تۇركيادا جۇرگەن قازاقستاندىق قۇتقارۋشىنىڭ الماتىدا ءسابيى دۇنيەگە كەلدى

الماتى. قازاقپارات - تۇركياداعى جويقىن ءزىلزالادان زارداپ شەككەندەردى ىزدەستىرۋ- قۇتقارۋ جۇمىسىنا اتسالىسىپ جاتقان قازاقستاندىق قۇتقارۋشى ءبىرجان بايقۇلوۆتىڭ وتباسىندا قۋانىش بولدى، دەپ حابارلايدى قازاقپارات.

«تۇركياداعى جويقىن جەر سىلكىنىسىنىڭ زاردابىن جويۋعا قاتىسىپ جاتقان قازاقستاندىق قۇتقارۋشىلاردىڭ ۇلكەن كومانداسىنىڭ قۇرامىنداعى ت ج م رەسپۋبليكالىق جەدەل-قۇتقارۋ جاساعىنىڭ باس قۇتقارۋشىسى ءبىرجان بايقۇلوۆتىڭ الماتىدا قىزى دۇنيەگە كەلدى. قىزعا ياسمينا دەگەن ادەمى ەسىم بەرگەن.

ءبىز ەرجۇرەك قۇتقارۋشىمىزدى قىزىنىڭ دۇنيەگە كەلۋىمەن قۇتتىقتايمىز جانە وعان زور دەنساۋلىق تىلەيمىز. ال ءبىرجاننىڭ وزىنە وتانىنا تەزىرەك امان-ەسەن ورالۋىنا تىلەكتەسپىز! قىزمەت ءۇشىن راحمەت!»، - دەلىنگەن قازاقستان توتەنشە جاعدايلار مينيسترلىگىنىڭ باسپا ءسوز قىزمەتى تاراتقان حابارلامادا.

ەسكە سالايىق، قازاقستان قۇتقارۋشىلارى مىنگەن بورت 7-اقپان كۇنى گازيانتەپكە اتتانعان بولاتىن. ماماندارىمىزدىڭ ەكىنشى توبى 8-اقپاندا كەشقۇرىم جەتتى.

تۇرىك ەلىندە ءزىلزالا كەزىندە جوعالىپ كەتكەن بىرنەشە قازاقستاندىق تابىلدى. ونىڭ ءبىرى - سابينا مامادياروۆا 8-اقپان كۇنى ءۇيىندى استىنان امان شىعارىلدى.

حاتايدا جۇمىس ىستەپ جاتقان قازاقستاندىق قۇتقارۋشىلار ءادىل قادىربەكوۆتىڭ ءولى دەنەسىن تاپتى. كوپ ۇزاماي ميربولات قۇرماشەۆتىڭ دەنەسى دە قيراندى استىنان تابىلدى.

ق ر ت ج م مالىمەتىنشە، قازاقستاندىق قۇتقارۋشىلار بۇگىنگە دەيىن ۇيىندىلەر استىنان 26 ادامدى الىپ شىقتى، ولاردىڭ جەتەۋى - امان.

قازاقستان ماماندارى تۇركيادا مەديتسينالىق كومەك كورسەتۋ پۋنكتىن دە اشىپ، زارداپ شەككەندەرگە كومەك كورسەتىپ جاتىر.

فوتو: t.me/qr_tjm