تۋرنيككە تارتىلۋدان گراند- فينالىندا الەمدىك رەكورد ورناۋى مۇمكىن - نۇرلان قويانبايەۆپەن سۇحبات
2022 -جىلى ەلىمىزدىڭ 20 قالاسىندا وتكەن تۋرنير ناتيجەسىندە 180 ادام ۇزدىك اتانسا، سونىڭ 170 كە جۋىعى اقتىق سايىستا باق سىنايدى.
ەلىمىزدە العاش رەت ءوتىپ جاتقان بىرەگەي سپورتتىق جوبا جونىندە يدەيا اۆتورى، تانىمال پروديۋسەر نۇرلان قويانبايەۆ قازاقپارات اگەنتتىگىنە سۇحبات بەردى.
− نۇرلان نۇعمان ۇلى، TARTYL FEST يدەياسى قالاي تۋدى؟ بۇل «Dara» دارىندىلاردى قولداۋ قورىنىڭ العاشقى جوباسى عوي؟
− ءيا، 2022 -جىلى مەملەكەت باسشىسىنىڭ قولداۋىمەن «دارا» دارىندىلاردى قولداۋ قورى قۇرىلدى. ويتكەنى، كوپتەگەن ادامدار ءوزىنىڭ ناقتى قابىلەت، ارتىقشىلىقتارىن بىلە بەرمەيدى. «دارا» دارىندىلاردى قولداۋ قورىنىڭ مىندەتى - وسىنداي تۇلعالاردى تابۋ جانە ولاردىڭ تالانتىن قولداۋعا كومەكتەسەتىن ناسيحات جۇمىستارىن، قۇرالداردى بارىنشا ارتتىرۋ. قوردىڭ العاشقى جوباسى - TARTYL FEST تۋرنيككە تارتىلۋعا باعىتتالعان، ويتكەنى بۇل ەڭ قاراپايىم ءارى قولجەتىمدى جاتتىعۋدىڭ ءتۇرى. شىندىعىندا، تۋرنيككە تارتىلۋ ەرەكشە جاعدايدى قاجەت ەتەتىن سپورت ەمەس. ونىمەن ەلىمىزدىڭ بارلىق جەرىندە دە، ەڭ شالعاي دەگەن ەلدى مەكەندەرىندە دە ەركىن اينالىسۋعا بولادى. دەمەك، ءبىز باسقا «الەۋمەتتىك ليفتتەرگە» قول جەتكىزە المايتىن قازاقستاندىقتاردى بارىنشا قامتي وتىرىپ، سولاردىڭ اراسىنان ەڭ لايىقتىسىن، ەڭ مىقتىسىن تابا الامىز.
قور وسى جوبا ارقىلى ەلىمىزدىڭ 20 ءوڭىرىن ارالاپ، ىرىكتەۋ تۋرىن وتكىزدى. شىنىمدى ايتايىن، باسىندا قاتىسۋشىلار تابىلماي قالماس پا ەكەن، دەگەن قورقىنىش تا بولدى. ءداستۇرلى فۋتبول ەمەس، بوكس تا ەمەس. ءبىراق تۋرنيككە تارتىلۋ ءۇشىن الماتىدا تاڭعى ساعات 8 دە مىڭ جارىم ادامنىڭ كەزەكتە تۇرعانى ەسىمدە. سوندا باستامامىز دۇرىس ەكەنىن، قاتىساتىن قاراپايىم سپورتشىلاردىڭ دا سانى كوپ ەكەنىن تۇسىندىك. وسىلايشا، 20 قالادان 9 جەڭىمپاز ىرىكتەلىپ، 180 ادام گراند- فينالعا جولداما الدى. ونىڭ 170 كە جۋىعى ناقتى قاتىساتىن بولدى.
تۋرنيككە تارتىلۋدىڭ بارلىق ەرەجەسىن، جاس پەن سالماق ساناتتارىن كوشە سپورتىمەن كاسىبي تۇردە اينالىساتىن سپورتشى، باپكەر ايتىم جاقىپوۆ دايىندادى. ءبىراق، جارىس باستالعاندا ەش سالماق كاتەگورياسىنا ساي كەلمەيتىن كىشكەنتاي قىزدار، بالالار كەلدى. ولاردىڭ بەتىن قايتارماي، دەمەۋشىلەر ەسەبىنەن ماراپاتتاپ شىعارىپ سالدىق. سوسىن قونايەۆ قالاسىندا 83 جاستاعى اقساقال جەڭۋ ءۇشىن ەمەس، جاستارعا ۇلگى بولىپ، ورتانى قولداۋ ءۇشىن قاتىسقان ەدى. تۋرنيك سايىسىن ۇيىمداستىرۋعا كەيبىر سپورتتىق شارالارمەن سالىستىرعاندا از قاراجات جۇمسالدى. سىن ايتتى دەمەسىن، ەلىمىزدە كەيبىر سپورت تۇرلەرىنە قىرۋار قاراجات بولىنەدى. TARTYL FEST شىعىندارى شاعىن ءبىر كينونىڭ بيۋدجەتىنە دە جەتپەيدى. ەسەسىنە بۇل قارجىعا 20 قالانى ارالاپ شىقتىق، قانشاما كونسەرتتەر، جارىستار وتكىزدىك. قازىر فينالعا قىزۋ دايىندىق ءجۇرىپ جاتىر.
− ءبىزدىڭ بىلۋىمىزشە، قازاقستان Street workout باعىتىندا كوش باستاپ تۇرعان ەلدەردىڭ ءبىرى. TARTYL FEST جوباسى دا كوشە سپورتىن دامىتۋعا اسەرىن تيگىزىپ جاتىر ما؟
−نەگىزى كوشە سپورتى مادەنيەتى امەريكا قۇراما شتاتتارىندا وتە كەڭ تاراعان. قازاقستان دا Street workout باعىتىندا الەم بويىنشا الدىڭعى قاتاردان كورىنىپ ءجۇر. نەلىكتەن دەپ ويلادىم. جاۋابىن دا تاپقاندايمىن. قازاقستان جاڭا شىققان ترەندتەردى تەز قابىلداپ، شاپشاڭ دامىتىپ جىبەرەدى. كوشە سپورتىن دا ءبىزدىڭ قوعام قابىلدادى دەپ ايتۋعا بولادى. مەملەكەت تاراپىنان دا قولداۋ كورسەتىلىپ، ءار قالادا، كوپىردىڭ استىندا ارنايى الاڭدار ازىرلەنىپ قويعان. دەمەك، ينفراقۇرىلىم مەن حالىقتىڭ ىقىلاسى - بار قۇپيا وسىندا جاتىر دەپ ويلايمىن.
تاعى ءبىر ماڭىزدى فاكتور - كوشە سپورتىنىڭ قولجەتىمدى بولۋى. ويتكەنى، كوپتەگەن اتا- انالار بالاسىنا كونكي، شاڭعى اپەرە الماۋى مۇمكىن، سپورتقا قاجەتتى زاتتارعا، ارنايى باپكەر جالداۋعا جاعدايى كەلمەۋى مۇمكىن. سوندىقتان، تۋرنيك سياقتى قولجەتىمدى سپورت تۇرلەرىنە قولداۋدى كوبەيتۋ قاجەت. TARTYL FEST جارىسى جىل سايىن تۇراقتى وتسە، جەمىسىن بەرەدى دەپ ويلايمىن. «دارا» قورى كەلەشەكتە باسقا دا سپورت جوبالارىن قولعا الادى.
− ىرىكتەۋدە ەل وڭىرلەرىن ارالادىڭىز، شالعاي ايماقتاردا بۇقارالىق سپورت قالاي دامىپ جاتىر؟ جاستاردىڭ الەۋەتى قانداي؟ قانداي سپورتشىلار ەسىڭىزدە قالدى ؟
−ارينە، ءار قالانىڭ دامۋى ءارتۇرلى. تالدىقورعان قالاسى ايرىقشا ەسىمدە قالدى، ويتكەنى وندا سپورت كەشەندەرى، جۇزۋگە ارنالعان ورتالىقتار سالىنىپ، دالاداعى كوشە سپورتىنا دەيىن كوڭىل بولىنگەنى كورىنىپ تۇردى. وزىندىك سپورت مەكتەبىنىڭ قالىپتاسقانى سەزىلدى.
قالالاردا سپورتقا قىزىعۋشىلىق وتە جوعارى بولدى. ءبىر كۇندە مىڭ جارىم ۇمىتكەردى قابىلداعاندا ساعات تۇنگى بىردەن اسىپ كەتەتىن. سوندا دا حالىق كوپ، قولداۋ كەرەمەت ەدى، ويتكەنى بىرەۋىڭ اعاسى، بىرەۋدىڭ سىنىپتاسى، بىرەۋدىڭ جولداسى باق سىناپ جاتىر.
اقتاۋ قالاسىندا جارىسقا ءۇش بالاسىن اكەلگەن انا ەسىمىزدە قالدى. ۇشەۋى جارىس ەرەجەسى بويىنشا ءۇش ءتۇرلى كاتەگوريادا جانە ءبىر ۋاقىتتا تۋرنيككە تارتىلدى. سوندا ءۇش تۋرنيكتىڭ اراسىندا ارى- بەرى زىر جۇگىرگەن الگى انانى كورسەڭىز! ونىڭ ۇلكەن ۇلى جەڭىسكە جەتىپ، گراند- فينالعا جولداما الدى. جارىستان كەيىن ولار بىردەن ۆاحتادا جۇرگەن اكەلەرىنە حابارلاستى، تورتەۋى جىلاپ تۇر، ولارعا قوسىلىپ ءبىز دە جىلادىق. سونداي جاعىمدى ەنەرگەتيكا بولدى. وسى كۇنگە دەيىن قانشا كۆن- كونتسەرتتەرمەن ەل ارالاعاندا مۇنداي اسەر الماعان شىعارمىن. ءوزىمدى رۋحاني بايىتقان عاجاپ ساپار بولدى.
كەزەكتى ءبىر قالادا دا ءتۇن اۋعانشا جارىس وتكىزدىك. ەندى تۋرنيكتەردى، ساحنامىزدى جيناپ، كولىككە تيەپ، كەلەسى قالاعا اتتانۋىمىز كەرەك. سوندا تۋرنيككە تارتىلعان ءبىر توپ جىگىت بىزگە قايتادان كەلىپ، زاتتارىمىزدى جيناۋعا كومەكتەسىپ ءجۇر. قيماستىقپەن شىعارىپ سالعاندارى جۇرەكتى ەلجىرەتتى. وسىنداي حالىقتىڭ بىرلىگىن كورگەن سوڭ، ەلىمىزدە قالىڭ بۇقارا ءۇشىن جاقسى ەنەرگيا تۋدىرا الاتىن جوبالاردى كوپتەپ جاساۋ كەرەك دەگەن ويعا كەلدىم.
ەلىمىزدە مۇنداي سپورتتىق شارالار ءالى دە از، ءالى دە جەتىسپەيدى. ءتۇرلى فەستيۆالدار، ادام مەن ادامدى جاقىنداستىراتىن، حالىقتى بىرىكتىرەتىن شارالاردى ۇيىمداستىرۋ كەرەك.
− اقتىق سايىسقا دايىندىق قالاي ءجۇرىپ جاتىر؟ جەڭىمپازداردى قانداي جۇلدەلەر، قانداي مۇمكىندىكتەر كۇتىپ تۇر؟
−مۇنداي شارالاردى ۇيىمداستىرعاندا مەرەكەلىك كوڭىل- كۇي وتە ماڭىزدى. شەتەلدىڭ سپورتتىق شارالارىن نەگە قىزىعىپ قارايمىز، گەننادي گولوۆكين نەگە امەريكاعا بارىپ جۇدىرىقتاسادى؟ ويتكەنى ولاردا كوپ نارسە قامتىلعان، ت ۆ، ينتەرۆيۋ، شوۋ، سپورتتىق جارىسپەن قاتار جۇرەدى. كورەيانىڭ پوپ- مادەنيەتى دە ەموتسيا سىيلايتىن كونتسەرتتەر بەرەدى. شوۋ جاسايدى، تولەگەن ءاربىر تيىنىڭدى اقتايدى.
TARTYL FEST تەك قانا كاسىبي سپورتشىلارعا ارنالعان جارىس ەمەس، مەرەكەگە اينالۋى كەرەك. ءبىز 20 قالانى ارالاعاندا مىندەتتى تۇردە تانىمال ەسترادا جۇلدىزدارىن شاقىردىق. ويتكەنى انگە قىزىعىپ كەلگەن جاس جەتكىنشەك تۋرنيكتى كورىپ، سپورتشى اعالارىن كورىپ، قىزىعۋشىلىعى ويانۋى مۇمكىن. 18-اقپاندا وتەتىن گراند- فينالدا ارنايى كونسەرتتىك باعدارلاما بولادى، تىكەلەي ەفير جۇرگىزىلەدى. سول ءۇشىن دە ەلىمىزگە تانىمال 8 جۇرگىزۋشى شاقىرىلدى. سوندىقتان استانا تۇرعىندارى مەن قوناقتارىن EXPO كونگرەسس ورتالىعىندا 18-اقپان كۇنى ساعات 12.00 دە باستالاتىن گراند- فينالعا شاقىرامىن.
باس اقپاراتتىق دەمەۋشى – ق ر پرەزيدەنتىنىڭ تەلەراديوكەشەنى. تۋرنير Jibek Joly تەلەارناسىنان تىكەلەي ەفيردە كورسەتىلەدى.
جەڭىمپازداردى قاراجاتپەن ماراپاتتاۋمەن شەكتەلمەي، دارىندىلاردى ودان ءارى قولداۋعا، ولاردىڭ تالانتىن شىڭداۋعا جاردەمدەسەمىز. اتاپ ايتقاندا، وسى جوبا اياسىندا ەڭ ۇزدىك سپورتشىلارىمىزدىڭ Street WorkOut بويىنشا حالىقارالىق جارىستارعا قاتىسۋىن ۇيىمداستىرامىز. نەمەسە لوس- اندجەلەستە وتەتىن ارنولد شۆارتسەنەگگەر سىندى تانىمال تۇلعالار جاسايتىن Street workout جارىستارىنا اپارعىمىز كەلەدى. نەلىكتەن؟ جاستارىمىز امەريكاعا بارىپ، مىقتىلىعىن دالەلدەي الادى، وندا جۇلدەلى ورىن الىپ جاتسا، وعان بارشا قازاق قۋانىپ جاتسا، سونىڭ ءوزى ەلىمىزدەگى قانشاما جاسقا ۇلگى بولادى ەمەس پە؟ !
− TARTYL FEST ىرىەكتەۋىندە تۋرنيككە تارتىلۋدان رەكوردتىق كورسەتكىش 50دەن استى. ال گراند- فينالعا بولجامىڭىز قانداي؟
− ءبىز 20 قالانى ارالاعاندا سايىستىڭ وتەتىنى ءبىر اي بۇرىن ەسكەرتىلدى. فينالعا دەيىن دە دايىندالاتىن ۋاقىت جەتكىلىكتى بولدى. ياعني ولار 50 سانىمەن رەكورد ورناتسا، اقتىق سايىستا مەنىڭ ويىمشا 60-65 كە دە جەتۋى مۇمكىن. ويتكەنى سپورتشىلاردىڭ، 3-4 اي دايىندالاتىن ۋاقىتى جەتكىلىكتى بولدى. ارينە، ءوزىم كاسىبي سپورتشى بولماعاندىقتان ناق باسىپ ايتا المايمىن. دەگەنمەن، ءۇش اي از ۋاقىت ەمەس. ءبىزدىڭ جىگىتتەردىڭ دايىندىعىنا قاراپ، ءوزىم ريزا بولدىم.
ءتىپتى، Tartyl Fest گراند- فينالىندا الەمدىك رەكورد ورناۋى دا مۇمكىن. مۇنى ءبىزدىڭ تورەشىلەر، Street WorkOut ماماندارى دا جوققا شىعارمايدى. ارينە، بۇل ءبىزدىڭ ءتۋرنيردىڭ ەرەجەسى بويىنشا عانا ايتىلعان بولجام. ويتكەنى Street WorkOut بويىنشا ءار ەلدە ءار ءتۇرلى ەرەجە بار. مىسالى، جاپونياداعى رەكوردتىق كورسەتكىش - 651 بولعان. ال رەسەيدە 6 ساعات ىشىندە 4000 رەت تارتىلعان ازامات الەمدىك رەكورد ورناتقان. ياعني، ولاردا ەرەجە باسقا.
مەنىڭ بىلۋىمشە، ءبىزدىڭ ەرەجە بويىنشا الەمدىك رەكورد - 105. ايتسە دە، ادامنىڭ مۇمكىندىگىنە شەك قويۋعا بولمايدى. سپورتتا ويلاماعان، كۇتپەگەن ناتيجەلەر ءجيى كەزدەسەدى. سوندىقتان ۇلكەن جەتىستىكتەردەن ءۇمىت ۇزبەيمىز.
«نۇرلان قويانبايەۆتىڭ ءوزى تۋرنيككە تارتىلا ما؟» دەپ سىناي قارايتىندار دا بار. وڭىرلەردى ارالاعاندا ناعىز مازاق نىسانى مەن بولدىم. ءقازىر نۇرلان قويانبايەۆ ساحناعا شىعادى دەگەندە، جۇرتتىڭ ءبارى «ءوزى تۋرنيك سپورتىن قولداپ جۇرگەن ادام، كەمىندە 30 رەت تارتىلاتىن شىعار» دەپ كۇتەتىن ءتارىزدى. ال مەنىڭ سالماعىم 90 كەلىدەن اسادى، ءوزىمدى كوتەرۋ قيىن، تۋرنيككە 5-6 رەت قانا تارتىلامىن. سوندا دا ۇيالماي شىعىپ ءجۇردىم. ويتكەنى كىشكەنتاي بالالارعا، جاستارعا موتيۆاتسيا بولسىن دەيمىن، كەيدە سوڭىن ءازىل- كۇلكىگە اينالدىرىپ جىبەرەمىن.
− جوبانىڭ بولاشاعى جونىندە نە ايتاسىز؟ TARTYL FEST جارىسى اياقتالسا دا، سپورتشىلار ارنايى ورتا قۇرىپ كەتە الادى عوي ؟
−جارىستى ۇيىمداستىرعاندا تەلەگرامدا چات اشقانبىز. وعان وتە كوپ ادام تىركەلدى. چات ءالى كۇنگە دەيىن جۇمىس ىستەپ تۇر، وندا سپورتشىلار ءبىر- بىرىنە قارسىلاس بولا تۇرا، ءوزارا پايدالى كەڭەستەرىن، سپورتتىق جاتتىعۋلارى مەن ديەتالارى تۋرالى وي ءبولىسىپ جاتادى. دەمەك، ورتاق قىزىعۋشىلىعى بار توپ پايدا بولدى.
ارينە، سىن ايتاتىندار، ودان دا ماڭىزدى ماسەلە كوپ قوي دەيتىندەر تابىلادى. بارلىق ەلدەگى بارلىق پروبلەمانى ءبىر ۋاقىتتا شەشۋ مۇمكىن ەمەس. ەلدىڭ رۋحىن كوتەرۋ كەرەك. ەكونوميستەردىڭ جۇمىسى - قارجىلاي جاعدايدى جاقسارتۋ بولسا، ءبىزدىڭ ماقسات - رۋحاني دامۋ بولۋى كەرەك.
TARTYL FEST جىل سايىن تۇراقتى تۇردە وتسە دەپ ويلايمىن. جارىسقا بيىل قاتىسىپ جاتقان سپورتشىلار ءبىزدىڭ جوبامىزدىڭ ارقاسىندا پايدا بولعان جوق، ولار بۇرىننان سپورتتى جانىنا سەرىك ەتكەن ادامدار. سوندىقتان كەلەسى جىلى سپورتشىلار سانى ارتىپ جاتسا، جارىستىڭ ناتيجەلى وتكەنى دەپ ايتۋعا بولادى. ماسەلەن، «قازاق بارىسى» بىرنەشە جىل وتكىزىلىپ جۇرگەندە پالۋاندار كوبەيدى. ەل اراسىنان ءتۇرلى سپورتشىلار تانىلدى. سوندىقتان، TARTYL FEST تۇراقتى تۇردە ءوتۋى كەرەك دەپ ويلايمىن.
− فينال ويىندارىنا ساتتىلىك تىلەيمىز! سۇحباتىڭىزعا راحمەت!
اۆتور
ايجان سەرىكجان قىزى
