17:29, 20 - قاڭتار 2023 | GMT +6
جاستار قانداي جاعدايدا پرەزيدەنتتىك كادر رەزەرۆىنەن شىعارىلادى
استانا. قازاقپارات - مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ ىرىكتەلگەن جاستاردىڭ قانداي جاعدايدا پرەزيدەنتتىك كادر رەزەرۆىنەن شىعارىلاتىنىن ايتتى، دەپ حابارلايدى قازاقپارات ءتىلشىسى.
«اگەنتتىك پرەزيدەنتتىك جاستار كادرلىق رەزەرۆىن جەتىلدىرۋ جۇمىسىن ۇنەمى جۇرگىزىپ كەلەدى. ايتالىق، جەلتوقساندا رەزەرۆتەن شىعارۋ ءتارتىبىن قاراستىراتىن جارلىق قابىلداندى. وسىلايشا، رەزەرۆتەن شىعارۋ، وزگە ەلدىڭ ازاماتتىعىن الۋ، ازاماتتىعىن جوعالتۋ جانە تەرىس قىلىقپەن جۇمىستان شىعارىلعان كەزدە جۇزەگە اسىرىلادى»، - دەدى دارحان جازىقبايەۆ ەلوردادا وتكەن بريفينگ بارىسىندا.
ونىڭ اتاپ وتۋىنشە، ەلمىزدىڭ بارلىق وڭىرىندە وڭىرلىك جاستار كادرلىق رەزەرۆى قۇرىلعان. ىرىكتەۋگە جاسى 35 تەن اسپاعان، جوعارى ءبىلىمى جانە كەمىندە 3 جىل جۇمىس ءوتىلى بار جاستار قاتىسا الادى.
«بۇل ءوڭىر جاستارى ءۇشىن الەۋمەتتىك ليفتى بولادى. قازىرگى ۋاقىتتا زاڭعا ەنگىزۋ جانە وڭىرلىك رەزەرۆكە قاتىستى تۇزەتۋلەردى ۇيىمداستىرۋ جۇمىسى پىسىقتالىپ جاتىر»، - دەدى ول.
