اسقار شاكىروۆ رەسەيلىك دەپۋتاتتىڭ پىكىرىنە جاۋاپ بەردى

استانا. قازاقپارات - قازاقستاندا بيولوگيالىق قارۋ جاساۋعا باعىتتالعان زەرتحانا جۇمىس ىستەيدى دەگەن قاۋەسەت شىندىققا جاناسپايدى. سەنات دەپۋتاتى اسقار شاكىروۆ رەسەيلىك ارىپتەسى ولەگ ماتۆەيچيەۆتىڭ مالىمدەمەسىنە قاتىستى وسىنداي پىكىر ءبىلدىردى.

ونىڭ ايتۋىنشا، رەسەي مەملەكەتتىك تۋماسىنىڭ دەپۋتاتى بۇعان دەيىن دە ەلىمىزگە قاتىستى قيسىنسىز وي- تۇجىرىمدارىمەن كوزگە تۇسكەن.

«جالپى مۇنداي مالىمدەمەلەر ابىروي اكەلمەيدى. ەكى ەلدىڭ قارىم- قاتىناسىنا سىزات ءتۇسىرۋى مۇمكىن»، - دەيدى سەناتور.

اسقار شاكىروۆ، ق ر پارلامەنتى سەناتىنىڭ دەپۋتاتى:

- بۇل مالىمدەمە شىندىققا جاناسپايدى. اسا قاۋىپتى ينفەكسيالار ۇلتتىق عىلىمي ورتالىعىنىڭ رەفەرەنتتىك زەرتحاناسى حالىقارالىق دەڭگەيدەگى جالعىز نىسان. ونىڭ ماقساتى - بيولوگيالىق قاۋىپسىزدىگىمىزدى قامتاماسىز ەتۋ، عىلىمي نەگىزدەردى ازىرلەۋ جانە قولدانىسقا ەنگىزۋ، اسا قاۋىپتى ينفەكسيالاردىڭ تاۋەكەلدەرىن باعالاۋ، ولاردى الدىن الۋ. اتالعان لابوراتوريا ەل بيۋدجەتىنەن قارجىلاندىرىلادى جانە مەملەكەتتىڭ تىكەلەي باقىلاۋىندا.

www.24.kz