ورتالىق ازيا ەلدەرىنىڭ مۇددەسى مەن مىندەتى ورتاق - ماۋلەن اشىمبايەۆ

تۇركىستان. قازاقپارات - سەنات ءتوراعاسى ماۋلەن اشىمبايەۆ تۇركىستاندا ءوتىپ جاتقان ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمىنا قاتىسىپ، ءسوز سويلەدى، دەپ حابارلايدى قازاقپارات.

«جۇزدەگەن جىلدار بويى شىعىس پەن باتىستىڭ اراسىن جالعاعان، ورتا عاسىرلاردا ساۋدا-ساتتىقتىڭ كۇرەتامىرى سانالعان ۇلى جىبەك جولى ورتالىق ازيانىڭ اۋماعىمەن ءوتتى. سونىڭ ناتيجەسىندە ءبىرتۇتاس ساۋدا-كوممۋنيكاتسيالىق جانە مادەني كەڭىستىك قالىپتاستى. ءبىزدى وسىنداي ورتاق تاريحپەن بىرگە بۇگىنگى تىعىز قارىم-قاتىناسىمىز دا بايلانىستىرادى. قازىرگى تاڭدا ورتالىق ازيا ەلدەرىنىڭ مۇددەسى مەن مىندەتى ورتاق. سوندىقتان تىعىز ىنتىماقتاستىق پەن سەنىمگە نەگىزدەلگەن ديالوگتى نىعايتۋ، سىرتقى جانە ىشكى سىن-قاتەرلەرگە بىرلەسىپ قارسى تۇرۋ ءوڭىردىڭ بولاشاعىن ايقىندايتىن ماڭىزعا يە. ءبىزدىڭ مەملەكەتتەرىمىزدىڭ باسشىلارىنىڭ ەكىجاقتى جانە كوپجاقتى كەزدەسۋلەرىندە دە وسى ماسەلەلەر تۇراقتى تۇردە تالقىلانىپ كەلەدى. ءبىز پارلامەنتارالىق بايلانىس كەزىندە وسى باسىمدىقتى دايەكتى تۇردە ىلگەرىلەتۋىمىز قاجەت»، - دەدى ماۋلەن اشىمبايەۆ.

سوعان بايلانىستى سەنات ءتوراعاسى ىنتىماقتاستىقتىڭ نەگىزگى 5 باعىتىنا توقتالىپ ءوتتى. ولاردىڭ قاتارىندا وسى فورۋمنىڭ پارلامەنتتىك ديالوگ پەن پارلامەنتارالىق ىنتىماقتاستىقتىڭ ناقتى باعىتتارىن تالقىلاۋدىڭ ءتيىمدى الاڭى رەتىندەگى ءرولى بار. بۇل رەتتە رەفورمالاردى زاڭنامالىق قامتاماسىز ەتۋ جانە وڭىردەگى وزەكتى پروبلەمالار - ترانسشەكارالىق وزەندەردى بىرلەسىپ پايدالانۋ، ەكولوگيالىق جانە ەنەرگەتيكالىق تۇراقتىلىقتى قامتاماسىز ەتۋ، وزگە دە ماسەلەلەردى شەشۋ بارىسىندا تاجىريبە الماسۋ ءۇشىن پلاتفورمانىڭ الەۋەتىن ءتيىمدى پايدالانۋدىڭ ءمانى زور.

ماۋلەن اشىمبايەۆ نازار اۋدارعان تاعى ءبىر ۇسىنىس مادەني-گۋمانيتارلىق ىنتىماقتاستىقتى نىعايتۋ جانە ورتالىق ازيا ەلدەرىنىڭ زيالىلارى اراسىنداعى ديالوگتى ارتتىرۋ ماسەلەسىنە قاتىستى بولدى.

«بۇگىنگى پارلامەنتارالىق فورۋم پارلامەنت وكىلدەرىنىڭ جۇيەلى جۇمىسى ءۇشىن ءتيىمدى الاڭعا اينالادى دەپ سەنەمىن. سوندىقتان وسى فورۋمدى ورتالىق ازيا ەلدەرىنىڭ بىرىندە جىل سايىن وتكىزىپ تۇرۋدى ۇسىنامىز. اۋقىمدى جيىندى تەك استانالاردا ەمەس، ءبىزدىڭ حالىقتارىمىز ءۇشىن كيەلى سانالاتىن جانە مادەني-تاريحي ماڭىزى زور باسقا دا قالالاردا وتكىزۋگە بولادى. ءبىزدىڭ الداعى كوپجاقتى قارىم-قاتىناسىمىزدىڭ باسىم باعىتتارى تۇركىستان دەكلاراتسياسىندا باياندالعان»، - دەپ تولىقتىردى سەنات ءتوراعاسى.

بۇعان دەيىن حابارلانعانداي تۇركىستاندا ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمى وتۋدە. قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ورتالىق ازيا مەملەكەتتەرىنىڭ پارلامەنتارالىق فورۋمىنا قاتىسۋشىلارعا قۇتتىقتاۋ حات جولدادى.

سونىمەن قاتار فورۋم جۇمىسىندا قانداي ماڭىزدجى ماسەلەلەر كوتەرىلەتىندىگى دە ايتىلدى.

شارا بارىسىندا وا ەلدەرىنىڭ پارلامەنتارالىق جيىنىندا تۇركىستان دەكلاراتسياسى قابىلدانادى.