22:15, 20 - قاڭتار 2023 | GMT +5
بوكس: ماحمۋد سابىرحان قارسىلاسىن نوكاۋتپەن جەڭدى
استانا. قازاقپارات - بانگكوكتا 22 جاسقا دەيىنگىلەر اراسىندا بوكستان ءوتىپ جاتقان ازيا چەمپيوناتىندا ماحمۋد سابىرحان جارتىلاي فينالعا شىقتى، دەپ حابارلايدى قازاقپارات ءتىلشىسى.
ەرەسەكتەر اراسىندا الەم جانە ازيا چەمپيوناتىنىڭ كۇمىس جۇلدەگەرى م. سابىرحان 57 كەلىگە دەيىنگى سالماقتا مالايزيالىق اكمال مۋحاممەدپەن جۇدىرىقتاستى.
ءبىرىنشى راۋندتا-اق ماحمۋد قارسىلاسىن نوكداۋنعا جىبەردى. ەكىنشى كەزەڭدە تورەشى تاعى ەسەپ اشقاننان كەيىن تەحنيكالىق نوكاۋت تىركەلدى.
ءسويتىپ ماحمۋد سابىرحان دا جارتىلاي فينالعا جولداما الدى. ول ءبىرىنشى جەكپە-جەگىندە وزبەكستاندىق ميرزابەك ميرزاحاليلوۆتان ايلاسىن اسىرعان ەدى.
ەسكە سالا كەتەيىك، بۇدان بۇرىن قازاقستاندىق بوكسشىنىڭ جاستار اراسىندا ازيا چەمپيوناتىنىڭ جارتىلاي فينالىنا شىققانىن جازعان بولاتىنبىز.
سونداي-اق ازيا چەمپيوناتىندا تاعى ءبىر قازاقستاندىق جارتىلاي فينالعا شىقتى.
