سۋ تاسقىنى: ءاليحان سمايىلوۆ توتەنشە جاعدايلار مەن ەكولوگيا مينيسترلىكتەرىنە ءبىرقاتار تاپسىرما بەردى

None
استانا. قازاقپارات – 1 ايدان كەيىن سۋ تاسقىنىنا قارسى ءىس- شارالاردى ىسكە اسىرىلۋ بارىسى ۇكىمەتتە تاعى قارالادى. بۇل تۋرالى پرەمەر- مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

گيدروتەحنيكالىق قۇرىلىستاردىڭ جاي- كۇيى ەرەكشە الاڭداۋشىلىق تۋدىرادى. ەكولوگيا مينيسترلىگى تەك رەسپۋبليكالىق قۇرىلىستاردىڭ عانا جوندەۋ جۇمىستارىن ەسكەرەدى. كوممۋنالدىق جانە جەكە سۋ قويمالارى، بوگەتتەر كوپتەگەن جىلدان بەرى نازاردان تىس قالىپ كەلەدى. سوندىقتان ەكولوگيا مينيسترلىگى ءوڭىر اكىمدەرىمەن بىرلەسىپ، قاراۋسىز نىسانداردىڭ مەنشىك يەلەرىن انىقتاۋى ءارى كوممۋنالدىق جانە جەكەمەنشىك گيدروتەحنيكالىق قۇرىلىستاردى جوندەۋ ءىس- شارالارىن ازىرلەۋى كەرەك. قازىردەن باستاپ سۋ قويمالارىن تولتىرۋ كولەمىن انىقتاپ، وعان ۇنەمى باقىلاۋدى قامتاماسىز ەتۋ قاجەت. قاجەتتىلىك تۋىنداعان جاعدايدا سۋ قويماسىنان سۋدى ۋاقىتىلى ءارى ءقاۋىپسىز اعىزۋ ءىس- شارالارىن قابىلداعان ءجون»، - دەدى ءاليحان سمايىلوۆ ۇكىمەت وتىرىسىندا.

سونىمەن قاتار ول قازگيدرومەت كوكتەمگە ارنالعان بولجام دەرەكتەرىن ۋاقىتىلى ۇسىنۋى تيىستىگىن باسا ايتتى.

«جالپى، توتەنشە جاعدايلار مينيسترلىگى مۇددەلى مەملەكەتتىك ورگاندارمەن جانە اكىمدىكتەرمەن بىرگە سۋ تاسقىنىنا قارسى بارلىق ءىس- شارانى ۇيلەستىرىپ، ساپالى جۇزەگە اسىرىلۋىن قامتاماسىز ەتۋى ءتيىس. سونىمەن قاتار ەكولوگيا مينيسترلىگىمەن بىرلەسىپ، شەكارالاس مەملەكەتتەرمەن ترانسشەكارالىق وزدەندەردىڭ سۋ شىعىنى مەن تۋىندايتىن قاۋىپ- قاتەرگە قاتىستى مالىمەتتەردى ۇنەمى الماسىپ تۇرۋدى ۇيىمداستىرۋى قاجەت. ءوڭىر اكىمدەرىمەن بىرگە ءتيىستى جەدەل شتابتاردى قۇرۋ، كۇشتەر مەن قۇرالداردى دايىنداۋ، سۋ تاسقىنى قاتەرى تۋىنداعان جاعدايدا حالىقتى دەر ۋاقىتىندا قۇلاقتاندىرۋ ءىس- شارالارىن قامتاماسىز ەتۋى كەرەك. بۇگىن ايتىلعان ءىس- شارالاردى ىسكە اسىرۋ ماسەلەسىن ءبىر ايدان كەيىن تاعى دا قارايتىن بولامىز»، - دەدى ۇكىمەت باسشىسى.

فوتو: primeminister.kz

اۆتور

مارلان جيەمباي

سوڭعى جاڭالىقتار