التايدىڭ قارى الەممەن بايلانىستىراتىن «كوپىرگە» اينالدى - شەتەلدەگى قازاق باسپا ءسوزى

استانا. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

موڭعوليا بوكسشىلارى قازاقستان قۇراماسىمەن وقۋ- جاتتىعۋ جيىنىن وتكىزەدى - «Kaznews»

بوكستان ۇلتتىق قۇراما سپورتشىلارى مەن قازاقستان رەسپۋبليكاسى بوكسشىلارىنىڭ بىرلەسكەن وقۋ- جاتتىعۋ جيىنىنىڭ جولداستىق كەزدەسۋى ءوتتى، دەپ حابارلايدى موڭعوليانىڭ «Kaznews» اقپاراتتىق پورتالى.

اتالعان ب ا ق-تىڭ مالىمەتىنشە، سپورتتىق شارا مۇنداي جوعارى دەڭگەيدە وسىمەن ەكىنشى رەت ۇيىمداستىرىلىپ وتىر.

ايتا كەتۋ كەرەك، بۇل بىرىككەن جاتتىعۋلار ەكى جاققا دا ءتيىمدى بولماق. ەكى قۇرامانىڭ دا بيىل الدىنا قويىپ وتىرعان باستى ماقساتى - 2024 -جىلى پاريجدە وتەتىن وليمپيادا ويىندارىندا جۇلدەلى ورىندارعا قول جەتكىزۋ.

التايدىڭ قارى الەممەن بايلانىستىراتىن «كوپىرگە» اينالدى - People.cn

قىتايدىڭ سولتۇستىك- باتىسىنداعى شىڭجاڭدى مىڭداعان شاقىرىمعا سوزىلعان، ايرىقشا كوركىمەن وزگەدەن ەرەكشە كورىنەتىن التاي تاۋلارى الىپ جاتىر. سوڭعى جىلدارى تاۋلى جەر بەدەرى مەن قار ساپاسىنىڭ ەرەكشەلىكتەرىنە سۇيەنە وتىرىپ، التاي ايماعىندا قار-مۇز سپورت تۇرلەرى مەن قىسقى تۋريزمنىڭ قارقىندى دامۋىنا ىقپال ەتەتىن ءبىرقاتار تاۋ شاڭعىسى كۋرورتى سالىندى. وسىلايشا، كەزىندە التايدى سىرتقى الەمنەن وقشاۋلاعان قار قازىر باسقا الەممەن بايلانىستىراتىن «كوپىرگە» اينالىپ، جەرگىلىكتى حالىققا دا كوپ مۇمكىندىك اكەلدى، دەپ حابارلايدى قىتايدىڭ «People.cn» اقپاراتتىق پورتالى.

قىتايلىق باسىلىمنىڭ دەرەگىنشە، جەرگىلىكتى حالىق نەگىزىنەن مال شارۋاشىلىعىمەن اينالىسادى. التى ايعا جۋىق ۋاقىتقا سوزىلعان قارلى ماۋسىم تۇرعىنداردى الەمنەن وقشاۋلاپ، قاقاعان ايازبەن كۇرەسۋگە ماجبۇرلەيتىن ەدى.

قازاق جازۋشىسىنىڭ كىتابى تۇرىك تىلىنە اۋدارىلدى - TRT

انكارادا تۇرىك مادەنيەتىنىڭ حالىقارالىق ۇيىمى تۇرىكسويدىڭ ۇيىمداستىرۋىمەن دراماتۋرگ، فيلولوگ، جازۋشى عالىم جولتاي جۇمات ءالماش ۇلىنىڭ تۇرىك تىلىنە اۋدارىلعان «ماحاببات جانە وشپەندىلىك» اتتى كىتابىنىڭ تۇساۋكەسەرى ءوتتى. اتالعان كىتاپتى تۇرىك تىلىنە اۋدارعان - ادەبيەتشى، عالىم ورحان سويلەمەز. بۇل تۋرالى وسى اپتادا تۇركيا راديو تەليەۆيزيا پورتالى حابارلاعان بولاتىن.

اتالعان ب ا ق-تىڭ دەرەگىنشە، ەۋرازيا جازۋشىلار وداعىنىڭ ءتوراعاسى ياكۋب ومەرۇعلۋ، پروفەسسور ورحان سويلەمەز، قازاقستان ەلشىلىگىنەن مەرەي مۇقاجان قۇتتىقتاۋ ءسوز سويلەگەن.

تۇساۋكەسەردىڭ بەتىن اشىپ بەرگەن تۇرىكسوي ۇيىمىنىڭ باس حاتشىسى سۇلتان رايەۆ تۇرىك حالىقتارىنىڭ مادەنيەتى مەن ونەرىنىڭ شاڭىراعى - تۇرىكسوي ۇيىمىندا قازىرگى قازاق ادەبيەتىنىڭ بەلگىلى وكىلدەرىنىڭ ءبىرى جولتاي جۇمات ءالماش ۇلىن قوناق قىلىپ جاتقاندارىنا قۋانىشتى ەكەنىن جەتكىزدى.

باس حاتشى رايەۆ تۇرىك الەمىندەگى زاماناۋي ادەبيەتتىڭ تانىمال اۆتورلارىنىڭ ءبىرى جولتاي جۇمات ءالماش ۇلىنىڭ رومان، اڭگىمە جانە دراماتۋرگيا سياقتى ادەبيەتتىڭ ءارتۇرلى جانرىندا وتە ماڭىزدى تۋىندىلار جازعانىن جانە كوپتەگەن شىعارمالارىنىڭ ساحناعا قويىلعانىن تىلگە تيەك ەتكەن.

ايتا كەتەيىك، كىتاپتى اۋدارعان ورحان سويلەمەز اۆتوردىڭ تۇرىك تىلىنە اۋدارىلعان بۇل ەڭبەگىندە قازىرگى زاماننىڭ وزەكتى ماسەلەلەرىن فيلوسوفيالىق تۇرعىدان قاراستىرىپ، حالىقتارىمىزدىڭ ۇلتتىق قاسيەتىن، ۇلتتىق بولمىسىن ناقىشىنا كەلتىرىپ جەتكىزگەنىن ايتقان.

«TRT» ماتەريالىندا كەلتىرىلگەندەي، جولتاي جۇمات جازۋشى رەتىندە رۋحاني مادەنيەت تاريحىنا ءمان بەرۋى كەرەك دەپ ەسەپتەيدى. ول بۇل رۋحاني تاريحتىڭ قازاقستان جەرىندە ءومىر سۇرگەن تۇرىك الەمىنىڭ ەكى كورنەكتى تۇلعاسى - فارابي مەن قوجا احمەت ياساۋي تۋرالى كىتاپ جازعان. سونداي- اق، اۆتور ءوز سوزىندە تۇرىك الەمىنىڭ ماڭىزدى تۇلعالارىنىڭ ءبىرى فارابي تۋرالى درامانىڭ «ماحاببات پەن وشپەندىلىك» دەگەن اتپەن تۇرىك تىلىندە وقىرماندار نازارىنا ۇسىنىلعانىنا قۋانىشتى ەكەنىن جەتكىزگەن.

وزبەكستان مەن قازاقستان تۋريستەر اعىنىن ارتتىرۋ ماقساتىندا «جول كارتاسىنا» قول قويدى - «ءوز ا»

تۇركى مەملەكەتتەرى ۇيىمىنىڭ حاتشىلىعى، وزبەكستاننىڭ مادەنيەت جانە تۋريزم مينيسترلىگى جانە قازاقستاننىڭ مادەنيەت جانە سپورت مينيسترلىگى اراسىندا ءۇشجاقتى «جول كارتاسىنا» قول قويىلدى. بۇل تۋرالى وسى اپتادا وزبەكستاندىق ء«وزا» اقپاراتتىق اگەنتتىگى «قازاقپارات» باسىلىمىنا سىلەمە جاساپ حابارلاعان.

وزبەكستاندىق باسىلىمنىڭ كەلتىرگەن مالىمەتىنە سۇيەنسەك، «جول كارتاسىندا» ەكى ەل اراسىنداعى ساياحاتشىلار اعىنىن ارتتىراتىن تۋريستىك باعدارلامالاردى ازىرلەۋ، تۋريستىك كومپانيالار اراسىندا اقپارات الماسۋدى جولعا قويۋ كوزدەلگەن. سونىمەن قاتار، ەلدەردىڭ تۋريستىك الەۋەتىن كورسەتەتىن اقپاراتتى جۇيەلى تۇردە ارنايى زيارات تۋريستىك الاڭىندا ورنالاستىرۋ، شەكارالىق وتكىزۋ پۋنكتتەرىندە تۋريستەرگە قولايلى جاعداي جاساۋ، تۇركىستان- تاشكەنت باعىتىندا اۆتوبۋس قاتىناسىنىڭ سانىن ارتتىرۋ بويىنشا ۇسىنىستار ازىرلەۋ كوزدەلگەن.

بۇل جولعى ونلاين وتكەن كەزدەسۋدە وزبەكستان تۋريزم سالاسىنىڭ وكىلدەرى 2023 -جىلدىڭ قازان ايىندا قازاقستاندا وتەتىن تمۇ مۇشە جانە باقىلاۋشى ەلدەردىڭ كەلەسى كەزدەسۋىنە شاقىرىلعان. سونىمەن قاتار، مادەنيەت جانە تۋريزم مينيسترلىگى تمۇ حاتشىلىعىنىڭ مۇشە جانە باقىلاۋشى مەملەكەتتەر اراسىندا مادەنيەت پەن تۋريزمدى دامىتۋعا باعىتتالعان بارلىق جوبالارىن قولدايتىنىن بىلدىرگەن.

يران مەن ە ە و اراسىندا ەركىن ساۋدا ايماعىن قۇرۋ تۋرالى كەلىسىمگە قول قويىلدى - «Parstoday»

يران ساۋدانى دامىتۋ ۇيىمىنىڭ باسشىسى جانە ەۋرازيالىق ەكونوميكالىق وداقتىڭ رەسمي دەلەگاتسياسىنىڭ قاتىسۋىمەن ەركىن ساۋدا ايماعىن قۇرۋ تۋرالى كەلىسىمگە قول قويىلدى، دەپ حابارلايدى «Parstoday» اقپارات اگەنتتىگى.

ەسكە سالا كەتەيىك، ەۋرازيالىق ەكونوميكالىق وداق - ەۋروپانىڭ شىعىسىنداعى جانە ەۋرازيانىڭ سولتۇستىگىندەگى ەلدەر قۇرعان ەكونوميكالىق ۇيىم. 2014 -جىلى 29-مامىردا بەلارۋس، قازاقستان مەن رەسەي وسى وداقتى قۇرۋ حاتتاماسىنا قول قويدى. 2015 -جىلى 1-قاڭتاردان باستاپ وداق ءىس جۇزىندە جۇمىس ىستەي باستادى.

يراندىق باسىلىمنىڭ كەلتىرگەن دەرەگىنە سۇيەنسەك، يران ساۋدانى دامىتۋ ۇيىمىنىڭ باسشىسى اليرەزا پەيمانپاك وسى كەلىسىمگە قول قويۋدىڭ يران مەن ەۋرازيالىق ەكونوميكالىق وداق اراسىنداعى ساۋدا- ەكونوميكالىق قارىم- قاتىناستىڭ دامۋىن جەڭىلدەتىپ، تەزدەتەتىنىن ايتقان. يراندىق تاراپ كەلىسىممەن قوسا، ورتاق جۇمىس توبىن قۇرۋعا دايىن. وسى كۇنگە دەيىن جاقسى قارجى وپەراتسيالارى جۇزەگە اسىرىلدى. سول سەبەپتى، لوگيستيكاعا قاتىستى شارالار كۇن تارتىبىنە قويىلعان.

قازاقستاننان 1300 توننا ۇن تيەلگەن قىتاي- ەۋروپا پويىزى شيانعا كەلدى - «حالىق گازەتى»

اپتا باسىندا قازاقستاننان 1300 توننا ۇن تيەلگەن قىتاي- ەۋروپا پويىزى شانشي ولكەسىندەگى سيان حالىقارالىق ستانتسياسىنىڭ جۇك اۋلاسىنا كەلىپ توقتادى، دەپ حابارلايدى قىتايدىڭ «حالىق گازەتى» اقپاراتتىق پورتالى.

اتالعان باسىلىمنىڭ دەرەگىنە سۇيەنسەك، بۇل - 2023 -جىلى شيانعا العاشقى جاڭا جىلدىق زاتتاردى اكەلگەن قىتاي- ەۋروپا پويىزىنىڭ ارنايى قۇرامى. دەمەك، پويىز الداعى كوكتەم فەستيۆالىنە (قىتاي جاڭا جىلى – اۆت.) وراي، «شەتەلدىك جاڭا جىلدىق تاۋارلاردى» جەتكىزگەن.

قىتايلىق ب ا ق-تىڭ مالىمەتىنشە، سوڭعى جىلدارى قىتاي- ەۋروپا پويىز رەيستەرىنىڭ تۇراقتى كوبەيۋىمەن جەتكىزىلەتىن شەتەلدىك تاۋارلاردىڭ سانى ارتىپ، قالىڭ تۇتىنۋشىعا تاڭداۋدى مولايتقان.

اۆتور

بەيسەن سۇلتان ۇلى