ارام ويمەن نەسيە الىپ، بانكروتتىق جاريالاعاندار قاتاڭ جازالانادى

استانا. قازاقپارات - جەكە تۇلعالاردىڭ بانكروتتىققا وتىنىشتەرى ناۋرىزدان باستاپ قابىلدانادى. ءبىر ايدان كەيىن ەلدە ءتيىس زاڭ كۇشىنە ەنەدى.

بۇل باعدارلاما ميلليوننان اسا قازاقستاندىقتى قامتيدى دەپ جوسپارلانعان، - دەپ حابارلايدى 24.kz.

بانكروتتىقتىڭ ءۇش ءتۇرى بار. ءبىرىنشى، سوتتان تىس بانكروتتىق. قارجى مينيسترلىگىنىڭ مالىمەتىنشە، ەڭ كوپ شاعىم وسى باعىت بويىنشا. سوتتان تىس بانكروتتىقتى تەك بانكتەر، ميكروقارجىلىق ۇيىمدار جانە كوللەكتورلىق اگەنتتىكتەر الدىنداعى قارىزدار بويىنشا قولدانۋعا بولادى. بۇل ءۇشىن بورىشكەر كرەديتورلارمەن رەتتەۋ ءراسىمىن وتكىزۋى قاجەت جانە بورىشكەردىڭ مەنشىكتى مۇلكى بولماۋى ءتيىس. سوتتان تىس بانكروتتىققا جۇگىنۋ ءۇشىن بورىشكەردىڭ قارىزى كەيىنگى 12 ايدا تولەنبەگەن بولۋى شارت. بانكروتتىققا بەرەشەگى 5 ميلليون تەڭگەدەن اسپايتىن تۇلعالار جۇگىنە الادى.

«12 اي بويى تولەم ۋاقىتىلى تۇسپەسە، وندا تەك قانا وسى ءبىرىنشى پروتسەدۋراعا جاتادى. ەگەر جەكە تۇلعا 2-3 اي تولەمەي، وسى بانكروتتىق راسىمگە جۇگىنە المايدى. نە سەبەپتى ءبىز شەكتەۋ قويىپ وتىرمىز، سەبەبى بانكروتتىقتى كەي ازاماتتار كرەديتتى كەشىرۋ دەپ ويلاپ جاتىر. 1-2 اي تولەمەسە مەن بانكروت بولايىن دەگەن جەڭىل شەشىم قابىلداماۋى ءۇشىن 12 اي تولەنبەسە، قيىن جاعداي عانا بولسا، بانكپەن رەتتەۋ جۇمىستارى جۇرگىزىلسە عانا سودان كەيىن بانكروتتىققا كەلسىن دەگەن سالماقتى شەشىم ءۇشىن قابىلدانعان»، - دەدى قارجى ۆيتسە-ءمينيسترى ەرجان ءبىرجانوۆ.

اتاۋلى الەۋمەتتىك كومەك الۋشىلارعا قاتىستى 12 اي بويى تولەم بولماۋى ءتيىس دەگەن تالاپ قولدانىلمايدى. ولار ونلاين تۇردە سوتتان ءوتىنىش بەرە الادى. ەكىنشى ءتۇرى - سوت بانكروتتىعى. ول بورىشى 5 ميلليون تەڭگەدەن اساتىندارعا قاتىستى قولدانىلادى. بۇل راسىممەن مەملەكەتتىك كىرىستەر ورگاندارى جانە اۋداندىق باسقارمالار اينالىسادى. ءبىراق سوت پروتسەدۋراسى اقىلى جانە قارجى مەنەدجەرىنىڭ قىزمەتتەرى ءۇشىن ايىنا 70 مىڭ تەڭگە تولەۋگە تۋرا كەلەدى. الەۋمەتتىك وسال توپقا جاتاتىندار ءۇشىن بۇل قىزمەت تەگىن.

«ەگەر ادام بانكروتتىققا ارىز بەرسە، ونىڭ قارجى مەنەدجەرىنىڭ قىزمەتىنە اقى تولەۋگە مۇمكىندىگى جوق ەكەنى تۇسىنىكتى. سوندىقتان ولارعا ءبولىپ تولەۋ نەمەسە كونكۋرس نەگىزدە تولەۋ تۋرالى كەلىسىم جاساۋعا مىندەتتى. مۇندا قارجى مەنەدجەرىنىڭ جۇمىسى تەك بورىشتى ءبولىپ تولەۋگە جانە سوت بانكروتتىعىنا قاتىستى. ال سوتتان تىس بانكروت بويىنشا قارجى مەنەدجەرى كەرەك ەمەس»، - دەدى بانك ماسەلەلەرى بويىنشا تاۋەلسىز ساراپشى نۇرجان بياقايەۆ.

بورىشتى وتەۋدىڭ ءۇشىنشى ءتۇرى - تولەم قابىلەتىن قالپىنا كەلتىرۋ. تۇراقتى تابىسى بار قازاقستاندىقتار وسىنداي پروتسەدۋراعا ءوتىنىش بەرىپ، سوت ارقىلى قارىزدى بەس جىلعا دەيىن ءبولىپ تولەيدى. بورىش كولەمى مەنشىكتەگى مۇلىكتىڭ قۇنىنان اسپاۋى كەرەك. بۇل رەتتە ازامات بانكروت دەپ تانىلمايدى.

«بىرىنشىدەن، 5 جىل ىشىندە بانكتەردەن جانە ميكروقارجى ۇيىمدارىنان لومبارد پەن ميكروكرەديت الۋدان باسقا نەسيە الا المايدى. 7 جىل ىشىندە قايتا بانكروتتىقتا جۇگىنە المايدى. ولاردىڭ قارجىلىق جاعدايىن بانكروتتىقتان كەيىن ءۇش جىل بويى تەكسەرۋ پروتسەدۋرالارى جۇرگىزىلەدى. تولەم قابىلەتىن قالپىنا كەلتىرۋ كەزىندە مۇنداي سالدار قولدانىلمايدى»، - دەدى قارجى ۆيتسە-ءمينيسترى ەرجان ءبىرجانوۆ.

ساراپشىلاردىڭ ايتۋىنشا، بانكروتتىق تۋرالى زاڭ بانكتەر مەن ميكروقارجى ۇيىمدارىنىڭ بارىنە بىردەي نەسيە بەرۋىنە تەجەۋ بولادى.

ويتكەنى مەملەكەت بانكروت بولعان ادامنىڭ بورىشىن بانككە وتەپ بەرمەيدى. تەك سوت ارقىلى بانكروت دەپ جاريالاپ، بورىشكەردىڭ مۇلكىن تاركىلەگەن جاعدايدا عانا بيۋجەتتەن قارىزدى قايتارادى. ال جاڭا زاڭدى ءوز مۇددەسىنە پايدالانىپ، ارام ويمەن نەسيە العاندار جازالانادى. دۇنيە- مۇلكىن جاسىرىپ، جالعان بانكروتتىق جاريالاعانى ءۇشىن 700 مىڭ تەڭگەدەي ايىپپۇل قاراستىرىلعان.