سولتۇستىك قازاقستاندا ءار اۋداندا ءۇي جانۋارلارىن ۋاقىتشا ۇستاۋ پۋنكتتەرى سالىنباق

پەتروپاۆل. قازاقپارات - سولتۇستىك قازاقستان وبلىسىندا اۋدان ورتالىقتارىندا ءۇي جانۋارلارىن ۋاقىتشا ۇستاۋ پۋنكتتەرى سالىنادى.

قۇرىلىستى باستاۋ ءۇشىن وسى ماقساتقا جەر ۋچاسكەلەرىن ءبولۋ جۇمىستارى جۇرگىزىلىپ جاتىر، دەپ حابارلايدى قازاقپارات ءتىلشىسى.

س ق و ۆەتەريناريا باسقارماسىنىڭ مالىمەتىنشە، اۋداندىق جانە پەتروپاۆل اكىمدىگى ءۇي جانۋارلارىن ۋاقىتشا ۇستاۋ پۋنكتتەرىنە جەر ءبولۋى ءتيىس. قىزىلجار اۋدانى بەسكول اۋىلىندا ءتيىستى ۋچاسكە انىقتالىپ، 0,19 گا بەرىلدى. ەسكيزدىك جوباسى دا دايىن.

بۇدان باسقا تايىنشا، اققايىڭ جانە ماعجان جۇمابايەۆ اۋداندارىندا دا جۇمىس باستالىپ كەتتى. جەر كوميسسيالارىنىڭ وتىرىسىندا قاجەت ۋچاسكە انىقتالدى.

قازىرگى ۋاقىتتا ءۇي جانۋارلارىن ۋاقىتشا ۇستاۋ پۋنكتتەرىن انگار تارىزدەس ەتىپ سالۋ ماسەلەسى قارالىپ جاتىر.

مامانداردىڭ ايتۋىنشا، بۇگىندە س ق و- دا قاڭعىرعان ءۇي جانۋارلارىنا ارنالعان ءۇش پاناجاي بار. پەتروپاۆلداعى «بەلىي بيم» 400 ءيتتى قابىلداي الادى، «يساكوۆ اندرەي» جەكە قايىرىمدىلىق قورىنىڭ پاناجايى 300 مىسىق پەن 500 يتكە ارنالعان. ال قىزىلجار اۋدانى ۆيشنيەۆكا ەلدى مەكەنىندەگى «شانس نا جيزن» دەپ اتالاتىن پاناجاي 500 ءيتتى قامقورلىققا العان.

بۇدان باسقا پەتروپاۆلدا «ۆەرنىي درۋگ» جانە «فاۋنا» دەپ اتالاتىن جانۋارلاردى قورعاۋ ۇيىمدارى جۇمىس ىستەيدى.

پوليسيا ورگاندارىنىڭ دەرەگى بويىنشا، س ق و- دا يتتەر مەن مىسىقتاردى ۇستاۋ جانە سەرۋەندەتۋ قاعيدالارىن بۇزعانى ءۇشىن بىلتىر 780 ادام اكىمشىلىك جاۋاپكەرشىلىككە تارتىلدى. ونىڭ 558 ەسكەرتۋ السا، 222 ادامعا ايىپپۇل سالىندى.