ۇلى بريتانيادا مەدبيكەلەردىڭ تاريحتاعى ەڭ ءىرى ەرەۋىلى بولىپ جاتىر

استانا. قازاقپارات - بۇگىن ۇلى بريتانيادا مەديتسينا قىزمەتكەرلەرىنىڭ ەل تاريحىنداعى ەڭ ءىرى ەرەۋىلى بولىپ جاتىر.

مەدبيكەلەر مەن جەدەل كومەك قىزمەتكەرلەرى نارازىلىق اكسياسىنا شىقتى، دەپ حابارلايدى قازاقپارات ءتىلشىسى.

450 مىڭنان استام مۇشەسى بار RCN كاسىپوداعى جاقتاستارىن كوشەگە شىعۋعا شاقىرۋدا. كاسىپوداق مۇنداي قادامعا پرەمەر-مينيستر ريشي سۋناكتى قىسىمعا الىپ، ەل ۇكىمەتىن ىمىراعا كەلۋگە ماجبۇرلەۋى ءۇشىن بارىپ وتىر.

دۇيسەنبى كۇنى قاتارلارىنا GMB جانە Unite كاسىپوداقتارىنىڭ وكىلدەرى - 10 مىڭنان استام جەدەل كومەك قىزمەتكەرلەرى قوسىلعان دەنساۋلىق ساقتاۋ سالاسىنىڭ قىزمەتكەرلەرى جالاقىلارىن ينفلياتسيادان 5 پايىزعا جوعارى كوتەرۋدى تالاپ ەتىپ جاتىر.

2022-جىلدىڭ قازانىندا ۇلى بريتانيادا تۇتىنۋشىلىق باعا جىلدىق ەسەپتەۋدە 11,1 پايىزعا ءوستى. بۇل ەلدەگى 1981-جىلدان بەرگى ەڭ جوعارى كورسەتكىش سانالادى.

ايتا كەتەرلىگى، دەنساۋلىق ساقتاۋ ءمينيسترى ستيۆ باركلاي كاسىپوداقتارعا رايلارىنان قايتۋعا شاقىرىپ، ۇكىمەت جالاقىنى ينفلياتسيادان جوعارى كوتەرە المايتىندىعىن العا تارتىپ وتىر.

RCN كاسىپوداعىنىڭ مالىمەتىنشە، 2021-جىلى جالاقىنىڭ تومەن بولۋى سالدارىنان 25 مىڭ مەدبيكە جۇمىستان شىعىپ كەتكەن. سونىڭ سالدارىنان ەلدە كىشى مەديتسينالىق قىزمەتكەرلەردىڭ جەتىسپەۋشىلىگى بايقالادى.

ايتا كەتەرلىگى، جەدەل قىزمەت قىزمەتكەرلەرىنىڭ بارلىعى بىردەي ەرەۋىلگە شىقپايدى جانە دە شۇعىل شاقىرتۋلارعا قىزمەت كورسەتىلەدى. سونىمەن قاتار ۋەلستە مەدبيكەلەر مەن جەدەل كومەك قىزمەتكەرلەرى جالاقىلارىنا قاتىستى ۇسىنىستى قابىل الىپ، جوسپارلى ەرەۋىلگە شىعۋدان باس تارتتى. ال شوتلانديانىڭ مەديتسينا قىزمەتكەرلەرى جەرگىلىكتى ۇكىمەتپەن كەلىسسوز جۇرگىزىپ جاتىر.

RCN كاسىپوداعىنىڭ مەدبيكەلەرى مەن مەيىرگەرلەرى ەرەۋىلى ەرتەڭ دە جالعاستىرماق. ال جەدەل جاردەم بريگادالارى سەيسەنبى كۇنى جۇمىسقا تولىق شىققانىمەن جۇما كۇنى نارازىلىقتارىن قايتادان بىلدىرۋگە ۇمتىلماق.