قاپشاعاي سۋ قويماسى كوكتەمدە لەزدە تولىپ، قيراۋى مۇمكىن – ق ر ت ج م

استانا. قازاقپارات - تۇركىستان وبلىسىنداعى قاپشاعاي سۋ قويماسى كوكتەمدە لەزدە تولىپ، قيراۋى مۇمكىن. بۇل تۋرالى توتەنشە جاعدايلار ءمينيسترى يۋري يلين ايتتى، دەپ حابارلايدى قازاقپارات ءتىلشىسى.

«گيدروتەحنيكالىق قۇرىلىستاردىڭ جاي- كۇيى ەرەكشە الاڭداۋشىلىق تۋدىرادى. مۇندا سۋ قويمالارىندا بوس كولەم قۇرۋ ماسەلەلەرىنە نازار اۋدارۋ قاجەت. ونسىز وزەندەردىڭ قاۋىپسىز دەڭگەيىن رەتتەۋ مۇمكىن ەمەس. ءبىزدىڭ دەرەگىمىز بويىنشا بارلىعى 1806 عيمارات بار. 471- ءى جوندەۋدى قاجەت ەتەدى. ولاردىڭ ەڭ كوبى قاراعاندى وبلىسىندا – 160، شىعىس قازاقستان وبلىسىندا – 93، اقتوبە وبلىسىندا - 56 جانە الماتى وبلىسىندا - 41. سونىمەن قاتار، ەكولوگيا مينيسترلىگىنىڭ تىرەك گيدروتەحنيكالىق قۇرىلىستار سانىنىڭ ۇنەمى وزگەرۋى الاڭداۋشىلىق تۋعىزادى. بۇل رەتتە بىزگە مەملەكەتتىك ورگاندار مەن جەكەمەنشىك يەلەرىنىڭ ولاردى جوندەۋ بويىنشا جۇمىسىنىڭ ناتيجەلەرى ۇسىنىلمايدى»، - دەدى مينيستر.

ونىڭ اتاپ وتۋىنشە، ەكولوگيا مينيسترلىگى 2021 -جىلى تۇركىستان وبلىسىنداعى بۇلىنگەن قاپشاعاي سۋ قويماسىن رەكونسترۋكسيالاۋدى اياقتاماعان. ول كوكتەمگى كەزەڭدە لەزدە تولىپ، قيراۋى مۇمكىن. اتالعان قاۋىپتى ايماقتا 15 مىڭنان استام ادام تۇراتىن 7 ەلدى مەكەن ورنالاسقان.

«پاۆلودار وبلىسىنداعى ق. ساتبايەۆ اتىنداعى كانالداعى №87 بوگەتتى جوندەۋ ماسەلەسى شەشۋدى تالاپ ەتەدى. ونىڭ بۇزىلۋى ەكى ەلدى مەكەندە 460 ءۇيدى سۋ باسۋعا جانە استانا مەن قاراعاندىنى سۋمەن جابدىقتاۋدىڭ ۇزىلۋىنە اكەپ سوعۋى مۇمكىن.

«بۇل رەتتە، ەكولوگيا جانە تابيعي رەسۋرستار مينيسترلىگى تەك رەسپۋبليكالىق قۇرىلىستاردى جوندەۋ جۇمىستارىن ەسكەرەدى. كوممۋنالدىق جانە جەكە قۇرىلىستار كوپتەگەن جىلدار بويى نازاردان تىس قالادى. بۇعان كوممۋنالدىق جانە ءجيى گيدروتەحنيكالىق قۇرىلىستاردى جوندەۋ جانە جاڭعىرتۋ جونىندەگى ءىس- شارالار سۋ سالاسىن دامىتۋدىڭ كەشەندى جوسپارىنىڭ جوباسى دالەل بولا الادى»، - دەدى يۋري يلين.

اۆتور

مارلان جيەمباي