قاراعاندى وبلىسىندا ەڭ كوپ تازى ۇستايتىن اۋىل بار
ەجەلدەن ساياتشىلاردىڭ قۇتتى مەكەنىنە اينالعان، قازاقى قايماعى بۇزىلماعان اۋىل ازاماتتارىنىڭ قۇمايلارىن ءتىلشىمىز رۋسلان نۇرلان ۇلى كورىپ قايتتى.
اسحات امانبايەۆتىڭ تازى وسىرۋمەن اينالىسىپ جۇرگەنىنە تۋرا 30 جىل. اتادان بالاعا ميراس بولعان ساياتشىلىق ونەردەن قول ۇزبەي جۇرگەن جىگىت اعاسىنىڭ ۇيىندە قازىر 30 ءيت بار. بىرنەشەۋى 2018 -جىلى تارازدا وتكەن حالىقارالىق جارىستا باس جۇلدە العان. وسىنشا ءيتتى كۇتىپ- باپتاۋ، ازىق تاۋىپ بەرۋ وڭاي ەمەس. ءبىراق اسحاتتىڭ بالا كۇننەن قالىپتاسقان اۋەسىن ەشتەڭە الماستىرا المايدى. ۇلكەندەردەن كورىپ وسكەنىندەي، قۇماي تازىنى جەتى قازىناعا جاتاتىن قۇندىلىعىمىز دەپ ۇنەمى دارىپتەپ جۇرەدى.
اسحات امانبايەۆ، كەڭشوقى اۋىلىنىڭ تۇرعىنى:
بالا كۇنىمنەن وسى تازىعا قۇمارمىن. باياعىدا وسى اۋىلدا كەرەمەت اڭشىلار بولعان. سول كىسىلەرگە قاراپ ەلىكتەدىك، تازىلارىن كورىپ قىزىعاتىنبىز. شىركىن مەندە وسىنداي بولسا ەكەن دەپ ارماندايتىنبىز. سول كىسىلەردىڭ تۇقىمدارىن الدىق. تازى ءوزى ەكى تۇرگە بولىنەدى عوي. شاشاق قۇلاقتى، جارعاق قۇلاقتى بولىپ. ءبىزدىڭ تازىلار ەندى شاشاق قۇلاقتىسىنا جاتادى. جەڭىل بولۋ كەرەك، تىقىر بولۋ كەرەك، قۇلاعى شاشاقتى، قۇيرىعى دوعال، كەۋدەسى كەڭ.
كەڭشوقى اۋىلىندا قازىر 150 ءۇي بولسا، ءار اۋلادا كەمى 2-3 تازىدان بار. ات باپتاپ، ءيت جۇگىرتۋ بۇل ەلدىمەكەننىڭ ەجەلدەن قالىپتاسقان ەرەكشەلىگى. جان- جاقتان كەلىپ تازى تۇقىمىن الاتىندار كوپ. وسىنى ەسكەرگەن اۋىل بالاسى دياس ينستاگرام پاراقشاسىن دا اشىپ قويعان.
دياس مەيىرحانوۆ، كەڭشوقى اۋىلىنىڭ تۇرعىنى:
قازىر 4 مىڭ جازىلىمىمىز بار، 1 ميلليونعا تاياۋ قارالىم. كوبىسى وزدەرى اينالدىرادى عوي ناكرۋتكامەن، بىزدە ونداي جوق. تازا ينستاگرام قولدانۋشىلارىمەن. اڭعا شىققان، تۇلكى، قويان العانداعى ۆيدەولارىمىزدى سالامىز. ساياتشىلىق ونەردى كورسەتۋ ءبىزدىڭ ماقساتىمىز.
اۋىلدا ەرتەدەن ساياتشىلار كۇنى بەلگىلەنگەن. ازاماتتار اتقا قونىپ، العاشقى سوناردا اڭعا شىعادى. بۇل ولار ءۇشىن قۇيىنداي جۇيتكىگەن قۇمايلارىنىڭ ىزشىلىدىگىن، الىمىن سىنايتىن كۇن.
مەدەت وساتايەۆ، كەڭشوقى اۋىلىنىڭ تۇرعىنى:
ءبىز ەس بىلگەننەن كورىپ كەلە جاتقان ءۇردىس وسى. جينالىپ اڭدى قىرىپ تاستاۋ ماقساتىندا ەمەس. اۋىلدى ساعىنىپ كەلگەن ساياتشى ازاماتتار جينالىپ، قاۋقىلداسىپ وتىراتىنداي كۇن بەلگىلەنگەن. بۇل ەندى ونەر دارىعان، قازاقتىڭ سالت- ءداستۇرىن بەرىك ۇستانعان اۋىل.
بەكزادا ونەردى بەك ۇستانعان وسىناۋ الاقانداي اۋىل ازاماتتارىنىڭ تازى يتكە قاتىستى ايتارى كوپ. ەلدەگى تازا قاندى تازىلاردىڭ ناقتى سانىن، تۇرقىن ايقىنداۋ، ونى پاتەنتتەۋ، تۇقىمىن كوبەيتۋ، قازاقتىڭ تازىسى دەگەن اتپەن الەمدىك تىزىمگە ەنگىزۋ سىندى ماسەلەلەر جەتەرلىك. مەملەكەت باسشىسىنىڭ بيىلعى قازاقى ءيت تۇقىمدارىن ساقتاۋ جانە ءوسىمىن مولايتۋ تۋرالى زاڭعا قول قويۋى كوڭىلدەگى ويدى ءدوپ باسىپ، ءبىر سەرپىلتىپ تاستادى، - دەيدى ساياتشىلار.
رۋسلان نۇرلان ۇلى
https://qazaqstan.tv
