ءبيبىسارا اساۋبايەۆا الداعى جارىستار تۋرالى: ۇزدىك ويىن مانەرىن كورسەتەمىن
«بيىل كلاسسيكالىق شاحماتتان ايەلدەر اراسىندا بىرنەشە تۋرنير وتەدى. وسى ورايدا ەڭ ۇزدىك ويىن مانەرىن كورسەتۋدى ماقسات ەتىپ وتىرمىن»، - دەدى ءبيبىسارا اساۋبايەۆا ەفير كەزىندە.
سونداي-اق جاس چەمپيون شاحماتتان قازاقستان قۇراماسىن الەمدەگى ەڭ مىقتى كوماندالار قاتارىنان كورگىسى كەلەتىنىن ايتتى.
«مەنىڭشە، بالالار جەتىستىكتى كورگەندە، موتيۆاتسيا الا تۇسەدى. كىشكەنتاي كەزىمدە ەڭ مىقتى شاحماتشىلاردىڭ ويىنىنا قاراپ، سولارداي بولۋدى، اسىرەسە ول ءسىزدىڭ وتانداسىڭىز بولسا، سولارداي بيىككە جەتۋدى ارماندايتىنمىن. مەنىڭشە، بۇل سەرپىن بەرەدى. بىزدە جەتكىنشەكتەر اراسىندا مىقتى شاحماتشى قىزدار كوپ. ۇلدار جاعى دا تارتىلىپ، الەمدەگى ەڭ مىقتى قۇرامالاردىڭ ءبىرى بولامىز دەگەن ۇمىتتەمىن»، - دەيدى ول.
ودان بولەك، ءبيبىسارا اساۋبايەۆا جاس شاحماتشىلارعا ءوز كەڭەسىن بەردى.
«كوپ جۇمىس ىستەپ، وزىنە سەنە ءبىلۋ كەرەك. ساعان سەنەتىن جانە قولدايتىن جاندار جانىڭنان تابىلسا، ءتىپتى جاقسى. بۇل ورايدا مەن باقىتتىمىن. مەنىڭ جاقىندارىم ۇنەمى قاسىمدا. اسىرەسە جاقىن ادامداردىڭ قولداۋى جەڭىلىستىڭ ءدامىن تاتقاندا وتە ماڭىزدى. ولار قاسىڭدا بولادى. ەڭ باستىسى، باستاعان ءىستى جولدا قالدىرماي، جۇمىس ىستەۋدى جالعاستىرۋ كەرەك»، - دەگەن ويىمەن ءبولىستى الەم چەمپيونى.
بۇعان دەيىن ب. اساۋبايەۆا مەملەكەت باسشىسى قاسىم-جومارت توقايەۆپەن كەزدەسۋىنەن كەيىنگى اسەرىمەن بولىسكەن ەدى.
