استانا اكىمدىگى بالالار تۋريزمىن دامىتۋعا ۋادە بەردى

استانا. قازاقپارات - ەلوردا اكىمدىگى بالالار تۋريزمىنە قارجى ءبولىپ، دامىتۋ جاعى قاراستىرىلاتىندىعىنا سەندىردى، دەپ حابارلايدى قازاقپارات.

«ىشكى تۋريزمدى دامىتۋ بالالار تۋريزمىنەن باستالادى. بالالار ءجيى ساياحاتتاسا، وعان ەرىپ ەرەسەكتەردە كوبىرەك ساياحاتتايدى. ماعان كولىككە 10 ميلليون تەڭگە بەرىڭىزدەرشى، مەن مۋزەيلەرگە 10 مىڭ بالا اكەلەمىن. بالالار كورگەن، بىلگەنىن ۇيىنە ايتىپ بارادى، سودان سوڭ اتا-انانىڭ قىزىعۋشىلىعى ويانا باستايدى. ءبىر جاعىنان مۋزەيلەردىڭ دە جۇمىسى جۇرەدى»، - دەدى استانالىق تۋريزم اسسوتسياتسياسىنىڭ وكىلى تاتيانا ۆەرنيتسكايا اكىم ورىنباسارىمەن كەزدەسۋ بارىسىندا.

ءوز كەزەگىندە ەلوردا اكىمىنىڭ ورىنباسارى ەرلان بەكمىرزايەۆ بالالار تۋريزمىنە قولداۋ كورسەتۋدى جاۋاپتى مەكەمەگە جۇكتەدى.

«قالالىق ءماسليحاتتىڭ جاڭا قۇرامى جاساقتالعان سوڭ، ءسىز كوتەرگەن ماسەلەنى ءماسليحات قاراۋىنا ەنگىزەمىز»، - دەيدى ول.

ايتا كەتسەك، مادەنيەت جانە سپورت ءمينيسترى بۇگىن عانا تۋريزمدى دامىتۋ بويىنشا الەمنىڭ ۇزدىك 50 ەلىنىڭ قاتارىنا كىرۋ جوسپارى تۋرالى بايانداعان ەدى.

2030-جىلعا دەيىن بارلىق شارالاردى ىسكە اسىرۋدىڭ ناتيجەسىندە ىشكى تۋريستەردىڭ سانىن 11 ميلليون ادامعا دەيىن، شەتەلدىك تۋريستەردى - 4 ميلليون ادامعا دەيىن، سالادا جۇمىسپەن قامتۋدى - 800 مىڭ ادامعا دەيىن ارتتىرۋ.

سونداي-اق دۇنيەجۇزىلىك ەكونوميكالىق فورۋمنىڭ رەيتينگىسىنە سايكەس تۋريزمدى دامىتۋ بويىنشا قازاقستاندى الەمنىڭ ۇزدىك 50 ەلدىڭ قاتارىنا قوسۋ كوزدەلىپ وتىر.