پرەمەر ازىق-تۇلىك باعاسىن رەتتەي الماعان اكىمدىكتەردىڭ جۇمىسىن سىنعا الدى
«ءبىزدىڭ مىندەتىمىز – 2023-جىلدىڭ قورىتىندىسى بويىنشا ينفلياتسيانىڭ دەڭگەيىن 10 پايىزدان اسىرماۋ. بۇعان قول جەتكىزۋگە ابدەن بولادى. تەك بۇل ءۇشىن بارلىق ءوڭىردىڭ ازىق-تۇلىك باعاسىن تۇراقتاندىرۋ، اسىرەسە، ماۋسىمارالىق كەزەڭدە باعانى ۇستاپ تۇرۋ بويىنشا بەلسەندى جۇمىسى قاجەت. سىزدەردە قاجەتتى قۇرالداردىڭ ءبارى بار. ءبىز وتكەن جىلعى ەگىننەن قاجەتتى قور جيناقتاپ الدىق. سوندىقتان، بەلگىلەنگەن باعامەن كوكونىس ونىمدەرىنەن تاپشىلىق بولماۋى ءتيىس ەدى. اكىمدەرگە باعانى ۇستاۋ ءۇشىن قاجەتتى تەتىكتەردىڭ بارلىعىن بەردىك. قارجى دا ءبولىندى. ءبىراق باعا ءبارىبىر ءوسىپ جاتىر. اكىمدىكتەردىڭ ءتيىمدى جۇمىسىن كورىپ وتىرعان جوقپىز»، - دەدى ءاليحان سمايىلوۆ ۇكىمەت وتىرىسىندا.
ونىڭ اتاپ وتۋىنشە، جەرگىلىكتى جەرلەردە اتالعان ماسەلەگە سالعىرت قاراۋدىڭ سالدارىنان باعانىڭ ءوسۋى توقتايتىن ەمەس.
«ماسەلەن، وڭىرلەرگە پياز بويىنشا كەلىسىمشارت جاساۋ تاپسىرىلدى. اكىمدەر ءونىم كولەمى جەتكىلىكتى دەپ بىرنەشە رەت ايتتى. وندا پياز نەلىكتەن قىمباتتادى؟ كەلىسى - 400 تەڭگە! ءبىزدىڭ ەلىمىزدە پياز كوپ وسەدى. الايدا، باعانى تومەندەتۋ ءۇشىن پياز ەكسپورتىنا تىيىم سالىپ، شۇعىل شارالار قابىلداۋعا ءماجبۇر بولدىق. ءبىز ءبىرىنشى كەزەكتە، ءونىم وندىرۋشىلەردى قارجىلاندىرۋ ءۇشىن فورۆاردتىق ساتىپ الۋ مەحانيزمدەرىن قايتا قارادىق. الايدا، اكىمدىكتەر جەتكىزۋشىلەرگە قارجى ءبولۋدى دوعارار ەمەس. وكىنىشكە وراي، ول دەلدالداردى كوبەيتكەننەن باسقا ناتيجە بەرىپ وتىرعان جوق. وڭىرلەرگە ءتيىمدى باعامەن تۇراقتاندىرۋ قورلارىن تولتىرىپ الۋعا مۇمكىندىك بەرىلدى. ءبىراق، اتقارىلعان جۇمىستى كورە الماي وتىرمىز. جىلدىڭ باسىنان بەرى ساۋدا سالاسىندا زاڭدىلىقتى بۇزۋدىڭ ەشقانداي فاكتىسى انىقتالماعان»، - دەدى ول.
ۇكىمەت باسشىسى بارلىق اكىمدىكتەرگە وڭىرلىك كوميسسيالاردىڭ جۇمىسىن جاقسارتۋ ءۇشىن الگوريتمدەر مەن ۇسىنىستار جىبەرىلگەنىنە نازار اۋدارتتى.
«الايدا، وڭىرلەردى كوميسسيا وتىرىستارىن وتكىزۋگە «قيناعانداي ەتىپ» ماجبۇرلەپ وتىرمىز. ونىڭ ءوزى دە ەشقانداي ناتيجە بەرىپ وتىرعان جوق. تاعى دا قايتالاپ ايتامىن. ازىق-تۇلىك ونىمدەرىنە باعانى تۇراقتاندىرۋ - ۇكىمەت پەن جەرگىلىكتى اتقارۋشى ورگانداردىڭ اسا ماڭىزدى نەگىزگى مىندەتى. جۇمىسقا نەمقۇرايلى قاراۋ ورىن السا جانە ناتيجە بولماسا ءتيىستى شەشىمدەر قابىلدانادى. بۇل تۋرالى بۇعان دەيىن دە ايتىلدى»، - دەپ ەسكەرتتى پرەمەر- مينيستر.
