پەتروپاۆلدا مەكتەپ وقۋشىسى حالىقارالىق جاستار بايقاۋىنىڭ جۇلدەگەرى اتاندى
ايسانا قۇسايىنوۆا پەتروپاۆلداعى نازاربايەۆ زياتكەرلىك مەكتەبىنىڭ وقۋشىسى. ول حالىقارالىق بايقاۋعا ءوزىنىڭ عىلىمي-فانتاستيكالىق جۇمىسىن ەسسە تۇرىندە ۇسىنعان. جاستاردىڭ اراسىندا ۇيىمداستىرىلعان كونكۋرس وقۋشىنىڭ قىزىعۋشىلىعىن تۋدىردى. ويتكەنى ايسانا ءۇشىن عىلىمي فانتاستيكا ءسۇيىپ وقيتىن جانر. ءوزى دە قازىر قيال-عاجايىپقا تولى وقيعالار جايىندا قالام تەربەپ ءجۇر. سول سەبەپتى بىردەن سايتتا تىركەلىپ، قاتىسۋعا ءوتىنىش جولداعان.
«مەن بۇل بايقاۋ جايىندا الەۋمەتتىك جەلىدە ءبىلىپ، قاتىسۋعا بەل بۋدىم. نەگىزى ەسسەنى پاندەميا كەزىندە جازعان ەدىم. ويتكەنى كوروناۆيرۋس بۇكىل الەمدە ۇلكەن پروبلەماعا اينالدى. مەن اتالعان ماسەلەنى بارشا ادامزاتقا جەتكىزىپ، بۇنداي جاعدايلاردا بىرلىكتىڭ قانشالىقتى ماڭىزدى ەكەنىن كورسەتكىم كەلدى»، - دەيدى ايسانا قۇسايىنوۆا.
وقۋشى ەسسەسىن دارىگەردىڭ كۇندەلىك جازباسى تۇرىندە ۇسىندى. وندا ماماننىڭ ناۋقاستارىمەن جالعىز قالعان كۇندەرىنەن ۇزىندىلەر جازىلعان. سونداي-اق، سىرقاتتاردىڭ كوبەيۋىنە بايلانىستى مەديتسينالىق قىزمەتكەرلەردىڭ جەتىسپەۋشىلىگىنەن ولاردىڭ اۋىر جۇمىسى سيپاتتالادى. شىعارما جەلىسى بويىنشا ناتيجەسىندە بىرنەشە ەلدىڭ 9 دارىگەرى بىرلەسىپ، ۆاكسينا ويلاپ تاۋىپ، ۆيرۋستى جەڭىپ شىققان. ايسانانىڭ ەسسەسى بارلىق تەكسەرىستەردەن ءساتتى ءوتىپ، ول «جارقىن ستارت» نوميناتسياسى بويىنشا جۇلدەگەر اتاندى.
ايتا كەتەيىك، «گوريزونت-2100» عىلىمي، عىلىمي-پراكتيكالىق جانە عىلىمي-فانتاستيكالىق جۇمىستاردىڭ حالىقارالىق جاستار بايقاۋى 2019-جىلدان بەرى وتكىزىلىپ كەلەدى. وسى ۋاقىتتا ءىس-شاراعا الەمنىڭ 55 ەلىنەن 16 مەن 26 جاس ارالىعىنداعى مىڭنان استام جاس قاتىسقان. 2022 -جىلى كونكۋرسقا 400 دەن استام جۇمىس جولدانعان، ونىڭ ىشىندە 10 ى - قازاقستاندىقتاردىڭ جۇمىسى.
ايسانا مەن تاعى ەكى وتانداسىمىز جۇلدەگەر اتاندى. ەندى ولار اقپان ايىندا ماسكەۋدە وتەتىن «الەم 2100: جاھاندىق ترەندتەر جانە بولاشاق جاستاردىڭ كوزىمەن» حالىقارالىق جاستار فورۋمىنا بارادى.
