باتىس قازاقستان وبلىسىنداعى اۋىلعا توتەنشە جاعداي جاريالاندى

استانا. قازاقپارات - باتىس قازاقستان وبلىسى، تەرەكتى اۋدانىنىڭ تەرەكتى اۋىلدىق وكرۋگىندە تەحنوگەندىك سيپاتتاعى توتەنشە جاعداي جاريالاندى.

بۇل تۋرالى ەلدى مەكەن اكىمدىگىنىڭ «اشىق» ن ق ا پورتالىنا ورنالاستىرعان شەشىم-جوباسىندا جازىلعان، دەپ حابارلايدى قازاقپارات ءتىلشىسى.

«30-قاڭتاردا قابىل توبە اۋىلىنداعى قۇدىقتاردان سۋ ايداۋ توقتاتىلدى. سەبەبى، تەرەكتى اۋىلىنا اۋىز سۋ بەرەتىن 5 سۋ سورعىشتىڭ بىرەۋى ىستەن شىقتى. قالعان سۋ سورعىشتار قاجەتتى قىسىمدى بەرە المايتىندىقتان، قازىرگى ۋاقىتتا 1859 تۇرعىن ءۇي، 51 الەۋمەتتىك نىسان ورتالىقتاندىرعان اۋىز سۋسىز وتىر. سەبەبى قالعان 4 سۋ سورعىشتىڭ توزۋى 43 پايىزدى قۇرايدى.

ونىمەن قوسا، مەملەكەتتىك باعدارلامامەن سالىنعان 27 تۇرعىن ءۇي (26 سى - ءبىر پاتەرلى جەكە ءۇي، بىرەۋى - 36 پاتەرلى ءۇش قاباتتى ءۇي) جىلۋسىز قالدى.

سەبەبى بۇل ۇيلەردە جىلىتۋ جۇيەسى ورتالىقتاندىرىلعان سۋ جۇيەسىمەن بىرىكتىرىلگەن. سۋ قىسىمى تومەندەگەن كەزدە گاز قازاندىعى جىلىتۋ جۇيەسىنىڭ جۇمىسىن اۆتوماتتى تۇردە توقتاتقان (توتەنشە جاعدايدىڭ الدىنا لۋ ءۇشىن). بۇل ۇيلەردىڭ سۋىپ كەتۋىنە الىپ كەلدى. قازىرگى ۋاقىتتا اتالعان ءۇي تۇرعىندارى وزگە جەرلەرگە كوشىپ جاتىر»، - دەلىنگەن قۇجاتتا.

شەشىمگە قوسىمشا بەرىلگەن تۇسىندىرمەدە جازىلعانداي، اتالعان جاعدايدى رەتتەۋ ءۇشىن ەلدى مەكەندە تەحنوگەندىك سيپاتتاعى توتەنشە جاعداي ەنگىزىلمەك. قۇجاتتا تەرەكتى اۋىلىنىڭ اكىمى ا. اۋباكىروۆ جوندەۋ جۇمىستارى مەن جاڭا سورعىلاردى ساتىپ الۋ ءۇشىن اۋدان اكىمدىگىنەن قوسىمشا قاراجات ءبولۋ قاجەتتىگىن كورسەتكەن.

شەشىم-جوباسى پورتالعا 8-اقپاندا ورنالاستىرىلىپ، 9-اقپانعا دەيىن تالقىلاۋدا بولدى جانە العاش جاريالانعان كۇنىنەن باستاپ كۇشىنە ەندى.