءبىرىن كەشىرە الدى. مەنىڭ ماقساتىم وسى ەدى. ءبىراق، ەڭ باستى ارمانىم - بارلىق بۇرىنعى پرەزيدەنتتەردىڭ جاقتاستارى، بارلىق جەتى وبلىستىڭ حالقى ساياساتتان الشاقتاپ، دامۋ مەن ەكونوميكالىق وركەندەۋدىڭ ءبىر باعىتىن ۇستانسا»، - دەپ ارمانىن جەتكىزگەن قىرعىزستان پرەزيدەنتى ەل حالقىن بىرلىككە شاقىرادى. وتكەنگە كەشىرىممەن قاراپ، قارا باستىڭ قامىن ەمەس، مەملەكەتتىڭ بولاشاعىن ويلاۋعا ۇندەيدى.
