قازاقستاندىقتاردى ىزدەۋ ءۇشىن قۇتقارۋشىلارىمىز حاتايعا جەتتى - ت ج م باسشىسى توقايەۆقا ەسەپ بەردى
قازاقپارات بۇل تۋرالى اقورداعا سىلتەمە جاساپ حابارلايدى.
مينيستر پرەزيدەنتكە تۇركيانىڭ جويقىن جەر سىلكىنىسىنەن زارداپ شەككەن ايماقتارىندا قازاقستاندىق قۇتقارۋشىلاردىڭ جۇرگىزىپ جاتقان ىزدەستىرۋ-قۇتقارۋ جۇمىستارى تۋرالى باياندادى.
توتەنشە جاعدايلار مينيسترلىگىنىڭ قىزمەتكەرلەرى قيىن جاعدايلارعا قاراماستان، جەرگىلىكتى اتقارۋشى ورگاندارمەن تىعىز بايلانىسا وتىرىپ، جوعارى كاسىبيلىك تانىتىپ، ءوز مىندەتتەرىن ناتيجەلى اتقارىپ جاتىر. ازىرگە امان قالعان 4 ادام قۇتقارىلدى.
مەملەكەت باسشىسىنىڭ تاپسىرماسىمەن قۇتقارۋشىلار مەن كينولوگتار توبى حابارسىز كەتكەن قازاقستان ازاماتتارىن ىزدەۋ ءۇشىن بۇگىن تاڭەرتەڭ حاتايعا كەلدى.
قاسىم-جومارت توقايەۆ قازاقستاندىق قۇتقارۋشىلاردىڭ جۇمىسىنا وڭ باعا بەرىپ، ولارعا ساتتىلىك تىلەدى.
سونىمەن قاتار پرەزيدەنت ۇكىمەتكە يسلام ىنتىماقتاستىق ۇيىمى ارقىلى سيرياعا گۋمانيتارلىق كومەك جىبەرۋدى تاپسىردى.
ەسكە سالايىق، مەملەكەت باسشىسى ۇكىمەتكە جويقىن جەر سىلكىنىسى سالدارىنان زارداپ شەككەن تۇركيا رەسپۋبليكاسىنا شۇعىل كومەك رەتىندە 1 ميلليون دوللار ءبولۋدى تاپسىرعان بولاتىن
سونداي-اق پرەزيدەنت تاپسىرماسىمەن قۇتقارۋشىلار مەن دارىگەرلەر ەنگەن قازاقستان قۇتقارۋشىلارىنىڭ ەكى توبى تۇرىك ەلىندە ىزدەستىرۋ-قۇتقارۋ جۇمىستارىن جۇرگىزىپ جاتىر. ءبىرىنشى ەشالون – 7-اقپاندا، ەكىنشىسى 8-اقپاندا جەتتى.
قازىر تۇركياداعى جەر سىلكىنىسى كەزىندە جوعالىپ كەتكەن قازاقستاندىقتار ىزدەستىرىلىپ جاتىر. ولاردىڭ ءبىرى - سابينا مامادياروۆا 8-اقپان كۇنى كەشكە امان تابىلدى.
بۇگىن قازاقستان قۇتقارۋشىلارى ءۇيىندى استىنان 3 ادامدى امان الىپ شىققانى حابارلاندى.
تۇركيانىڭ توتەنشە جاعدايلار مەن اپاتتار جونىندەگى باسقارماسىنىڭ (AFAD) دەرەگىنە سايكەس، 6-اقپان كۇنى كاحرامانماراش- پازاردجيك اۋدانىندا 7,7 بالل قۋاتىمەن جانە ەلبيستاندا 7,6 بالل قۋاتىمەن جەر سىلكىنگەننەن كەيىن 648 افتەرشوك بولدى. جەراستى ءدۇمپۋى ەلدىڭ 10 پروۆينتسياسىندا، سونداي-اق كورشىلەس ەلدەردە، سونىڭ ىشىندە سيريادا سەزىلدى.
سوڭعى مالىمەتكە سايكەس، ءزىلزالا سالدارىنان 12391 ادام كوز جۇمدى، 62914 ادام جاراقات الدى.
ال سيريا دەنساۋلىق مينيسترلىگىنىڭ سوڭعى اقپاراتىنا سۇيەنسەك، ەلدە كەم دەگەندە 2,8 مىڭ ادام قازا بولدى، 5 مىڭنان استام ادام جاراقات الدى.
