تۇركياداعى جەر سىلكىنىسىنەن كەيىن حابارسىز كەتكەن سابينا مامادياروۆا امان تابىلدى
تۇركيانىڭ حاتاي پروۆينتسياسى، انتاكيا قالاسىندا حابارسىز كەتتى دەلىنگەن قازاقستاندىقتاردى ىزدەۋگە شىققان توپ سابينا مامادياروۆانىڭ امان تابىلعانىن حابارلادى. ولاردىڭ مالىمەتى بويىنشا، وتانداسىمىزدىڭ قولى سىنعان. قازىر ونى اۋرۋحاناعا اپارا جاتىر.
«قازىر قۇتقارۋشىلار ۇيىندىلەردى ارشۋ جۇمىستارىن جەدەل اتقارىپ جاتىر. قالعاندارى دا سابينا تابىلعان تۇستان الىستا بولماۋى كەرەك. اقپارات پايدا بولعان ساتتە- اق حابارلايمىز»،-دەپ جازدى ىزدەۋشى توپ وكىلدەرى.
ق ر س ءى م باسپا ءسوز قىزمەتى تاراتقان مالىمەتكە ساي، 7 -اقپاندا مينيسترلىكتىڭ «جەدەل جەلىسىنە» 4 دوس جەر سىلكىنىسىنەن كەيىن بايلانىسقا شىقپاي قالعانى تۋرالى قوڭىراۋ تۇسكەن. ولاردىڭ ۇشەۋى ق ر ازاماتى، ال ءتورتىنشىسى تۇركيا ازاماتى.
«جوعالعان جاستاردىڭ سوڭعى ورنالاسقان جەرىن تۋىستارىنان ءبىلىپ، ءبىزدىڭ ديپلوماتتارىمىز دەرەۋ تۇرىك بيلىگىنە حابارلاستى. قازاقستاننىڭ ەلشىسى ەركەبۇلان ساپيەۆ تۇركيانىڭ ىشكى ىستەر مينيسترلىگىنىڭ باسشىلىعىمەن كەلىسسوزدەر جۇرگىزىپ، ناتيجەسىندە حاتاي پروۆينتسياسىنىڭ انتاكيا قالاسىنداعى اتالعان مەكەن- جاي بويىنشا قۇتقارۋشىلار توبى جىبەرىلدى.
قازىر وتانداستارىمىزدى سوڭعى رەت كورگەن ۇيدە ىزدەستىرۋ- قۇتقارۋ وپەراتسياسى جالعاسۋدا. ازىرشە سابينا مامادياروۆا مەن ولاردىڭ تۇرىك دوسى كۋبيلاي كەسكين تابىلدى. ەكەۋى دە امان- ساۋ، ولاردى دارىگەرلەر تەكسەرۋى كەرەك. جۇمىس جالعاسۋدا. قالعان جىگىتتەر دە امان- ەسەن تابىلادى دەپ ۇمىتتەنەمىز» دەلىنگەن ۆەدومستۆو حابارلاماسىندا.
بۇعان دەيىن تۇركيانىڭ وڭتۇستىك- شىعىسىنداعى جەر سىلكىنىسىنەن كەيىن بىرنەشە قازاقستاندىقتىڭ حابارسىز كەتكەنى تۋرالى مالىمەت پايدا بولعان ەدى.
