تۇماۋ مەن ج ر ۆ ي ورشىسە دە وقۋشىلار نەگە ونلاين وقىماي جاتىر - مينيستر جاۋابى

استانا. قازاقپارات – ق ر دەنساۋلىق ساقتاۋ ءمينيسترى اجار عينيات تۇماۋ مەن جەدەل رەسپيراتورلىق ۆيرۋس ينفەكسيا جۇقتىرۋشىلاردىڭ سانى قانداي مولشەرگە جەتكەندە مەكتەپتەر ونلاين فورماتتا ساباق بەرەتىنىن ءتۇسىندىردى، دەپ حابارلايدى قازاقپارات ءتىلشىسى.

«وتكەن جىلدىڭ جەلتوقسان ايىندا دەنساۋلىق ساقتاۋ ۆيتسە-ءمينيسترى ەلدە ج ر ۆ ي جانە تۇماۋدىڭ 2 ميلليوننان استام جاعدايى تىركەلگەنىن، ونى كوبى بالالار ەكەنىن ايتتى. مۇنداي جاعدايدا بالالار نەگە ونلاين فورمات وقىمايدى؟»، - دەپ سۇرادى قولدانۋشى «اشىق ديالوگ» پورتالىندا.

ءمينيستردىڭ ايتۋىنشا، وقۋشىلاردىڭ ساباعىن ەپيدەميولوگيالىق سەبەپپەن ونلاين فورماتقا اۋىستىرۋ ەكى جاعدايدا قولدانىلۋى مۇمكىن.

ەلىمىزدىڭ باس سانيتار دارىگەرىنىڭ 2022-2023-جىلدارداعى ەپيدەميالىق ماۋسىمعا دايىندىق تۋرالى 30№ قاۋلىسى بويىنشا جەدەل رەسپيراتورلىق ۆيرۋستىق ينفەكسيالارمەن جانە تۇماۋمەن سىرقاتتانۋ كورسەتكىشى ءبىر ينكۋباتسيالىق كەزەڭ ىشىندە ءبىر سىنىپتا 20 پايىزدان 30 پايىزعا دەيىن مولشەردە تىركەلسە، جالپى ءبىلىم بەرەتىن ۇيىمداردا وقىتۋدىڭ كابينەتتىك جۇيەسىن جويۋ ۇسىنىلادى.

«سونىمەن بىرگە كۇنتىزبەلىك ون كۇن ىشىندە ونداي سىنىپتارعا جاڭا وقۋشى قابىلداۋعا تىيىم سالۋعا كەڭەس بەرىلەدى. ال ءبىر ينكۋباتسيالىق كەزەڭدە سىرقاتتانۋ كورسەتكىشى 30 پايىز جانە ودان دا كوپ تىركەلگەن جاعدايدا وقۋشىلار كۇنتىزبەلىك ون كۇنگە ونلاين وقىتۋعا كوشىرىلەدى. ءارى قاراي ساۋىعىپ كەتكەن وقۋشىلار وفلاين وقىتۋعا اۋىستىرىلىپ، اۋرۋ بەلگىلەرى بار وقۋشىلار ساۋىققانعا دەيىن ونلاين وقي بەرەدى. سونداي-اق اۋماقتاردا شەكتەۋ ءىس-شارالارى اۋرۋشاڭدىقتىڭ اپتا سايىنعى كورسەتكىشى باقىلاۋ دەڭگەيىنەن اسىپ كەتسە نەمەسە ج ر ۆ ي، تۇماۋمەن سىرقاتتانۋشىلىق كورسەتكىشتەرى وتكەن اپتامەن سالىستىرعاندا 1,5 جانە ودان دا كوپ ەسە وسكەن كەزدە ەنگىزىلەدى»، - دەپ ءتۇسىندىردى مينيستر.