تۇركيادا ءزىلزالادا ءىز-ءتۇزسىز كەتكەن ميربولات قۇرماشەۆتىڭ دەنەسى تابىلدى

استانا. قازاقپارات - تۇركيادا جوعالعان قازاقستاندىق ميربولات قۇرماشەۆتىڭ دەنەسى تابىلدى، دەپ حابارلايدى قازاقپارات.

بۇل جايىندا تۇركيانىڭ حاتاي قالاسىندا جەر سىلكىنىسىنەن كەيىن حابار-وشارسىز كەتكەن قازاقستاندىقتاردى ىزدەۋگە اتتانعان باستاماشىل توپ Telegram پاراقشاسىندا مالىمدەدى.

«ءبىز ودان ايىرىلىپ قالدىق» دەپ جازىلعان حابارلامادا.

ميربولات قۇرماشەۆتىڭ دەنەسىن ءبىزدىڭ قۇتقارۋشىلار ءۇيىندى استىنان الىپ شىققان.

«تۇركيانىڭ حاتاي پروۆينتسياسىنداعى تولىعىمەن قيراعان عيماراتتان قازاقستاندىق قۇتقارۋشىلاردىڭ كۇشىمەن ەكىنشى قازاقستاندىقتىڭ دەنەسى شىعارىلدى. ءۇيىندى جاعدايىنداعى قوزعالىس كەزىندە ىزدەستىرۋ بارىسىندا قۇتقارۋشىلار الدىن الا بەلگىلەنگەن ىزدەستىرۋ ورنىنا جەتۋ ءۇشىن بارىنشا جەدەل تۇردە ارنايى ويىق جاسادى. قۇتقارۋشىلار كىشكەنتاي بوس ورىندار ارقىلى ويىقتىڭ ىشىنە كىردى. بۇل رەتتە قۇتقارۋشىلار قۇرىلىمدىق ەلەمەنتتەر قايتا قۇلاماس ءۇشىن توسقاۋىلدا كىشكەنتاي ساڭىلاۋ جاساۋعا تىرىستى، ۇيىندىدە قاۋىپتى ۋچاسكەلەردى بەكىتتى، ءۇيىندى بولشەكتەرىن كوتەرىپ، جىلجىتتى» دەپ حابارلادى توتەنشە جاعدايلار مينيسترلىگى.

ەسكە سالا كەتەيىك، ءبىز بۇعان دەيىن Astana Hub تەحنوپاركىنىڭ حالىقارالىق اگەنتى ميربولات قۇرماشەۆتىڭ تۇركيادا جوعالىپ كەتكەنىن حابارلاعان ەدىك.

جەر سىلكىنىسىنەن كەيىن ميراسپەن بايلانىس ۇزىلگەن.

اعاسى المات قۇرماشەۆتىڭ ايتۋىنشا، ءزىلزالا كەزىندە ول تۇركيانىڭ حاتاي قالاسىندا بولعان.

كەيىن ميرۋس قۇرماشەۆتىڭ تاعى ءۇش ارىپتەسى بايلانىسقا شىقپاي قالدى. ونىڭ ەكەۋى قازاقستاندىقتار جانە ءبىرى - تۇركيا ازاماتى.

ونىڭ ىشىندە سابينا مامادياروۆا امان تابىلدى، ال بۇگىن ءادىل قادىربەكوۆتىڭ دەنەسى ءۇيىندى استىنان شىعارىلدى. ءۇشىنشى ادام - تۇركيا ازاماتى دا مەرت بولعان.