09:25, 14 - اقپان 2023 | GMT +5
تۇركيادا جەر سىلكىنىسىنەن كەيىن قيراپ قالعان ءبۇتىن ءبىر قالا سۇرىلەدى
گازيانتەپ. قازاقپارات - تۇركيانىڭ گازيانتەپ پروۆينتسياسىنداعى نۇرداعى قالاسى تولىعىمەن سۇرىلەدى، دەپ حابارلايدى قازاقپارات Haber Global تەلەارناسىنا سىلتەمە جاساپ.
بۇگىن پروۆينسيانىڭ گۋبەرناتورى وسمان بيلگين وسىنداي شەشىم قابىلدانعانىن جاريا ەتتى.
جەر سىلكىنىسىنەن قاتتى زارداپ شەككەن گازيانتەپتىڭ نۇرداعى قالاسى 100 پايىز ءسۇرىلىپ، قايتادان سالىنادى.
قازىر مۇندا ءۇيىندى مەن قوقىستى جيناستىرۋ جانە ىزدەۋ-قۇتقارۋ جۇمىسى ءجۇرىپ جاتىر.
- ءبىزدىڭ بۇكىل جەدەل توپتار بىرگە جۇمىس ىستەپ جاتىر. ءارقايسىسى ءوز ۇلەسىن ايانباي قوسىپ كەلەدى. نۇرداعى قالاسىنداعى سوڭعى 8 پاتەردە جۇمىس جالعاسىپ جاتىر. ءبىز كوپ ادامنان ايىرىلىپ قالدىق. دەگەنمەن بۇل اپاتقا دا شامامىز كەلگەنشە قارسى تۇرامىز، - دەدى گۋبەرناتور.
