استانا مەكتەپتەرىندەگى بەينەكامەرالار جەدەل باسقارۋ ورتالىعىنا قوسىلعان - پوليتسيا

استانا. قازاقپارات - ەلورداداعى بارلىق مەكتەپتەردىڭ بەينەباقىلاۋ كامەرالارى جەدەل باسقارۋ ورتالىعىنا قوسىلعان.

بۇل تۋرالى پوليتسيا دەپارتامەنتى ەكسترەميزمگە قارسى ءىس-قيمىل باسقارماسىنىڭ باستىعى دانيار شىمىرقۇلوۆ ايتتى، دەپ حابارلايدى قازاقپارات ءتىلشىسى.

پوليتسيا دەپارتامەنتىندە وتكەن بريفينگتە د. شىمىرقۇلوۆ پەتروپاۆل مەكتەبىندە بالتامەن شابۋىل جاساعان سوڭ، ەلوردالىق مەكتەپتەردىڭ قاۋىپسىزدىك دەڭگەيى تۋرالى ءتىلشى سۇراعىنا جاۋاپ بەردى.

«بىزدە تۇراقتى نەگىزدە سەمينارلار وتكىزىلەدى. قولدان جاسالعان قۇرىلعىنى انىقتاۋ بويىنشا ساباقتار وتكىزەمىز. قازىرگى ۋاقىتتا ەلوردالىق مەكتەپتەردەگى بارلىق كامەرالار جەدەل باسقارۋ ورتالىعىنا قوسىلعان. ءبىز ءبارىن ونلاين رەجيمدە كورەمىز، باقىلايمىز. بارلىق مەكتەپتەر تۋرنيكەتتەرمەن، كۇزەتپەن قامتىلعان، مەكتەپتەردى ۇنەمى تەكسەرىپ وتىرامىز»، - دەدى دانيار شىمىرقۇلوۆ.

ونىڭ ايتۋىنشا، ەلوردادا 93 مەكتەپ بار. ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى ءار مەكتەپتە سەمينارلار وتكىزەدى، بەينەروليكتەر كورسەتەدى. بارلىق 93 مەكتەپتە ءتۇسىندىرۋ جۇمىستارى جۇرگىزىلگەن.

سوڭعى دەرەكتەر بويىنشا، استانادا تەرروريزم اكتىسى تۋرالى جالعان حابارلامالار جيىلەپ كەتكەن. بيىل 102 ارناسىنا 7 قوڭىراۋ كەلىپ ءتۇستى، قىلمىستىق ىستەر تىركەلمەگەن.