مۇرىن بىتەلۋىنەن تامشىلى ءدارىسىز قالاي قۇتىلۋعا بولادى؟

استانا. قازاقپارات - مۇرنىڭىز قايتا-قايتا بىتەلە بەرسە، شارشاتىپ جىبەرەدى. كەيدە ءتىپتى تۇماۋ سەكىلدى ايقىن بەلگىسى دە بولمايدى.

ال ارنايى مۇرىنعا تامىزاتىن تامشىلى دارىلەر جاعدايدى جەڭىلدەتكەنىمەن جاعىمسىز سالدارعا اكەلۋى مۇمكىن. مىسالى، مۇرىن شىرىشتىسىن قۇرعاتىپ جىبەرىپ، قابىنۋ پروتسەستەرىنىڭ پايدا بولۋىنا ىقپال ەتۋى مۇمكىن. سوندىقتان تامشىلى دارىلەرگە تاۋەلدى بولماس ءۇشىن مۇرىن بىتەلۋىن جەڭىلدەتەتىن باسقا ادىستەردى بايقاپ كورىڭىز.

اۋا ىلعالداندىرعىش قوسىپ قويىڭىز

سۋىق مەرزىمدە جىلىتقىشتار قوسىلعاندىقتان، بولمە ىشىندەگى اۋا قۇرعاق بولىپ كەتەدى. سونىڭ سەبەبىنەن ساۋ ادامداردىڭ ءوزىنىڭ مۇرنى بىتەلىپ قالۋى مۇمكىن. بۇل جاعىمسىز جاعدايدى جەڭۋگە اۋا ىلعالداندىرعىش كومەكتەسەدى. ىلعال اۋا قابىنۋدى جانە شىرىشتىنىڭ تىتىركەنۋىن باسۋعا، سونداي-اق مۇرىنداعى شىرىشتى سۇيىلتۋعا كومەكتەسەدى. ەگەر اۋا ىلعالداندىرعىش قۇرال بولماسا، ۇيدەگى اۋانى ىلعالداندىرۋدىڭ باسقا امالدارىن ىزدەڭىز. مىسالى، ۇيگە بۇرىككىشپەن سۋ شاشىپ شىعىڭىز.

جىلى كومپرەسس باسىڭىز

مۇرىنعا جانە ماڭدايعا جىلى (ىستىق بولماۋ كەرەك) سۋعا سۋلانعان ماتا باسىڭىز. مۇرنىڭىز قاتتى بىتەلىپ تۇرسا، جىلى كومپرەستى ەفير مايلارىمەن، مىسالى، ەۆكاليپتپەن جاساڭىز. ماتاعا ءبىر- ەكى تامشى ەفير مايىن تامىزىڭىز. ءبىراق ءيىسى قاتتى شىعىپ كەتپەسىن جانە مۇرنىڭىزدىڭ ىشىنە تامىپ كەتپەۋى كەرەك. كومپرەستى 15-20 مينۋت ۇستاۋ جەتكىلىكتى.

سۇيىقتىقتى كوبىرەك ءىشىڭىز

مۇرىن بىتەلگەن كەزدە مۇرىن شىرىشتىسى وتە قۇرعاق بولىپ كەتەدى. ىلعال جەتىسپەۋشىلىگىنىڭ ورنىن تولىقتىرۋ ءۇشىن سۇيىقتىق مولشەرىن كوبەيتۋ كەرەك. مىسالى، ىستىق نەمەسە جىلى سۋسىندار ءىشىڭىز.

بيىكتەۋ جاستىققا جاتىڭىز

كوپىشىلىك ادام ۇيىقتاۋعا جاتقاندا مۇرنىنىڭ بىتەلەتىنىن بايقايدى. ول شىنىمەن دە كولدەنەڭ جاتقاندا اسقىنادى. جاعىمسىز بەلگىنى جەڭىلدەتۋ ءۇشىن بيىك جاستىق الىڭىز نەمەسە جاستىقتى باسىڭىز كوتەرىلىپ تۇراتىنداي ورنالاستىرىڭىز. سونداي-اق اۋا ىلعالداندىرعىشتى دا تۇندە قوسىپ قويىڭىز.

مۇرىندى تۇزدى ەرىتىندىمەن شايىڭىز

ءبىر ليتر جىلى سۋعا 2 شاي قاسىق تۇز سالىپ، ەرىتىندى دايىنداڭىز. مۇرىندى شايۋ ءۇشىن شۇڭعىلشاعا ەڭكەيىپ، مۇرىننىڭ ءبىرىنشى وڭ قۋىسىنا، كەيىن سول قۋىسىنا تۇزدى ەرىتىندىنى ينەسى جوق شپريتس كومەگىمەن قۇيىڭىز.

جاتتىعۋ جاساڭىز

ەگەر مۇرنىڭىز بىتەلىپ تۇرسا جانە جاعدايىڭىز فيزيكالىق بەلسەندىلىكپەن اينالىساتىنداي جاقسى بولسا، جاتتىعۋ جاساڭىز. مىسالى، يوگانىڭ كەز كەلگەن جاتتىعۋىن ورىنداڭىز نەمەسە ساياباقتا جىلدام جۇرىسپەن سەرۋەندەپ كەلىڭىز.