نۇرتورە ءجۇسىپ ەلىمىزدەگى مەكتەپتەردى كۇزەتۋ جۇيەسىنە قاتىستى ۇسىنىس ايتتى
دەپۋتات پەتروپاۆل قالاسىنداعى 9-سىنىپ وقۋشىسى مەكتەپكە بالتا مەن پىشاق الىپ كەلىپ، ءۇش بالانى جاراقاتتاعان قايعىلى جاعدايدى ەسكە سالدى.
نۇرتورە ءجۇسىپ وسىعان بايلانىستى مۇنداي توتەنشە جاعدايلاردى بولجاۋ جۇيەسىندەگى، ەرتە الدىن الۋداعى كۇردەلى پروبلەمالارعا نازار اۋداردى. سەناتور ەلىمىزدە بۇل باعىت بويىنشا ماڭىزدى عىلىمي بازا جوق ەكەنىن ايتتى. وقۋشىلاردىڭ پسيحولوگيالىق پورترەتىن جاساۋ، وتباسىنىڭ الەۋمەتتىك جاعدايىن انىقتاۋ كەزىندە دەپرەسسياعا نەمەسە اگرەسسياعا بەيىم بالالاردى الدىن الا وقشاۋلاۋ ەسكەرىلمەيدى.
«كوپ ساتىلى كەشەندى قاۋىپسىزدىك جۇيەسىن جاساۋدى كۇن تارتىبىنە شىعارۋ كەرەك. الەم ەلدەرىندە مۇنداي تاجىريبەلەر بار. قاي ەل بولسىن بۇل ماسەلەگە اسقان جاۋاپكەرشىلىكپەن قارايدى. ماسەلەن، قىتايدا مەكتەپكە تەك وقۋشىنىڭ دا، اتا-انانىڭ دا سۋرەتى بار ارنايى كۋالىكپەن كىرۋگە بولادى. كەز كەلگەن وقۋ ورنىندا كۇزەتشى كابينكاسى قويىلعان. كەلگەن ادامنىڭ كۋالىگى بولماسا، تەك مۇعالىم عانا ەرتىپ كىرە الادى. ال فرانسيادا وقۋشىلارعا عيماراتقا الىپ كىرۋگە بولمايتىن زاتتار ءتىزىمى جازىلعان نۇسقاۋلىق بەرىلەدى. ساباق اراسىندا ريۋكزاكتار مەن پورتفەلدەر تەكسەرىلەدى. جىلىنا ەكى رەت انتيتەرروريستىك جاتتىعۋ ساباقتارى وتكىزىلەدى»، - دەدى سەناتور.
دەپۋتات «ءبىلىم تۋرالى» زاڭىندا وقۋشىلار مەن ۇستازداردىڭ قاۋىپسىزدىگىن قامتاماسىز ەتۋ تۋرالى ءبىر اۋىز ءسوز جوق ەكەنىن ايتتى.
«ەلىمىزدەگى ءبىلىم بەرۋ مەكەمەلەرىندە كريمينالدىق جانە تەرروريستىك سيپاتتاعى ءقاۋىپ- قاتەردەن قورعايتىن، وقۋ ورىندارىنداعى وقۋشىلاردى، مۇعالىمدەر مەن قوسالقى پەرسونالدى ساقتاۋعا ارنالعان قاۋىپسىزدىكتى قامتاماسىز ەتۋدىڭ ءتيىمدى جۇيەسىن جاساۋ جونىندە شۇعىل كەشەندى شارالار قابىلداۋدى سۇرايمىز»، - دەدى نۇرتورە ءجۇسىپ.
ەستەرىڭىزگە سالايىق، پەتروپاۆلداعى №4 مەكتەپتىڭ 9-سىنىپ وقۋشىسى ساباققا بالتا-پىشاقپەن قارۋلانىپ كەلىپ، ءۇش بالانى جاراقاتتاعان ەدى.
فوتو: senate.parlam.kz
