قازاقستاندا دزيۋدودان الەمدىك جارىس وتەدى
پاريجدە ءوتىپ جاتقان Grand Slam جارىسى اياسىندا قازاقستان دزيۋدو فەدەراتسياسى مەن حالىقارالىق دزيۋدو فەدەراتسياسىنىڭ رەسمي كەزدەسۋى ءوتتى. كەزدەسۋ بارىسىندا حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر مەن قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەيەۆ ەكىجاقتى كەلىسىمشارتقا قول قويدى.
ەكىجاقتى كەلىسىمشارتقا سايكەس، قازاقستان الەمدىك Grand Slam جارىسىن 2023-2026-جىلدار ارالىعىندا قابىلدايدى. جارىس استانا جانە الماتى قالالارىندا «Qazaqstan barysy Grand Slam» اتاۋىمەن وتكىزىلەدى. سونداي-اق، جارىس اياقتالعاننان كەيىن جىل سايىن تۇراقتى تۇردە حالىقارالىق وقۋ-جاتتىعۋ لاگەرى ۇيىمداستىرىلادى.
«قۇرمەتتى پرەزيدەنت ەسەكەيەۆ، قۇرمەتتى ب ا ق وكىلدەرى جانە دزيۋدو جانۇياسىنىڭ بارلىق مۇشەلەرى، سپورت ەلىندە، جاڭا ەنەرگيا مەن تەحنولوگيا اكەلەتىن ەلدە ءىس-شارالارعا وسى جاڭا كەلىسىم-شارتقا قول قويۋ مەن ءۇشىن ۇلكەن قۋانىش جانە قۇرمەت. قازاقستاندا دزيۋدو تاريحى وتە تەرەڭدە جانە دزيۋدو ۇلكەن بۋىننان جاستارعا ۇزدىكسىز جالعاسىپ كەلە جاتىر. ولار ءارقاشان IJF پەن ازياعا كوپتەگەن ءىس-شارالاردى وتكىزۋ ارقىلى قولداۋ كورسەتتى. دزيۋدودان عانا ەمەس، سونىمەن قاتار ادەمى ەلدەگى بارلىق سپورت مادەنيەتى مەن قۇندىلىقتارى ءۇشىن بۇقارالىق اقپارات قۇرالدارىندا جاڭا تانىمالدىق اكەلەتىن جاڭا سەرىكتەستىك ءۇشىن راحمەت. قازاقستان دزيۋدوسىنا جەمىستى بولاشاق تىلەيمىن»، - دەدى حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر مىرزا.
ءوز كەزەگىندە قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەيەۆ ماريۋس ۆيزەر مىرزاعا سەنىم بىلدىرگەنى ءۇشىن العىس ءبىلدىرىپ، جارىستى جوعارى دەڭگەيدە وتكىزەتىنىن مالىمدەدى.
«ۆيزەر مىرزاعا بىزگە قولداۋ بىلدىرگەنى ءۇشىن راحمەت. Grand Slam-دەگى العاشقى قادام ءبىزدى دزيۋدو وتباسىنا ودان ءارى جاقىنداتادى. ءبىز قاتىسۋشىلار قازاقستاندى جاقسى تانىپ ءبىلۋ ءۇشىن جارىستى جىلدىڭ ەڭ تاماشا ۋاقىتىندا وتكىزەتىن بولامىز. ءبىزدىڭ تاراپىمىزدان قازاقستاندىق سپورتشىلار بار كۇشىن سالادى. بۇل ىنتىماقتاستىق ۇلتتىق جانە حالىقارالىق دەڭگەيدە ودان ءارى وسۋگە كومەكتەسەدى»، - دەدى قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەيەۆ.
انىقتاما:
Grand Slam - حالىقارالىق جارىس كۇنتىزبەسىنە سايكەس IJF World Tour اياسىندا وتكىزىلەتىن الەمدىك جارىستار سەرياسى. IJF ەرەجەسى بويىنشا، جارىس جەڭىمپازى مەن جۇلدەگەرلەرىنە الەمدىك جانە وليمپيادالىق رەيتينگتەردە ۇپاي ۇلەستىرىلەدى. اتاپ ايتقاندا، 1-ورىنعا 1000، 2-ورىنعا – 700، ال 3-ورىنعا 500 ۇپايدان بەرىلەدى.
Qazaqstan barysy Grand Slam جارىسىندا دزيۋدوشىلار 2024-جىلى پاريج جانە 2028-جىلى لوس-اندجەلەستە وتەتىن جازعى وليمپيادا ويىندارىنا ۇپاي جينايدى.
