ءماجىلىس تاراتىلسا دا ەلىمىزدە زاڭ شىعارۋ قىزمەتى توقتامايدى - ماۋلەن اشىمبايەۆ

None
استانا. قازاقپارات – ق ر پارلامەنتى سەناتىنىڭ ءتوراعاسى ماۋلەن اشىمبايەۆ ءوزىنىڭ Facebook پاراقشاسىندا ءماجىلىستىڭ تاراتىلۋى جانە 19-ناۋرىزدا وتەتىن ءماجىلىسىڭ كەزەكتەن تىس سايلاۋى تۋرالى پىكىر ءبىلدىردى، دەپ حابارلايدى قازاقپارات.

«بۇگىن مەملەكەت باسشىسى قاسىم-جومارت كەمەل ۇلى توقايەۆ پارلامەنت پالاتالارىنىڭ توراعالارىمەن جانە پرەمەر-مينيسترمەن كەڭەسىپ، ءماجىلىستى تاراتۋ جانە ءماسليحاتتاردىڭ وكىلەتتىگىن مەرزىمىنەن بۇرىن توقتاتۋ تۋرالى جارلىقتارعا قول قويدى. سوعان بايلانىستى 2023-جىلعى 19- ناۋرىزدا ءماجىلىستىڭ كەزەكتەن تىس سايلاۋى وتەدى. بارلىق دەڭگەيدەگى ءماسليحاتتاردىڭ سايلاۋىن ورتالىق سايلاۋ كوميسسياسى بەلگىلەيدى»، - دەپ جازدى، سەنات ءتوراعاسى.

ونىڭ سوزىنشە، بىلتىر وتكەن رەفەرەندۋمدا حالىقتىڭ باسىم بولىگى ەلىمىزدىڭ ساياسي جۇيەسىن وزگەرتۋگە قاتىستى باستامالاردى قولداپ، داۋىس بەردى. سونىڭ ناتيجەسىندە كونستيتۋتسيالىق رەفورمالار ىسكە اسىرىلا باستادى. بۇگىن قابىلدانعان شەشىم دە وسى باعىتتاعى كەشەندى جۇمىستاردىڭ جالعاسى ەكەنى ءسوزسىز.

الداعى سايلاۋلار جاڭا تارتىپپەن وتەدى. مۇنداي قادام ەلىمىزدە دەموكراتيانى نىعايتۋعا جانە حالىقتىڭ الدىندا بەدەلى بار جاڭا تۇلعالاردىڭ ساياساتقا كەلۋىنە جول اشادى. سايلاۋشىلاردىڭ سەنىمىنە يە بولعان ازاماتتار كۇن تارتىبىندە تۇرعان ماڭىزدى ماسەلەلەردى شەشۋگە جانە پرەزيدەنتىمىز ايقىنداعان باسىمدىقتاردى جۇزەگە اسىرۋعا تىڭ سەرپىن بەرەدى دەپ سەنەمىز.

«وسى رەتتە ءماجىلىس تاراتىلسا دا ەلىمىزدە زاڭ شىعارۋ قىزمەتى توقتامايتىنىن ايرىقشا اتاپ وتكەن ءجون. سوعان سايكەس ءقازىر پارلامەنتتىڭ مىندەتى تولىعىمەن سەناتقا جۇكتەلىپ وتىر. بۇل - ءبىزدىڭ پالاتا ءۇشىن ۇلكەن جاۋاپكەرشىلىك. الدىمىزدا اۋقىمدى جۇمىستار تۇر. وسىنداي ماڭىزدى كەزەڭدە سەنات ەلىمىزدىڭ دامۋى ءۇشىن قاجەتتى زاڭداردى ۋاقتىلى ءارى ساپالى تۇردە قابىلدايتىن بولادى»، - دەدى ماۋلەن اشىمبايەۆ.

وسىعان دەيىن ءماجىلىس تاراتىلعانىمەن پارلامەنتتىڭ فۋنكتسيالارىن سەنات اتقاراتىنىن جازعان بولاتىنبىز.

سوڭعى جاڭالىقتار