ۇيىقتاپ جاتقاندا ولتىرگەن: جەتىسۋ وبلىسىندا كۇيەۋىن پىشاقتاعان ايەل سوتتالدى
تەكەلى قالاسىنىڭ تۇرعىنى ەۆگەنيا كيتسەنكو 30 جاستاعى كۇيەۋىن ءوزى ولتىرگەنىن مويىنداپ وتىر. ول بۇل قىلمىستى جولداسى ۇيىقتاپ جاتقاندا جاساعان. ىشىمدىك ءىشىپ كەلگەن كۇيەۋى جانجال شىعارىپ، ۇيىقتاپ قالعان. سول مەزەتتە ايەلى جۇرەك تۇسىنا 6 رەت پىشاق سۇققان. ال كۇيەۋىنىڭ ءمايىتىن ۇيىندە 25 كۇن بويى جاسىرعان - قوناق ءۇي بولمەسىندەگى ەدەندى اشىپ، مۇردەنى سول جەرگە كومىپ تاستاعان. 25 كۇننەن كەيىن پوليتسياعا قىلمىسى جايلى ءوزى حابار بەرگەن.
ە. كيتسەنكو 15 جاسىندا تۇرمىسقا شىققان. جولداسىمەن 9 جىل ءبىر شاڭىراق استىندا ءومىر سۇرگەن. ەكەۋىنىڭ ورتاق ءۇش بالاسى بار. ءبىراق كۇيەۋىنىڭ قالاۋىمەن ازاماتتىق نەكەدە ءومىر سۇرگەن.
«كۇيەۋىم ەكەۋىمىزدىڭ ارامىزدا كيكىلجىڭ ىلعي بولدى. ىشىمدىگىن ءىشىپ الىپ، ماعان دا، بالالارىمىزعا دا كۇن كورسەتپەدى. سويلەسەم دە، سويلەمەسەم دە جاقپادىم. ۇيدە ىلعي جانجال بولاتىن. ءتىپتى مەنىڭ دالادا تۇنەگەن كۇندەرىم دە از ەمەس. پوليتسياعا شاعىمداندىم، ءبىراق ولار تەك زاڭ اياسىندا ونى اكىمشىلىك جاۋاپكەرشىلىككە عانا تارتىپ، 10-15 كۇنگە قاماپ، قايتا جىبەرەتىن. سەبەبى، زاڭ سولاي، وسال. مىنە، وتباسىلىق جانجالدىڭ سوڭى وسىلاي ادام ولىمىمەن اياقتالىپ تۇر. جارايدى، 15 جىلدان كەيىن مەن شىعامىن. ءبىراق بالالارىمنىڭ تاعدىرى نە بولادى؟!»، - دەدى قازاقپارات تىلشىسىنە سوتتالۋشى ەۆگەنيا كيتسەنكو.
جەتىسۋ وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءتوراعاسى باقىت ەرماحانوۆ بالالارعا قاتىستى بولەك ۇكىم شىعاردى. وعان سايكەس ولار بالالار ۇيىنە نەمەسە باسقا دا مەكەمەلەر قامقورلىعىنا بەرىلەدى.
اۆتور
سامال قابىشيەۆا
