ۇشاق اپاتى: ازاماتتىق اۆياتسيا كوميتەتى باس پروكۋراتۋرانىڭ مالىمەتىنە پىكىر ءبىلدىردى
بۇعان دەيىن ق ر باس پروكۋرورى بەرىك اسىلوۆتىڭ ءماجىلىس دەپۋتاتتارىنىڭ ساۋالىنا جاۋاپ بەرگەن ەدى.
وندا استاناداعى سىبايلاس جەمقورلىققا قارسى ءىس-قيمىل دەپارتامەنتى ازاماتتىق اۆياتسيا كوميتەتى قىزمەتكەرلەرىنىڭ ۇستىنەن «Fokker-100» ۇشاعىنىڭ الماتى ىرگەسىندەگى اپاتىن تەرگەپ جاتقانى ايتىلعان.
«استاناداعى سىبايلاس جەمقورلىققا قارسى ءىس-قيمىل دەپارتامەنتى ازاماتتىق اۆياتسيا كوميتەتى قىزمەتكەرلەرىنىڭ ۇستىنەن قىلمىستىق كودەكستىڭ 370-بابى 4-بولىگىنىڭ 1-تارماعى (قىزمەتتەگى ارەكەتسىزدىك) بويىنشا 2018-جىلى «Fokker-100» ۇشاعىنىڭ اپاتقا ۇشىراۋىنا اكەپ سوققان الماتى قالاسى اۋە ايلاعىنىڭ ۇشۋعا جارامدىلىعى سەرتيفيكاتىن زاڭسىز بەرۋ جونىندەگى قىلمىستىق ءىستى تەرگەپ-تەكسەرۋدە. لاۋازىمدى ادامداردىڭ ءىس-ارەكەتىنە تۇپكىلىكتى باعالاۋ تەرگەۋ قورىتىندىسى بويىنشا بەرىلەتىن بولادى»، - دەپ جازىلعان جاۋاپتا.
كوميتەت وكىلدەرى اتالعان قىلمىستىق ءىس بويىنشا تەرگەۋ ورىندارىمەن بەلسەندى جۇمىس ىستەپ جاتقاندارىن، الايدا اۋە ايلاعىنا زاڭسىز بەرىلگەن جەر زاڭناما بويىنشا ايلاقتاردىڭ جارامدىلىعى تۋرالى سەرتيفيكات بەرۋدەن باس تارتۋعا نەگىز بولا المايتىنىن ايتىپ وتىر.
«اۋە ايلاقتارىن سەرتيفيكاتتاۋ جانە جارامدىلىق سەرتيفيكاتىن بەرۋ ءتارتىبى «اۋەايلاقتاردىڭ (تىكۇشاق ايلاقتارىنىڭ) جارامدىلىعىن سەرتيفيكاتتاۋ جانە ولارعا سەرتيفيكات بەرۋ قاعيدالارىن بەكىتۋ تۋرالى» ق ر ينۆەستيتسيالار جانە دامۋ ءمينيسترىنىڭ بۇيرىعىمەن رەگلامەنتتەلگەنىن اتاپ وتەمىز. بۇل رەتتە، جەرگىلىكتى اتقارۋشى ورگانداردىڭ جەر ۋچاسكەلەرىن زاڭسىز بەرۋى سالدارىنان پايدا بولعان اۋە ايلاعى ماڭىنداعى اۋماقتا وبەكتىلەردىڭ بولۋى سەرتيفيكاتتىق زەرتتەپ-قاراۋ نىساناسى بولىپ تابىلمايدى جانە اۋە ايلاقتارىنىڭ جارامدىلىق سەرتيفيكاتىن بەرۋگە كەدەرگى بولا المايدى»، - دەلىنگەن ۆەدومستۆونىڭ باسپا ءسوز قىزمەتى تاراتقان اقپاراتتا.
سونداي-اق، ۆەدومستۆو ماماندارى الماتى ىرگەسىندە ۇشاقتىڭ قۇلاۋىنا اۋە كەمەسىنىڭ قاناتىنداعى اقاۋلار سەبەپ بولعانىن ەسكە سالادى.
«اۆياتسيالىق وقيعانى تەكسەرۋدىڭ قورىتىندى ەسەبى بويىنشا، «بەك ەير» ا ق اۋە كەمەسىمەن بولعان اۆياتسيالىق وقيعانى زەرتتەگەن كوميسسيا اۋە كەمەسىنىڭ اپاتى ۇشاق اۋەگە كوتەرىلگەن كەزدە قاناتىنىڭ كۇش تۇسەتىن قاسيەتتەرىنىڭ سيممەترياسىن جوعالتۋىنان بولعانىن انىقتادى. سونىڭ كەسىرىنەن ۇشاق ۇشۋ-قونۋ جولاعىنان كوتەرىلگەننەن كەيىن فيۋزەلياجعا قۇلاپ، قار باسقان توپىراقتىڭ بەتىمەن وڭعا قاراي اۋىپ كەتكەن، ودان كەيىن اۋەجايدىڭ پەريمەتر بويىنشا قورشاۋىن بۇزىپ، اتالعان قورشاۋدان 9-10 مەتر قاشىقتىقتا ورنالاسقان ەكى قاباتتى جەكە مەنشىكتەگى قۇرىلىس نىسانىنا سوعىلعان. كوميسسيا قورىتىندىسىنا سايكەس، ۇشاق قاناتىنىڭ كۇش تۇسەتىن قاسيەتتەرىن جوعالتۋىنىڭ سەبەبى جەر ۇستىندەگى مۇزدانۋدىڭ اسەرى بولۋى ىقتيمال»، - دەپ جازىلعان كوميتەت مالىمەتىندە.
