قازاقستان ازاماتتارى ۆيزاسىز بارا الاتىن ەلدەردىڭ قاتارى كوبەيەدى

None
استانا. قازاقپارات - وسى اپتادا قازاقستان سىرتقى ىستەر مينيسترلىگى سالاسىندا بىرنەشە ماڭىزدى ءىس- شارا جوسپارلانىپ وتىر.

وسى ورايدا بۇل ۆەدومستۆونىڭ رەسمي وكىلى ايبەك سمادياروۆ مينيسترلىككە قاتىستى اتقارىلاتىن جۇمىستار جايىندا بايانداپ بەردى.

«2023 -جىلعى 23-24-قاڭتاردا تاشكەنت قالاسىندا ەكونوميكالىق ىنتىماقتاستىق ۇيىمىنىڭ سىرتقى ىستەر مينيسترلەرى كەڭەسىنىڭ 26-وتىرىسى وتەدى. ءىس- شاراعا ق ر پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى قاتىسادى. ونىڭ بارىسىندا ۇيىمعا مۇشە مەملەكەتتەردىڭ ەكونوميكا، لوگيستيكا، ەكولوگيا، تۋريزم جانە باسقا دا سالالارداعى ءوزارا ءىس- قيمىلىنىڭ تيىمدىلىگىن ارتتىرۋ ماسەلەلەرى تالقىلانۋى جوسپارلانىپ وتىر»، - دەدى ا. سمادياروۆ بۇگىنشى باسپا ءسوز ءماسليحاتىندا.

ونىڭ ايتۋىنشا، مينيسترلەر كەڭەسىنىڭ قورىتىندىسى بويىنشا تاشكەنت كومميۋنيكەسىن جانە باسقا دا ءبىرقاتار قۇجاتتار مەن ەىۇ ەسەپتەرىن قابىلداۋ ەسكەرىلگەن.

سونىمەن قاتار، 23-25-قاڭتاردا ق ر سىرتقى ىستەر ءمينيسترىنىڭ ورىنباسارى رومان ۆاسيلەنكونىڭ بريۋسسەل (بەلگيا) جانە ستراسبۋرگ (فرانسيا) قالالارىنا ساپارى وتەدى.

بريۋسسەلگە جۇمىس ساپارى اياسىندا ەۋروپا ينستيتۋتتارىنىڭ جوعارى لاۋازىمدى وكىلدەرىمەن ءبىرقاتار ەكىجاقتى كەزدەسۋلەر جوسپارلانعان.

بۇدان بولەك، ستراسبۋرگتە ەۋروپا كەڭەسى پارلامەنتتىك اسسامبلەياسىنىڭ قىسقى سەسسياسى اياسىندا ر. ۆاسيلەنكونىڭ ەۋروپا كەڭەسى مەن ەۋروپانىڭ پارلامەنتتىك اسسامبلەياسى باسشىلىعىمەن كەزدەسۋلەرى وتەدى.

«ساپاردىڭ نەگىزگى ماقساتتارىنىڭ قاتارىندا قازاقستان- ەۋروپا قاتىناستارىنىڭ بارلىق سپەكترىنە شولۋ جاساۋ، وزەكتى وڭىرلىك جانە حالىقارالىق پروبلەمالار بويىنشا پىكىر الماسۋ، سونداي- اق ەۋروپالىق ارىپتەستەردى ەلىمىزدەگى ساياسي رەفورمالاردىڭ ىسكە اسىرىلۋ بارىسى تۋرالى، سايلاۋ قورىتىندىلارى جانە 2023 -جىلعى 19-ناۋرىزعا جوسپارلانعان ق ر پارلامەنتى ءماجىلىسى دەپۋتاتتارىن سايلاۋ دايىندىعىمەن تانىستىرۋ قامتىلعان»، - دەدى رەسمي وكىل.

اتاپ ايتقاندا، جاقىن ارادا قازاقستان مەن ماجارستان ءبىرقاتار ۆەدومستۆوارالىق قۇجاتقا قول قويادى.

2023 -جىلعى 26-27-قاڭتاردا بۋداپەشت قالاسىندا (ماجارستان) ەكونوميكالىق ىنتىماقتاستىق جونىندەگى قازاقستان- ماجارستان ۇكىمەتارالىق كوميسسياسىنىڭ سەگىزىنشى وتىرىسى وتەدى. كوميسسيانىڭ قازاقستاندىق جاعىنىڭ تەڭ ءتوراعاسى - قر ۇلتتىق ەكونوميكا ءمينيسترى الىبەك قۋانتىروۆ، ال ماجارستاننان قارجى ءمينيسترى ميحاي ۆارگا بولادى.

«كوميسسيا وتىرىسىندا قازاقستان- ماجارستان ىسكەرلىك كەڭەسىنىڭ وتىرىسىن وتكىزۋ، ءبىرقاتار ۆەدومستۆوارالىق قۇجاتقا قول قويۋ جوسپارلانىپ وتىر. ولاردىڭ ىشىندە قازاقستان رەسپۋبليكاسىنىڭ ەنەرگەتيكا مينيسترلىگى مەن ماجارستاننىڭ مادەنيەت جانە يننوۆاتسيالار مينيسترلىگى اراسىندا اتوم ەنەرگياسىن بەيبىت ماقساتتا پايدالانۋ سالاسىندا كادرلاردى دايارلاۋ ءارى وقىتۋ جونىندەگى ءوزارا تۇسىنىستىك تۋرالى مەموراندۋمعا قول قويىلادى»، - دەدى ا. سمادياروۆ.

ونىڭ سوزىنە قاراعاندا، ەكى ەلدىڭ وكىلدەرى Stipendium Hungaricum ماجار ستيپەنديالىق باعدارلاماسى اياسىنداعى ىنتىماقتاستىق ماسەلەسىن تالقىلايدى. وسى باعدارلاما اياسىندا ماجار تاراپى 250 گرانت بولەدى (110-باكالاۆريات، 90 - ماگيستراتۋرا، 30 - باكالاۆريات + ماگيستراتۋرا جانە 20 - دوكتورانتۋرا گرانتى) .

ايتا كەتەيىك، 2023 -جىلعى 19-20-قاڭتاردا بريۋسسەل قالاسىندا ورتالىق ازيا مەملەكەتتەرىنىڭ جانە ەۋروپا وداعىنىڭ اۋعانستان بويىنشا ارنايى وكىلدەرىنىڭ ءۇشىنشى وتىرىسى ءوتتى. وعان قاتىسقاندار وڭىرلىك قاۋىپسىزدىك سىن- قاتەرلەرىنە شولۋ جاساۋ جانە اۋعان حالقىنا ۇزدىكسىز كومەك كورسەتۋ بويىنشا ەلدەردىڭ ىنتىماقتاستىعىن تالقىلادى.

وسى ورايدا ا. سمادياروۆ اۋعانستانداعى تۇراقتى بەيبىتشىلىك پەن ورنىقتى دامۋعا جان- جاقتى قولداۋ كورسەتۋگە قاتىستى ۋاعدالاستىق بولعانىن ايتتى. سونىمەن قاتار، جيىن بارىسىندا اۋعانستانداعى ايەلدەر مەن قىز بالالاردىڭ قۇقىقتارىن قورعاۋ جاعدايىنىڭ ناشارلاۋىنا بايلانىستى ماسەلە كوتەرىلگەن.

«قازاقستاندىق دەلەگاتسيانى سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى تالعات قاليەۆ باستاپ باردى. وتىرىستا سويلەگەن سوزىندە ول قازاقستاننىڭ اۋعان حالقىنا گۋمانيتارلىق كومەك كورسەتۋ بويىنشا العان ۇلتتىق مىندەتتەمەلەرىن تولىق جۇزەگە اسىراتىنىن حابارلادى. بۇل تۇرعىدا قازاقستاندىق اگرارلىق كاسىپورىنداردىڭ ب ۇ ۇ- نىڭ دۇنيەجۇزىلىك ازىق- تۇلىك باعدارلاماسىمەن ءوزارا ءىس- قيمىلى اتاپ ءوتىلدى. ماسەلەن، وسى ىسپەتتەس ىنتىماقتاستىق اياسىندا 2022 -جىلدىڭ ءبىرىنشى جارتىسىندا اۋعانستانعا 456 مىڭ توننا قازاقستاندىق ۇن جەتكىزىلگەن»، - دەدى رەسمي وكىل.

«وتاندىق جوعارى وقۋ ورىندارىنىڭ ەۋروپا وداعى قارجىلاندىراتىن جانە بىرىككەن ۇلتتار ۇيىمىنىڭ دامۋ باعدارلاماسى ىسكە اسىراتىن قازاقستاندا، قىرعىزستاندا جانە وزبەكستاندا اۋعان ستۋدەنتتەرىنە ارنالعان ءبىلىم بەرۋ باعدارلاماسىنا بەلسەندى قاتىسۋىن جالعاستىراتىنى راستالدى. ءىس- شارا قورىتىندىسى بويىنشا بىرلەسكەن مالىمدەمە قابىلداندى»، - دەدى ا. سمادياروۆ.

بۇگىن اتالعان ۆەدومستۆودا وتكەن باسپا ءسوز ءماسليحاتىندا ەلىمىزدە اۋعانستان ايەلدەرىنىڭ وقۋىنا كۆوتا ءبولۋ ماسەلەسى تۋرالى سۇراق قويىلدى.

«ەۋروپا وداعىنىڭ كومەگىمەن قازاقستاندا بىرنەشە ءجۇز اۋعاننىڭ قىز- كەلىنشەكتەرى وقۋ وقىپ جاتقان بولاتىن. ەندى بەلگىلى جاعدايلاردان كەيىن، ول باعدارلاما ۋاقىتشا توقتاپ قالدى. ءقازىر سول باعدارلامانى قايتا باستاۋعا ارەكەت جاسالىپ جاتىر»، - دەدى رەسمي وكىل.

وسى ورايدا ول قانشا قىز- كەلىنشەك وقيتىنىن، قانشا گرانت قايدا بولىنەتىنىن كەيىن حابارلايتىنىن ايتتى.

وڭتۇستىك شىعىس ازيادا قۇلدىقتا بولعاندار قۇتقارىلدى

ق ر سىرتقى ىستەر مينيسترلىگى مالىمەتىنە قاراعاندا، بىلتىرعى ماۋسىم ايىنان قازىرگى ۋاقىتقا دەيىن تايلاندتاعى ەلشىلىگىمىز قازاقستاننىڭ 14 ازاماتىنا كومەك كورسەتتى. ولار ءماجبۇرلى تۇردە جۇمىسقا سالىنعان. سونىمەن قاتار بۇل ادامدار ميانما مەن لاوستا بولعانى انىقتالدى.

وسى ورايدا ايبەك سمادياروۆ شەتەلگە بارعىسى كەلەتىن ەلىمىزدىڭ ازاماتتارى كوبىنە الدانىپ قالاتىنىن ايتتى.

«كوبىنەسە ءبىزدىڭ ازاماتتار شەتەلگە جوعارى جالاقىعا قىزىعىپ جۇمىسقا بارادى. 2-3 مىڭ ا ق ش دوللارىنا دەيىن ايلىق تولەيمىز دەپ كومپانيالار شاقىرعان كەزدە، ادامدار شارتتىڭ مازمۇنىنا ءمان بەرمەي جاتادى. سونىڭ سالدارىنان كەيىن قيىن جاعدايعا تاپ بولادى. شەتەلگە بارار الدىندا بۇكىل قۇجاتتى مۇقيات قاراپ شىعۋعا كەڭەس بەرەمىز»، - دەدى رەسمي وكىل.

اتاپ ايتقاندا، 16-قاڭتار كۇنى ق ر سىرتقى ىستەر مينيسترلىگى ب ا ق وكىلدەرىنە ميانمادا قۇلدىققا تاپ بولعانى تۋرالى مالىمدەگەن قازاقستاندىقتاردىڭ جاعدايى تۋرالى ايتقان ەدى. جاقىندا ەلىمىزدىڭ ەكى ازاماتى قازاقستانعا جەتكىزىلدى.

«جۇما كۇنى تۋىستارى حابارلاسىپ، ولاردىڭ ميانماداعى كومپانيادان قاشىپ شىققاندارى تۋرالى ايتتى. ءبىزدىڭ كونسۋل دەرەۋ تايلاندتىڭ شەكاراسىنا بارىپ، ميانماداعى شاعىن قالاشىقتىڭ شەتىنەن ولاردى الىپ كەتتى. وسى ورايدا ولارعا قاۋىپسىز جەرگە جاسىرىنۋعا نۇسقاۋ بەردىك. ويتكەنى اتالعان كومپانيا وكىلدەرى ولاردى ىزدەيتىن بولسا، بۇل ازاماتتاردى دەرەۋ تاۋىپ الاتىنى انىق ەدى. جەرگىلىكتى تۇرعىندار دا وسى كومپانياعا كومەكتەسۋى مۇمكىن»، - دەدى ا. سمادياروۆ.

ونىڭ ايتۋىنشا، قازاقستان ازاماتتارى بانگكوككە جەتكىزىلگەننەن كەيىن، ولاردىڭ قۇجاتتارى راسىمدەلگەن. كوشى- قون زاڭناماسىن بۇزۋ دەرەكتەرىنە قاتىستى ايىپپۇلدارى تولەندى.

«سونىمەن قاتار، ولارعا قاتار ارقىلى اۋە كولىگىمەن ۇشىپ كەلۋ ءۇشىن بيلەت ساتىپ الىنىپ، كەيىن الماتىعا جەتكىزىلدى»، - دەدى رەسمي وكىل.

بۇدان بولەك، ول قازاقستانمەن ارادا ۆيزاسىز ەلدەر ءتىزىمىن كەڭەيتۋگە قاتىستى تۇسىنىك بەردى.

«ۆيزاسىز رەجيمگە قاتىستى بىزدە ارنايى جوسپار بار. جىل سايىن بىرنەشە مەملەكەت ەنگىزىلىپ وتىرادى. وسى ورايدا ەلىمىزدىڭ ازاماتتارى شەتەلگە ۆيزاسىز ساپارلاۋى ءۇشىن ولاردىڭ جاعدايىن جاقسارتۋعا، اتالعان ءتىزىمدى كەڭەيتۋگە تىرىسامىز. بۇل تۇرعىدا كەلىسسوز جۇرگىزۋ وڭاي ەمەس، ءار مەملەكەت ءوزىنىڭ كوشى- قون جانە باسقا دا زاڭناماسىن قاراستىرادى»، - دەدى ا. سمادياروۆ.

وسى ورايدا الەمنىڭ ءار وڭىرىمەن كەلىسسوز جۇرگىزىلىپ جاتقانىن ايتتى.

«مەملەكەتتەرمەن ءتيىستى ۋاعدالاستىق جاسالسا، وندا قۇجاتتارعا قول قويۋعا تىرىسامىز. كەلىسسوزدەر جالعاسىپ جاتىر. لاتىن امەريكا ەلدەرى بۇل باعىتتا ىنتىماقتاستىقتى نىعايتپاق. ويتكەنى بۇل وڭىرگە باراتىن قازاقستاندىق تۋريستەر سانى ءوستى. سوندىقتان لاتىن امريكاسى ەلدەرىنىڭ سىرتقى ىستەر مينيسترلىكتەرىنىڭ باسشىلىعى بۇل باعىتتاعى ماسەلەلەردى قاراستىرۋ ءوتىنىشىن جاسادى. بىلتىر ءبىرقاتار كەلىسىمگە قول قويعان ەدىك جانە بيىل ءبىز وسىنداي ەلدەردىڭ ءتىزىمىن كەڭەيتپەكپىز. سونىمەن قاتار، اراب ەلدەرى دە وسىنداي قارىم- قاتىناستاردى ناعايتپاق»، - دەدى رەسمي وكىل.

رۋسلان عابباسوۆ


سوڭعى جاڭالىقتار