ءتۇسى اق ەمەس قوڭىر: ادام سۇيەكتەرى تۋرالى قىزىق دەرەكتەر

استانا. قازاقپارات - عالىمداردىڭ پىكىرىنشە، ادام مەن جانۋارلاردىڭ قاڭقاسى ەۆوليۋتسيانىڭ تاڭعاجايىپ ۇلگىسى.

بۇل بيولوگيالىق قۇرىلىمنىڭ ءاربىرىنىڭ ءوزىنىڭ ورنى مەن اتقاراتىن قىزمەتى بار. ياعني، ءاربىر سۇيەكتىڭ كۇردەلى ساعات مەحانيزمىندەگى بەرىلىس سياقتى بەلگىلى ءبىر ءپىشىنى، ولشەمى، قۇرىلىمى جانە قاڭقادا ورنالاسۋى بولادى. ادام اعزاسىندا 206 سۇيەك بار دەپ ايتىلادى. ءبىراق بۇل ناقتى ەمەس. ويتكەنى سۇيەك سانى 200 دەن 213 كە دەيىن بولۋى مۇمكىن. بۇل كوپتەگەن ۇساق سۇيەكتىڭ جاس ۇلعايۋىمەن بىرگە وسۋىنە بايلانىستى. ايتپاقشى، ولار ادەتتە اق ەمەس، قوڭىر ءتۇستى كەلەدى.

قاڭقانىڭ قاي سۇيەكتەرى سىنعىش كەلەدى؟

ەڭ سىنعىش سۇيەك - بۇل يىقتى ءتوس سۇيەگىمەن بايلانىستىراتىن بۇعانا. ءبىراق بۇعانادان گورى قابىرعالار كوپ سىنادى. اسىرەسە ادامدار 5-8-قابىرعاسىن ءجيى سىندىرادى.

سۇيەكتەر اراسىندا كەڭ تارالعان اۋرۋ

ەڭ ءجيى كەزدەسەتىن سۇيەك اۋرۋى - وستەوپوروز، وندا سۇيەكتەر نازىك جانە سىنعىش كەلەدى. دۇنيەجۇزىلىك دەنساۋلىق ساقتاۋ ۇيىمىنىڭ ستاتيستيكاسى بويىنشا بۇل اۋرۋعا ەۋروپا، ا ق ش جانە جاپونيانىڭ 75 ميلليون ازاماتى شالدىققان. ونىڭ ۇستىنە، ەۋروپادا وستەوپوروزبەن بايلانىستى سۇيەك سىنىقتارىنان ولەتىن ادامدار قاتەرلى ىسىككە قاراعاندا كوبىرەك. سوندىقتان ونى دارىگەرلەر 21-عاسىر دەرتىنىڭ ءبىرى سانايدى.

بۇل قانداي اۋرۋ جانە قالاي پايدا بولادى؟

وستەوپوروز - بۇل زات الماسۋىنىڭ بۇزىلۋىمەن بايلانىستى جۇيەلى اۋرۋ. بۇل سۇيەك مەتابوليزمىنىڭ بۇزىلۋى ناتيجەسىندە سۇيەك تىعىزدىعىنىڭ تومەندەۋىنە اكەلەدى.

ەۋروپادا قاتەرلى ىسىككە قاراعاندا وستەوپوروزدان كوپ ادام ولەدى.

بۇل اۋرۋدىڭ دامۋىنا اسەر ەتەتىن ءارتۇرلى سەبەپتەر بار: گەنەتيكالىق بەيىمدىلىك، ءومىر سالتى، فيزيكالىق بەلسەندىلىك، سوزىلمالى اۋرۋلاردىڭ بولۋى، ءدارى-دارمەك، قارتايۋ جانە ت. ب.

قاڭقانىڭ قۇرامىنا كىرمەيتىن سۇيەكتەر

ەگەر ءسىز ادام اعزاسىنداعى بارلىق سۇيەكتەر قاڭقانىڭ ءبىر بولىگى دەپ ويلاساڭىز، قاتەلەسەسىز. ولاردىڭ كەيبىرەۋلەرى وزدىگىنەن ورنالاسادى، ياعني قاڭقا سۇيەكتەرىمەن بايلانىسپايدى. ونىڭ ءبىر مىسالى رەتىندە «ادام دەنەسىندەگى جالعىز سۇيەك» دەپ اتالاتىن ءتىل استىنداعى سۇيەكتى (os hyoideum) اتاۋعا بولادى. ول ءتىلدىڭ تۇبىندە ورنالاسادى جانە باسقا سۇيەكتەرمەن جاناسپايدى، بۋىندارى بولمايدى.

ءتىل استىنداعى سۇيەك V- ءتارىزدى. ول قالقانشا شەمىرشەك پەن يەك اراسىندا ورنالاسقان. وسى قۇرىلىمنىڭ ارقاسىندا ادام ءتىلى قوزعالمالى جانە ءارتۇرلى دىبىستاردى شىعارادى.

سونداي-اق ەستۋ سۇيەكشەلەرى قاڭقاعا جاتپايدى. ولار تەك ءبىر-بىرىمەن بايلانىسقان. بۇل سۇيەكتەر دىبىس تەربەلىستەرىن ىشكى قۇلاققا جەتكىزەدى. ياعني، وسى سۇيەكتەردىڭ ارقاسىندا ءبىز بەلگىلى ءبىر جيىلىك دياپازونىندا ءارتۇرلى دىبىستاردى ەستي الامىز.

ەيفەل مۇناراسى جىلىنشىك سۇيەگىنە ۇقساس ەتىپ قۇرىلعان

جوعارىدا ءبىز ادام قاڭقاسىنداعى قانداي سۇيەكتەردىڭ سىنعىش كەلەتىنىن بىلدىك، ەندى ەڭ كۇشتى سۇيەككە توقتالامىز. ادام قاڭقاسىنداعى ەڭ قاتتى سۇيەك - جىلىنشىك. سىرتقى تۇرىنە قاراپ بۇل سۇيەكتى سىنعىش دەپ ويلاۋىڭىز مۇمكىن ءبىراق ول - 1650 ك گ جۇك كوتەرە الادى.

ەيفەل مۇناراسى ادامنىڭ جىلىنشىك سۇيەگى پرينتسيپى بويىنشا جاسالعان. بۇل فاكت ساۋلەتشى ەيفەلگە جاقسى بەلگىلى بولدى، سوندىقتان ول ادام سۇيەگىنە ۇقساس مۇنارانى جوبالادى - مۇنارانىڭ تىرەۋىشتەرى جىلىنشىككە ۇقساس تۇردە بولىنەدى. بۇل قۇرىلىمعا اۋىر جۇككە توتەپ بەرۋگە مۇمكىندىك بەرەدى.

massaget.kz