ادىلەت مينيسترلىگى تاعى ەكى پارتيانى تىركەۋدى قاراستىرىپ جاتىر
«بۇگىنگى كۇنى جەتى پارتيا تىركەلگەن. ەگەر 8- اقپانعا دەيىن تاعى دا قوسىمشا پارتيالار تىركەلسە، ولاردىڭ قۇجاتتارى زاڭعا سايكەس كەلەتىن بولسا، ولار دا سايلاۋعا قاتىسا الادى»، - دەپ جاۋاپ بەردى ق ر ورتالىق سايلاۋ كوميسسياسىنىڭ مۇشەسى شاۆكات وتەمىسوۆ ءتىلشى ساۋالىنا.
سونىمەن بىرگە، ادىلەت ۆيتسە ءمينيسترى الما مۇقانوۆانىڭ ايتۋىنشا، تاعى ەكى ساياسي پارتياعا ءتيىستى راستاما قۇجاتتارى بەرىلدى.
«ەكى ساياسي پارتياعا ءتيىستى راستاۋ بەرىلدى، ولار: «ەل تاعدىرى»، «ۇرپاقتار جالعاستىعى» پارتيالارى. ەندىگى كەلەسى كەزەڭ - سەزد وتكىزۋ. سوندىقتان ولاردىڭ جەدەلدىگىنە بايلانىستى، ەگەر 8- اقپانعا دەيىن تىركەلىپ ۇلگەرسە، ءتيىستى شەشىم قابىلدانادى»، - دەدى ادىلەت ۆيتسە- ءمينيسترى.
ايتا كەتەيىك، 19- ناۋرىزدا پارلامەنت ءماجىلىسى مەن ءماسليحاتتار دەپۋتاتتارىنىڭ كەزەكتەن تىس سايلاۋىنا قاتىسۋعا 7 پارتيا جىبەرىلدى.
ءبىراق «بايتاق» ساياسي پارتياسى ءتيىستى قۇرىلىمدىق بولىمشەلەرىنىڭ بولماۋىنا بايلانىستى، تەك اتىراۋ، قاراعاندى جانە قىزىلوردا وبلىستارىندا ءماسليحات دەپۋتاتىن سايلاۋعا قاتىسا الادى. Respublica پارتياسى ءتيىستى قۇرىلىمدىق بولىمشەلەردىڭ بولماۋىنا بايلانىستى ءماسليحات سايلاۋىنا جىبەرىلمەدى.
سونداي- اق بۇگىن ورتالىق سايلاۋ كوميسسياسى ءماجىلىس پەن ءماسليحات دەپۋتاتتىعىنا ۇمىتكەرلەر تولەۋى ءتيىس جارنانى بەكىتتى.
اۆتور
ايجان سەرىكجان قىزى
