نازاربايەۆ زياتكەرلىك مەكتەبىندە وقۋ گرانتىنىڭ سوماسى قانشا؟
2023 -جىلى نازاربايەۆ زياتكەرلىك مەكتەبىندە وقۋ گرانتىنىڭ سوماسى جاتاقحانا اقىسىن قوسقاندا 3 ميلليون تەڭگەدەن اسادى. بۇل تۋرالى اشىق ن ق ا پورتالىندا جاريالانعان «وركەن» ءبىلىم بەرۋ گرانتىن بەرۋ قاعيدالارىن جانە ونىڭ مولشەرلەرىن بەكىتۋ تۋرالى ۇكىمەت قاۋلىسىنا ەنگىزىلەتىن وزگەرىستەر جوباسىنان بەلگىلى بولدى.
وعان سايكەس، گرانت مولشەرى كەلەسى ماندەرگە يە بولادى:
گرانت سوماسى: 2172539 تەڭگە (بۇرىنعى سوماسى 2140733 تەڭگە)؛
جاتاقحانا اقىسىن قوسقانداعى گرانت سوماسى: 3070221 تەڭگە (بۇرىنعى سوماسى 3038333 تەڭگە).
ەسكە سالايىق، گرانتتىڭ سوماسى جىل سايىن يندەكستەلۋى مۇمكىن.
ايتا كەتەيىك، نازاربايەۆ زياتكەرلىك مەكتەبىنە ەندى تەك 7-سىنىپ وقۋشىلارى عانا قابىلدانادى. سونىمەن بىرگە نازاربايەۆ مەكتەبىنىڭ وقۋشىلارى باسقا ەل ازاماتتىعىن السا، گرانتتان ايىرىلادى.
سونداي-اق، قاۋلى جوباسىنىڭ جاڭا مازمۇنىندا 2023-2025 -جىلدارعا ارنالعان رەسپۋبليكالىق بيۋدجەتتە نازاربايەۆ زياتكەرلىك مەكتەپتەرىندە مەملەكەتتىك ءبىلىم بەرۋ تاپسىرىسىن ىسكە اسىرۋعا ارنالعان شىعىستار سوماسى قولداۋ تاپقانى جازىلعان. وعان سايكەس، 2023-2025 -جىلدارى ن ز م مەكتەپتەرىنە ارنالعان وقۋ گرانتتارىن تاعايىنداۋعا 100 ميلليارد تەڭگە شاماسىندا قاراجات رەسپۋبليكالىق بيۋدجەتتەن بولىنەدى:
2023 -جىلى - 32874165 مىڭ تەڭگە؛
2024 -جىلى - 33971483 مىڭ تەڭگە؛
2025 -جىلى - 33604084 مىڭ تەڭگە.
قۇجات جوباسى 13-اقپانعا دەيىن قوعامنىڭ جاريا تالقىسىنا ۇسىنىلعان.
