سەنات سيفرلىق ماينينگكە قاتىستى زاڭدى ماقۇلدادى

استانا. قازاقپارات - بۇگىن سەناتتىڭ جالپى وتىرىسىندا «قازاقستان رەسپۋبليكاسىنداعى تسيفرلىق اكتيۆتەر تۋرالى» زاڭى مەن وعان ىلەسپە قۇجاتتار ماقۇلداندى، دەپ حابارلايدى قازاقپارات ءتىلشىسى.

زاڭ قازاقستان رەسپۋبليكاسىندا تسيفرلىق اكتيۆتەردى شىعارۋ جانە ولاردىڭ اينالىمى جونىندەگى قىزمەتتى، سيفرلىق ماينينگتى دامىتۋ ءۇشىن قۇقىقتىق بازا جاساۋعا باعىتتالعان.

ايتا كەتەيىك، 19-قاڭتاردا سەنات بۇل قۇجاتتارعا تۇزەتۋلەر ەنگىزىپ، ولاردى ماجىلىسكە قايتارىلدى.

ءدال سول كۇنى تۇستەن كەيىن مەملەكەت باسشىسى جەتىنشى سايلانعان ق ر پارلامەنتىنىڭ ءماجىلىسىن تاراتۋ جانە ق ر پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى جارلىققا قول قويدى.

سوندىقتان ءماجىلىستىڭ تاراتىلۋىنا قاتىستى پارلامەنت فۋنتسيالارىن سەنات اتقارادى.

اتاپ ايتقاندا، ءماجىلىس قابىلداعان زاڭعا مىناداي وزگەرىستەر ەنگىزۋ ۇسىنىلدى:

- سيفرلىق ماينينگ جونىندەگى قىزمەتتى جۇزەگە اسىرۋعا ارنالعان ليتسەنزيالاردىڭ كىشى تۇرلەرىنىڭ اتاۋلارىن ناقتىلاۋ؛

- سيفرلىق ماينەردىڭ قىزمەتىن جارنامالاۋعا قاتىستى نورمالاردى الىپ تاستاۋ، ويتكەنى ولار «جارناما تۋرالى» زاڭدا جانە اكىمشىلىك قۇقىق بۇزۋشىلىق تۋرالى كودەكستە كوزدەلگەن؛

- زاڭ نورمالارىن قولدانىسقا ەنگىزۋ مەرزىمدەرىن ناقتىلاۋ.

وسى ورايدا بۇگىن سەناتتىڭ جالپى وتىرىسىندا اتالعان زاڭ مەن ىلەسپە قۇجاتتاردىڭ جەكەلەگەن باپتارى جاڭا رەداكتسيادا ماقۇلداندى.

زاڭنىڭ مىندەتتەرى:

- جاڭا تەرمينولوگيانى ەنگىزۋ (سيفرلىق اكتيۆ، تسيفرلىق اكتيۆتەر بيرجاسى، تسيفرلىق ماينينگ، تسيفرلىق ماينينگ دەرەكتەرىن وڭدەۋ ورتالىعى)؛

- سيفرلىق ماينەرلەر قىزمەتىن ليتسەنزيالاۋ؛

- سيفرلىق ماينينگتىك پۋلدار قىزمەتىن جۇزەگە اسىرۋ؛

- سالىق سالۋ ماقساتىندا سيفرلىق ماينەرلەر مەن تسيفرلىق ماينينگتىك پۋلداردىڭ كىرىستەرى تۋرالى مالىمەتتەردى ۇسىنۋ؛

- سيفرلىق اكتيۆتەر بيرجالارىنىڭ قىزمەتىن رەگلامەنتتەۋ؛

- سيفرلىق اكتيۆتەر سالاسىنداعى مەملەكەتتىك باقىلاۋ؛

- قازاقستان رەسپۋبليكاسىنىڭ سيفرلىق اكتيۆتەر سالاسىنداعى زاڭناماسىن بۇزعانى ءۇشىن جاۋاپتىلىق.