جاڭا مەكتەپتەردىڭ قازاق نەمەسە ارالاس تىلدە بولۋى حالىق قاجەتتىلىگىنە بايلانىستى - ەربولات دوسايەۆ

الماتى. قازاقپارات - الماتىدا جاڭادان اشىلاتىن مەكتەپتەردە وقۋ ءتىلى جەرگىلىكتى حالىقتىڭ قاجەتتىلىكتەرىنە بايلانىستى تاڭدالادى.

بۇل تۋرالى ەربولات دوسايەۆ ناۋرىزباي اۋدانى تۇرعىندارىمەن كەزدەسۋى بارىسىندا ءمالىم ەتتى، دەپ حابارلايدى قازاقپارات ءتىلشىسى.

«جاڭادان كوپ مەكتەپ اشىلىپ جاتىر، ءبىراق ولاردىڭ بارلىعى تەك قازاق ءتىلدى. ارالاس مەكتەپتەر جوق، ال ءبىزدىڭ №157 مەكتەپتە بالا سانى نورمادان اسىپ كەتكەن»، - دەپ اۋدانى تۇرعىنى ماسەلە كوتەردى.

شاھار باسشىسى مۇنىڭ سەبەبى سۇرانىسقا بايلانىستى ەكەنىن ءتۇسىندىردى.

«ناۋرىزباي اۋدانىندا اشىلعان جاڭا مەكتەپتەردىڭ كوپشىلىگى قازاق تىلىندە وقىتادى. بۇل وتكەن جىلدىڭ باسىندا وسى اۋداندا تاپشىلىعى بايقالعان 7,5 مىڭ مەكتەپ ورنىنىڭ ىشىندە قازاق تىلىندە وقىتۋعا وتىنىمدەردىڭ كوپ بولعانىنا بايلانىستى. سوندىقتان، وتىنىشتەر قاناعاتتاندىرىلدى. ءبىز سالعالى وتىرعان جاڭا مەكتەپتەر، ونىڭ ىشىندە «جايلى مەكتەپ» ۇلتتىق جوباسى اياسىندا اۋداندىق ءبىلىم باسقارمالارىنىڭ قاراۋىنداعى وتىنىمدەر سانىنا قاراي اشىلاتىن بولادى. مەملەكەت باسشىسى ءبىلىم بەرۋگە ەرەكشە كوڭىل بولەدى. بىزدە ناقتى جوسپارلار بار: 2025 -جىلدىڭ سوڭىنا دەيىن مەكتەپتەردىڭ % 30- ىن ءبىر اۋىسىمعا اۋىستىرۋعا ۇمتىلامىز. بۇعان مۇمكىندىكتەر بار»، - دەدى ەربولات دوسايەۆ.

سونداي- اق، قالالىق ءبىلىم باسقارماسىنىڭ باسشىسى ءلاززات جىلقىبايەۆا مەگاپوليستە قازاق مەكتەپتەرىنە سۇرانىس جوعارى ەكەنىن باسا ايتتى.

«جاڭادان اشىلعان №207 مەكتەپ 1200 ورىنعا ەسەپتەلگەن. قازاق سىنىپتارىنا 2400 بالا كەلدى، ال ورىس سىنىپتارىنا كەلگەن بالا سانى 100-دەن اسپايدى. وسىعان بايلانىستى №157 مەكتەپتە ورىس تىلىندە وقيتىن وسى اۋدان تۇرعىندارى ءۇشىن وقۋشىلار تاسىمالىن ۇيىمداستىردىق. ەڭ الدىمەن، اتا- انالاردىڭ قاجەتتىلىكتەرىن ەسكەرەمىز. كەيىنگى اشىلعان سەگىز مەكتەپتىڭ ەكەۋى - ارالاس»، - دەپ ءتۇسىندىردى باسقارما باسشىسى.

اۆتور

الما مۇقانوۆا